اندروفين

٣٢ الجزء الثاني

ضعني في قلبك بالجهه التي هجرها الجميع...في الجانب الشاغر منك...في الفراغ الذي لا تريد ان تملأه بأي شيئ عابر!..شى لا يبدل بأحد!💜...

راقده في سريرها...في غرفتها الخاصهه...ساندا ضهرها علي مخده...وبتعاين بالشباك بره في الشارع...زهجانه ومدبرسه شديد!...جا داخل عليها سامي♡شايل معاهو سندوتشات اقاشي...عشان عارفها بتحبو♡جا قعد جمبها في السرير....

سامي: سميحتي♡ارح ناكل
ريم: م عندي نفس
سامي(بزهج): لا...ماف حاجه اسمها م عندي نفس...ليك كم يوم م اكلتي زي الناس ي بت!
ريم: انت زهجت...وانا زهجت وقرفت من نفسي...قوم من هنا ي سامي عليك الله انا م دايره شي بس خلوني...راسي واجعني شديد
سامي: دا اثر الوقعه...بمرور الزمن بتخف...ح تشعري بدوخه برضو..بس عادي...المهم انو م حصل ليك شي اكعب من كدا
ريم(ضحكه خفيفه): شي اكعب من كدا!انا اتشليت ي سامي...الحاجهه الكعبه ال ح تحصل لي شنو اكتر من كدا!
سامي(قرب منها): قدر اخف من قدر ي ريم...براك سمعتي الدكتور قال شنو عن حالتك...كان ممكن يحصل ليك نزيف في الراس وافقدك...بعدين ي ريم خليك متفائله...ليه التشاؤم والنفسنه دي!انتي ممكن تتعالجي وترجعي تمشي زي الاول...م تنفسني ي بت الناس انا معاك💜
ريم: ليك فتره وانت بترفع في معنوياتي وبتحسسني انو اي شي ح يتصلح!بتعمل كدا ليه!انت م مجبور علي ي سامي...ما بتقدر تعرس ليك وحده مشلوله...م تدمر حياتك عشاني امشي شوف حياتك عليك الله....
سامي(بصره وش): ي غبيه...دي شنو الورجغه البتقوليها دي انتي!انا بحذرك اوعك تقولي لي كلام زي دا تاني...وانا لمن بقول ليك كلام زي دا م عشان شفقه...ولا عشان ارفع معنوياتك...لا عشان دا واجبي إتجاهك وانا بحب اعمل كدا♡وبالنسبه لموضوع اعرسك وانتي بالوضع دا م عشان اظهر بمظهر الراجل المثالي..عشان انا بريدك ودايرك♡وللمره الالف اوعك تكرري لي كلامك دا تاني
............................
ريم سكتت...م قالت لسامي شي!...قبلت منو وبتعاين بالشباك بره في الشارع...سامي ملاحظ انها طوالي مضايقهه ومتنرفزه...دي حاله نفسيه طبيعيه بعد م ريم اتشلت...سامي عارف بروقها كيف♡...مشى جاب مشط...قرب منها وقعد جمبها في السرير...بقي يمشط ليها في شعرها...وبهبش فيهو براحه وبحنيهه كدا♡....ريم كانت بتشعر بأمان وراحهه كل م يقرب منها سامي♡بس اللهفه بتاعت البدايات دي زي م قلتا قبل كدا م حب!احيانا بتكون حاجه كدا مستعجله مننا عشان ننسي علاقه قديمه!ع العموم دا استغلال وحاجهه م ظابطه نهائي..ودا ال كان مخوف ريم!م عايزه تأذي سامي...بتحاول تبعد منو بس هو بقرب اكتر!....جا الدكتور داخل عليهم...ابتسم ليهم...سامي قام من جمب ريم...مشي ناحيه الدكتور وسلم عليهو....

---: ماشاء الله...الليله المدام مزاجها رايق شويه...كيف بقيتي!
ريم: الحمد لله
سامي(بابتسامه): منفسنه..وما عايزه تقتنع انو حتتعالج وترجع تمشي زي الاول
---: شوفي...لازم يكون عندك امل وعزيمه انك ح ترجعي تمشي...اتفائلي ي ريم...تفائلوك دا اول خطوه في طريق علاجك
سامي: اسي وضعها حاليا كيف
---: كويسهه...بس من فتره لتانيه ح تشعري بصداع شديد وراسك ح يلف..وارهاق..وحتلقي صعوبه في النوم برضو...دا شي طبيعي بسبب ضربه الراس...بمرور الزمن ح يخف
سامي: م ممكن نعمل ليها العمليه هنا!
---: انا بنصحك انك تسفرها بره...مثلا المانيا...نسبه نجاح انها تتعالج وترجع تمشي كبيره اذا مشت هناك صدقني...السلسله الفقاريه اتأذت شديد من الوقعهه...دا سبب الشلل...بس الحمد لله انو لمن وقعت ماف زول حركها...لانو كانت ح تتأذا اكتر...بس م تخافي ي ريم...ماشاء الله الاستاذ معاك طوالي وربنا يحفظكم♡
................................
الدكتور طلع منهم...سامي مشي ناحيه ريم...قعد جمبها وبقي يعاين ليها...كانت صاره وشها ومدبرسه...م شال عيونو منها♡وعارف الحركهه دي بتوترها...عايز يطلعها من جو الاحباط ال هي فيهو...بقت تعاين ليهو من لحظه للتانيه...وهو بضحك.....
ريم: ممكن ي انسان م توترني!
سامي: اعمل شنو م بقدر م اعاين ليك♡انتي حاجه جميله وزابطه م بقدر اشيل عيوني منها♡...ارح ناكل...السندوتشات دي من قبيل قاعده لمن بردت بسببك