စွဲလမ်းမှု <ခံစားမှုအသစ်တစ်ခုအားတွေ့ရှိစီးမျောခြင်း>
_____________________________________________
ဘယ်ကစပြောရမလဲမသိဘူး။
ပြောချင်နေတာတော့ တစ်ပါတ်လောက်ရှိပြီ။ဟုတ်တယ် ခင်ဗျားတို့ကိုပြောချင်တာ။
ခင်ဗျားက ယောက်ျားဖြစ်ရင်လည်းဖြစ်မယ်၊ မိန်းမဖြစ်ရင်လည်းဖြစ်မယ်၊ ဘယ်သူပဲဖြစ်ဖြစ်ဗျာ။ခင်ဗျားဟာ Gay တစ်ယောက်ဖြစ်နေရင်တောင် ကျွန်တော်အခုပြောမယ့်စကားက ခင်ဗျားကိုပြောချင်နေတာပါပဲ။
ဘာအကြောင်းလဲလို့ ခင်ဗျားတွေးနေလား။ဘာအကြောင်းမှတော့ မယ်မယ်ရရမရှိလှပါဘူး။"စိတ်ခံစားမှုတစ်ခု"အကြောင်းပါပဲ။
စိတ်ခံစားမှုဆိုရုံနဲ့ ခင်ဗျားရှင်းရှင်းလင်းလင်း မသိနိုင်ဘူးဆိုတာကျွန်တော်သိတယ်။စိတ်ခံစားမှုဟာ အမျိုးမျိုး ခွဲစိတ်လို့ရတယ်။
ကျွန်တော်ပြောချင်တာက "စိတ်ခံစားမှု"ဆိုတဲ့စကားလုံးရဲ့အောက်မှာ အမျိုးအမည်ထပ်ခွဲလို့ရတာကိုပြောချင်တာ။တစ်နည်းအားဖြင့် "အရောင်" ဆိုတဲ့စကားလုံးအောက်မှာ မရည်မတွက်နိုင်တဲ့ အမျိုးအစားတွေရှိနေသလိုမျိုးပေါ့။ ဥပမာ အဖြူ ၊အပြာ၊အနီ၊ခရမ်း စသည်ဖြင့်ပေါ့ ။လူသားတို့အကုန်တောင် အမည်နာမ သတ်မှတ်ပေးလို့မရတဲ့ အရောင်များစွာဟာ "အရောင်"ဆိုတဲ့ စကားလုံးအောက် မှာ ဘောင်ဝင်နေသလိုမျိုး" စိတ်ခံစားချက်"ဆိုတဲ့စကားလုံး အောက်မှာလည်း ခင်ဗျားတို့ကိုယ်တိုင်တောင် မသိသေး မခံစားဖူးသေးတဲ့ ခံစားမှုအမျိုးအစားတွေပါတယ်။
စကားလုံးတစ်လုံးဟာ အဓိပ္ပါယ်အရမ်းရှိနေတတ်တယ်။ ကျွန်တော့်အနေနဲ့ ဒီစာတစ်စောင်နဲ့ ခင်ဗျားကို စိတ်ခံစားချက်တွေအကုန်မရှင်းနိုင်ဘူး။ ကျွန်တော်ရည်ရွယ်တာကလည်း" စိတ်ခံစားမှု"ဆိုတဲ့စကားလုံး အောက်မှာ ဘောင်ဝင်တဲ့ "စွဲလမ်းမှု'"ဆိုတဲ့ အကြောင်းပဲ။
"စိတ်ခံစားမှု" အောက်မှာ "စွဲလမ်းမှု" က ဘောင်ဝင်တာ သေချာရဲ့လားလို့တော့မမေးနဲ့။အဲ့ဒါဟုတ်မဟုတ် ခင်ဗျားကိုယ်တိုင် စမ်းစစ်ကြည့်လို့ရတယ်။
"စွဲလမ်းမှု" မှာလည်း များစွာသော အဓိပ္ပါယ်တွေ ထပ်ခွဲလို့ရတယ်။ ဥပမာ ကလေးတစ်ယောက်က သူပိုင်ချင်တဲ့ အရုပ်တစ်ရုပ်ကို အိပ်မက်ထဲအထိ ထည့်မက်မိတာကစ ခင်ဗျားတို့ သဘောကျတဲ့ တစ်စုံတစ်ယောက်သောသူကို ခင်ဗျား အိပ်မက်ထဲထည့်မက်တာအထိပေါ့ဗျာ။
