حطام جسد انثى ( القصة مكتملة )

البارت السادس

اسماء : وج انتي مصخنة حيل ...

فدوة اسماء بس عوفيني انام جسمي ميت تعب ماكدر احجي ولا اكدر ابجي ولا اكدر احرك جسمي ..

اسماء : نامي نامي وكلشي اله حل لاتخافين احنه وياج نلكه حل ..

غفيت مادري شوكت احس بتعب حل عظامي حل احس بثكل فضيع بكل جسمي اريد افتح عيوني اريد احرك اصبعي ماكدر اسمع صوت وحجي بره اريد افرزن الحجي المن صوت من بدت تطلع مني ونة خفيفة سمعت من بين الاصوات صوت امي فرزنت صوتها ونيت وطاحت دمعتي واني مغمضة عيوني  كدرت اكول يمه بس صوتي مايعله  صحت بعد يمه  يمه تعاليلي حسيت بيد صارت على كصتي فتحت عيوني قليل شفت  ... عمر ... صرخت بصوت عالي عوووووووووفني لااا لا دخيلك لزمتني امي وحضنتني حيل ..

امي : وج يمه سودة بوجهي شجاج شبيج هاي اني امج عمت عيني يايمه شلون عفتج شلون سودة عليه  ياااايمه سودة بوجهي ..

اسمع حجيها والعبرة خنكتني كمت اشهك وشهكاتي صارت بجي حيل اااااه يمه ليش عفتيني ليش يمه ..

امي : يابنتي عمة بعيني  انه لو ادري هيج يصير اعوفج والله ماعوفج دقيقة  وين انطي وجهي وين من هالمصيبة يايمه يابنيتي ..

امي تحجي واحس  جروحي تزيد احس بصرخة بروحي اريد اصرخ وخانكتني العبرة ..

صدت امي  على اخواتي جانن شذى وميسون واكفات وهم الدموع تارسة خدهن ..

امي : ولجن اني مو امنتجن على اختجن لاتعوفنها وحدها ولجن ليش ليش ماامن بعد من اطلع ولجن ليش هيج ليش وجرتن كلبي ليش ( تحجي وتدك على رجليها )
لزمت ايديها كافي يمه البنات ماعافني بس ٣ ساعات وذاك الحقير استغلها ..

امي : ولج امنتهن مايعوفنج دقيقة ..

شذى : يمه جنت يم الدكتورة عدي مراجعة والله يايمه ماعفتها بس شوية وكلت لميسون خليها لاتفتح الباب اله من اجي اني اخابرها ..

التفت عليه ..

امي : ولج انتي قافلة الباب ؟؟

والله يمه قفلتها اني متاكدة قفلتها ..

امي : شلون دخل فهمني شلون  ...
صاحت امي ابو اسماء ابو اسماء وينك وين راح هالرجال  .. كامت امي طلعت ..
باوعت لوجوه اخواتي شكد شفت بيهن كسرة اني لحد هسه ماشفت وجهي بس شفت كسرتي بوجوه اهلي  اسمع هوسة وصياح ماعدي طاقة اسأل شكو وشصار  بس الدموع تجري ..
شوية دخلت اسماء..

اسماء : شذى ميسون ابوي يردجن ..

طلعن شذى وميسون ..

اجتي اسماء خلت ايديها على خدودي لزمتني حيل وخلت عيوني بعيونها..

اسماء : باعي رهف راح تسمعين اشكال الحجي واشكال القصص وراح تسمعين اشكال الاتهامات من العالم لاتظنين الي موجودين بره كلهم يشوفوج بريئة ..