حطام جسد انثى ( القصة مكتملة )

البارت الخامس والعشرون

صراخ وضرب عمر اصوات تكسير  صياح اسماء وبجي الجهال ..

كلبي يرجف وجسمي كله يرجف اباوع على رجليه رجفتهن مو طبيعية   الم صار بكل جسمي  ..

الوجع يكطع ابطني وجع فضيع احس سجينة كل شوية تزرف بطني  شبكتي بطني بيديه .

لا  لا تخافن ماراح يصير لا تخافن ليش خفتن امجن جاي تتوجع لا تخافن هو هذا ابوجن دائما هيج عصبي لا تخافن من صوته لا تخافن امجن جاي تتوجع ..

الالم زاد ابطني والباب صارت شبعدها عني اريد اكوم اطلع اكلهم الحكوني راح اموت اريد بس اوصل للباب مااكدر اريد اصرخ ماتطلع مني بس ونة خفيفة  ..

اكول بكلبي لا ياربي اخذ روحي وعوف بناتي اموت اني وخلي يعيشن لا يموتن لاااا  ...

صياح عمر وضرب الباب اخر شي اتذكره  ...

فتحت عيوني هدوء درت وجهي للشباك دنيا ليل  ..

اني وين ؟؟

درت وجهي عالجهة الثانية اشوف جمرة الجكارة ودخانها  ..

اعرف هاي الريحة واعرف هاي الجمرة المن  ..

هذا عمر !!!!

_ اني وين  انت شجابك شلون دخلت للغرفة ..

عمر : اششش ماريد اسمع صوتج اسكتي خلاص ..

_ شتريد مني ؟

عمر : مااريد شي منج ..

_ لعد ليش تلحكني وليش كلما اطلع من حياتك ترجع تدخل انت بحياتي ..

عمر : انتي لهسه مافهمتي هالشي ..

_ شنو ؟

عمر : انتي لعمر من يوم ولادتج ولاخر يوم بعمرج انتي لعمر  عمر وبس ..

_ لا  انت جنت كابوس بحياتي وخلص اني صحيت منك ..

( ضحك بصوت عالي )

عمر : ههههههههههههههههه لا اني حلمج الوردي ..

_ عوفني كتلك اني مااريدك انت عدك حياتك ليش تركض وراي عوفني ..

عمر : رهف بكل مرة تبعدين عني يرجع اكو شي يربطج بيه  المرة الاول جان طفل والثاني زواج والثالثة البنات ..

_ البنات ؟؟؟

باوعت على بطني ماكو بطني مو حامل !!
تلمست ابطني ..

_ لا انت متكدر تاخذهن لا ذني بناتي اني تعبي اني انت مالك حق بيهن   وينهن وينهن وين راحن ويننننننننننننننننهن ......

فزيت بصوت صراخي اصيح ويننننننننننهنننن ..

اسماء : اسم الله خية اسم الله ..

باوعت عليها ..

_ وينهن ؟؟ البنات وينهن ..

اسماء : اسم الله رهف لا تخوفيني قابل وين يرحن ذني ابطنج بعدهن ..