حطام جسد انثى ( القصة مكتملة )

البارت العشرون

غفيت على ريحة ذكرياتي على عطر رجعني  اكثر من سنة ليوره  رجعني لايام سودة عشتها  ايام جانت نهارها مثل ليلها وليلها غايب عنه الكمر اظلم بلايه ضوه ..

حسيت على ايد صارت على بطني على شخص صار وراي بس ماقبلت افتح عيوني سحبتي الايد عليه صار ظهري بصدره  دكات كلبي السريعة خلته يحس اني مو نايمة  لف ايده اقوه على بطني ..

احساس الضعف الي صار بيه بذيج اللحظة خلاني اندار عليه واطب باحظانه  ..

لفيت ايدي على ظهره وغطيت راسي بصدره ..

كلت بكلبي اللعبة الي ردت خاسرها عمر  راح اخسرها اني !!...

غطيت بحظنه اكثر ..

شفايفه يم اذني  حجه بصوت ناصي ..

عمر : صيري مرتي يارهف من صدك تعبت واني ابعد عنج واني اتجاهل وجودج  خلينه نعيش لشوكت نبقه هيج ..

_ انت ليش هيج جاي تسوي ..

عمر : شنو شمسوي ؟!

_ انت تخوني ..

عمر : شنو؟

_ تخوني ياعمر جان المفروض تصبر عليه واني بهالظرف مو تروح باول زواجنه تدور غيري وليلك مكضي بره ..

عمر : مادري اذا راح تصدكين او لا بس اني ماطاخ مرة بعدج ......

عصرت ضهره بيدي ..

_ وطلعاتك ؟

عمر : مااكدر اكلج بس يجي يوم وتعرفين كلشي ..  كافي تسوين بيه هيج  انتظرتج هواي انتظرت يجي يوم وتحنين عليه يجي يوم واشوف وجهج يضحك بوجهي وكل مرة جنت افقد الامل  وارجع اتأمل من جديد ..

_ انت الي عفتني ..

عمر : انتي الي ردتي هالشي واني حققت رغبتج ..

_ اني تعبانة الي صار بيه مو شوية ..

عمر : اعوضج يارهف وعيونج اعوضج عن كل دقيقة وكل ساعة  عشتيها واني مقهورة  اعوضج لو ادفع عمري كله علمود اشوفج تضحكين ..

غمضت عيوني بحظنه ...

_ ليش ؟ تحس بالذنب مو ؟..

عمر :مااكلج مااحس بالذنب  لا مذنب وهواي واول مرة اعترف بذنبي كدام احد  بس مو هذا السبب الي يخليني اريد اعيش وياج واعوضج ..

_ لعد ؟

عمر : لان احبج ..

فتحت عيوني  صارت عيوني بعيونه ..

عمر : اي  احبج  ..

كلبي صار يدك سريع وانفاسي صارت سريعة دمعتي طاحت  من عيني  ..
شاف دمعتي من طاحت خله شفايفه على على مكان دمعتي  باس مكان الدمعة ..

عمر : انطيني فرصة رهف  ماكو بشر ماعده ذنوب ماكو بشر مابي سلبياته بس انطيني فرصة  ..