حطام جسد انثى ( القصة مكتملة )

البارت الخامس عشر

دخلت للبيت واني الحركة كاتلتني شكد نذل افتر على اهلي واحد واحد من وراه مات ابوي واسماء ورجلها تعاركو ويه امجد وراحو للبصرة وهسه افتر على امجد يعني هيج انسان شنو علاجه مثل الآفة مايعوف الزرع اله يخربه كله ..
كعدت على كرسي بالمطبخ افكر شلون اكول لامي على سالفة امجد واذا كتلها امجد راح يسمع حجاية منها والله احتاريت اني وعقل ماضل براسي ..
باوعت عالطباخ شفت جدر تذكرت اني ميته جوع حتى غده متغديت كمت فتحت الجدر شفت برياني صبيت شوية بماعون وكعدت اكل  ..
تأذيت بكعدتي من الكعب وجع رجليه شمرته ونزلت كعدت بالكاع تذكرت من جان ابوي يكلي هو بس المثقف يكعد على ميز ياكل اييه والله ايام راحت ولا جنها صارت وحجايتك بس البقت يابابا ..
اجتي امي شافتني كاعدة اكل  باوعت عليه ودارت وجهها ماتحاجيني زعلانة...

_ ماما والله مااتحمل اشوفج كالبة وجهج عليه فدوة اروح لوجهج اني شمصبرني على ضيمي وقهري غيرج ونوب تكلبين وجهج عليه والله اختنك ياامي ..

امي : انتي لو بحال احد ماسويتي سوايتج البارحة وفشلتينه الليل كله ماكدرت انام من الحصرة البكلبي من وراج ولج كلما اكول اي راح تفرج والله استجاب دعوتي يجي حظج يعوجج بس يعمي شعلي الحظ  الله انطه كل واحد عقل وكله هاي نار تحركك وهذا مي يغركك شوف مصلحتك وين ..

_ يوم يعني انتو ليش ماتفهموني اكلج اني مراح اكون سعيدة ويا  يوم والله اكرم واعرفه كل الزين هالسالفة لايمكن ينساها حتى لو كال انساها..

امي : وج رهيفة ولج عقل ماعدج عسما شيريد يسوي يسوي اتزوجي منه شهر شهرين واطلكي عاد العالم يكولون مطلكة وتنسد فضيحتج ..

_ شكم مرة تردوني انكسر ها ! شكم مرة اني مو بشر مو من حقي اعيش حياة زينة بعد الي صار ليش تردوني اوكع بالغلط مرتين اني من جرح عمر ماطبت ترديني اموت مرة ثانية وعلمود منو علمود الناس ؟ الناس عمرها ماتبطل حجي حجو عالساقطة وعالشريفة وعالتلبس عباية وعالمحجبة وعالسافرة وعالكاعدة بلبيت وعالتشتغل عالمتزوجة وعالمامتزوجة محد سلم من حجيهم ماكو داعي اسير حياتي لما يرضي الناس لان الناس ماراح يعانون مثلي محد راح يدري بقهري ووجعي محد يسألني مرتاحة لو لا..

امي : من اكلج عقل ماعدج ضلي ضلي لعد مرتاحة مو ضلي اني تاليتي انجلط من القهر من وراج الله ياخذني وارتاح من مصايبكم ..

ذبيت الخاشوكة عالماعون حيل طفرت يم الكاونتر اخذت جنطتي عفتها وصعدت للغرفة جبت ملابس دخلت للحمام كعدت والدموع وحدها تجري بدون صوت ...

(قبل يومين  الخميس ساعة ٩:٣٠ ليلاً)

دكيت باب غرفة امي ..

امي :تعاي رهوفة دخلي ..

_ ماما اريد احجي وياج بموضوع ..

امي : اي سولفي بس اكلج باجر عود خلي مكياج خفيف هو هذا هم عقدج ومايصير بس مرة بالعمر صدك اسماء خابرتني تكول ماكدر اجي بالعرس عود اجي ..