حطام جسد انثى ( القصة مكتملة )

البارت الثالث عشر

لساعة ب١١ اخذت تلفون امي لان اذا هو عمر نفسه فماعده رقم امي اما رقمي فراح يعرفه بساع لان متصلة عليه قبل ..

اخذت تلفون امي وصعدت للغرفة سجلت الرقم بالتلفون  اتصلت عليه ماكو رد اتصلت مره ثانية انطاني رفض اتصلت مرة ثالثة فتح خط ..

( الوووو )

اني مخلية ايدي على حلكي مااريد حتى صوت انفاسي تطلع ..

( الوووو متحجي ابن القندرة بس تعرف تتصل وتحرك التلفون حرك   خل اشوفك بعد تتصل اذا مااندلك  واجي لبيتك اكسرك تكسر )

سد التلفون  بقيت واكفة مصدومة ..

هذا عمر اي عمر هو عمر لا يمكن اغلط بصوته واسلوبه هو عمر

شعنده ويه امجد شنو اللعبة الي جاي يلعبوها  ؟؟؟؟؟؟
ذبيت التلفون من ايدي خليت ايديه على راسي احاول افتهم السالفة شنو ؟
شنو الي بين امجد وعمر ؟
امجد منين جاب رقم عمر الجديد ؟ ديلتقي بي لو لا ؟؟؟؟

اذا اكو سؤال ابالي فجوابه اكيد عد عمر ولازم اشوف عمر ..

ثاني يوم الصبح فتحت عيوني جريت تلفوني اشوف الساعة بيش باوعت لكيتها ب٧ ونص طفرت من فراشي حيل تأخرت نزلت اركض عالدرج غسلت وجهي فرشت اسناني شافتني امي ..

امي : هاي شبيج اشو تركضين ..

_ مستعجلة حيل ماما تأخرت كلش ..

امي : دبدلي وتعاي تريكي ..

_ لا ماريد مالحك ..

صعدت بسرعة لبست بنطرون وقميص فوك من الركبة اسود خليت مكياج عالسريع جريت شالي ولفيته اخذت الجنطة وطلعت امي تصيح وراي اكليلج شي ولج قبل لاترحين هسه هو محل شوكت ماتفتحي ..
اخذت سيارة من الشارع وكبل للمحل وصلت ب٨ وعشرة شكد عيب اني مفروض من ٨ اله ربع هنا ..
فتحت المحل  شغلت السبلت مسحت الارضية بالماسحة رشيت معطر  رتبت الملابس وطلعت جديدات عرضتهن دك تلفوني مخليته عالميز ..

_ الو هلا صباح الخير ابو احمد ...

ابو احمد : هلا صباح النور فتحتي المحل بعدج ؟..

_ اي فتحته ونظفته  بس شوية تأخرت اليوم ٨ وعشرة وصلت ..

ابو احمد : مو مشكلة رهف بسيطة بس اليوم اريدج تبقين لل٦ ولو ادري ازحمج بس اني بطريقي لاربيل وهسه خابروني البضاعة الجديدة راح توصل كالو ب٦ العصر توصل ..

_ تمام ابو احمد سهلة ابقه وادخل البضاعة واذا تريد حتى ارتبها ..

ابو احمد : لا لا خلي الترتيب لباجر بس انتظريهم علما يوصلون ويدخلون البضاعة قفلي المحل وروحي للبيت ارتاحي ..