مشيت مع اختي سوونة الصباح للمدرسة 💓 طبعا اتظبطتا عشان ما افضح الانسه واتجيهتا ومشينا نقابل المديرة .. قعدتني وقالت لي سونة امشي انتي الفصل بعد كده .. وقبلت علي .. سندس ابوكم وين!
نحنا من سجلتو بتكم دي وكل مرة يجي اجتماع اباء ينقول ليها ابوكي وين بتقول مسافر وعندو شغل ومافاضي واعذارها كتيرة .. حتى القروش بتجي تدفعها امك بس .. عايزين نعرف ابوكم وين! ..
انا: ابوي مسافر
المديرة: بجي بتين طيب !!
انا: انتي يا حضرة المديرة .. امي بتجي وكل اجتماع بتحضرو . بس الفات ده كان عندها ظرف وانا جيت افهم الحاصل .. ابوي ده ما فاضي ..لو سمحتي وريني سونة عملت حاجه يعني!
المديرة: يعني مصرة ما تردي برضو زي اختك !!
انا: ياريت توريني اختي عملت شنو !!
المديرة: طيب .. اختك قبل يومين كانت بتلعب مع صحباتها .. و وحدة من البنات كانت بتحكي زي حكاوي الصغار العادية دي .. ابوي جاب لينا امبارح كيك حلوو بالشكولاته .. وقال لي حافسحك الليله .. وكل البنات شاركو في الونسه .. و اي وحدة بقت بتوري في التانيه ابوها بدلعها كيف .. الا سونة قااعدة سااكته بس .. ولما وحدة سالتها انتي ابوكي وين ..! فجاة اختك قامت وكوركت وقالت ليهم ماعندي ابو ما تسألوني .. وجرت دخلت تحت الكنبه وهي بتبكي .. انا لاحظتا انو اختي مستواها اتدهور .. رغم انها كانت شاطرة وماشه كوويس في دراستها .. بس سونة فاقدة حاجه .. والفقد ده مأثر على حالتها النفسيه .. بقت عدائية شديييد اقل حاجه بتكورك وبتنهر صحباتها وبقت بتستفرد بي روحها وبصراحه انا خفتا عليها من التوحد .. حتى مرات ما بتحضر النشاطات زي الطالبات .. بتكتفي بي القعاد بعيييد .. وبتحب الانفراد .. حتى اختك سمر ما زيها مستواها احسن .. بس ملاحظين لي سونة بقت بتبعد من صحباتها .. يوم عملوا فطور في المدرسة وما اظن هي كلمتكم بيهو.. قبل ما يتفقو على اليوم كل الفصل .. اي وحدة كانت بتقول حتجيب معاها شنو ! .. سونة طوالي قامت وقالت ليهم انا مابحب الفطور الجماعي !! وما جات .. ومتاكده انكم ماعارفين انها ماعايزة تشارك .. وقبل كده حصل موقف تاني .. زميلاتها قالوا يفتو سندوتشاتهم مع بعض وياكلوها .. وهي برضو رفضت .. ومشت بعيد فتحت حشوتها وبقت بتاكل.. قامت وحدة من البنات قالت الا تشوفها حاشيه بي شنو .. ومشت من وراها قلعت حشوتها وفتحتها .. ولقتها عيشه بي سكر بسيييط .. يعني شبه عيشه بايته وفاااضيه !! .. والبت طبعا اخدتها فرصه للمكاواه وبقت بتغيظها وتطلع لسانها لي بره وتقول ليها : سونة ما عندهم اكل في بيتهم .. سوونه ماعندها حشووة .. يابنات سونة ابت تفت معانا عشان ما عندها حشوة.. والبنات اتمسخرو وضحكوا .. وطبعا اختك جرت وخلت العيشه .. واليوم كلو قعدت بدون اكل .. الضغط النفسي اثر عليها شدييد .. ومن جهت ناس بيتكم يا سندس اهملتوها . يعني اخر مرة قعدتي معاها بتين ! واخر مرة طلعتوها رحله ولا منتزه ! واخر مرة ابوك اتونس فيها معاها بتيين !! ..
