حطام جسد انثى ( القصة مكتملة )

البارت الثاني والعشرون

اسماء : وهسه شكلتي ؟؟

_ ماروح وقراري مايتغير ..

اسماء : ضلي هنا مكفخة اني صوجي اجيت امداني اي والله وصارلي من العرس لهسه افور امداني اي والله ..

عافتني ومشت واحس بروحي ذبلت وجسمي نحل تعب فضيع يسيطر على كل جسمي ...

رتبت المطبخ طلعت جبت المكناسة اريد اكنس البيت  شفت الحليب مكبوب عالكاونتر وعالكاع   كلت بكلبي بدت سوالف الضرة ..

رحت نظفت البيت دخلت للاستقبال انظفها باوعت على مكان عمر الي جان ينام بي  ماعرف شنو الاحساس الي اخذني لمكانه وخلاني اتمدد بي واغمض عيوني ماكدر افسره شوك قهر حزن ..

ليش هيج جاي تعاقبني ياعمر ذنبي مو جبير حتى استاهل منك كل هالعقاب او انو سالفة العقاب هاي حجة اخترعتها انت حتى ترجع لمروة  ؟؟

ها مرتاح وياها تحقق حلمك وجبتها يمك ؟ جاوبني ليش تسكت حتى لو طيفك الي جاي احاجي اعرف طيفك مو اخرس حاجيني كلي مرتاح وحلمك تحقق اني شنو هسه بحياتك شتشوفني بعد  ؟ زين احلامي ليش ماتحققت ليش بكل حلم وكل امنية اتمناها نهايتها يمك ليش كلما اهرب منك لطريق ثاني الكه نهايته يمك ؟  اعتقني ياعمر اعتق روحي ولا تخليني اتعلق بيك كافي كلما تشوفني اتعلق بيك تدوس على روحي وعلى كلبي ..

فتحت عيوني وجني ماجنت نايمة جان كدامي واسولف ويا ومايرد الي جواب  ..

كعدت محترة وكهرباء ماكو الساعة ب١١ الصبح  كمت اريد اسبح تذكرت الخبز كلت ماترهم اخبز نوب وارجع اسبح مرة ثانية  اخذت العجين ورحت اخبز  ..

التنور صاير وره غرفة عمر خليت العجين واريد اشعل التنور سمعت مروة تخابر .

مروة : حبيبي والله دامل هنا وحدي ونوب رهف من الصبح من ال٩ لهسه وعايفة المطبخ كله وصخ والحليب كابته وتارسة المطبخ ..

هزيت بيدي وكلت اشتغلت سوالف الضراير وسوالف الجذب واني كل هاي مالي خلكها بس اكول الله يصبرني ..

شعلت التنور خبزت وكملت  جبت الخبز للمطبخ وكمت اصفط بي واخلي نص منه بالمجمدة  باوعت عالطباخ شفت صحن جبير برياني وعليه دجاج   استغربت منو اجه جابه ..

كملت ترتيب الخبز وكفت عالسنك اغسل وجهي  فليت شعري على طول لان اريد اطب للحمام  وخليت القراصة عالسنك  اغسل وجهي ومغمضة عيوني حسيت احد صار وراي   سدت المي ودرت وجهي شفت ولد شاب واكف وراي شهكت مرعوبة هو كبل دار وجهه ركضت للغرفة شلت شعري ولبست شال ورجعت اريد اشوف منو هذا الي طب للبيت بدون ماادري حتى ..

وصلت للمطبخ شفت مروة واكفة تحجي ويا وهو يكللها ليش ما انطيتي البنية خبر اني هنا ..

_ صعبة عليها تنطيني خبر وبعدين انت منو ؟؟ وشلون تدخل للبيت هيج شنو البيت مااله حرمة ؟؟ ..