شباب ولكن

الحلقة العاشرة

شباب و لكن!

الحلقه العاشره💖

رنا : دزيتلها  حواء رساله تو ترد

هديل : بلكي راقده ، المهم احكيلي شن قصته سي حمزه هذا

رنا : م فيش قصة شفته يوم شحات كنت منفصله بكل هضك ليوم لي ماشيه بلغصب وهوا خبط فيا و بعدها فتحت سيارته بلغلط هضك اليوم و طلع خو حواء ، خسارة ما حكيتلك-_-

هديل : تي نسيت

رنا: خلاص يوم صاحبتي دايره لمه مشيت انا و صاحبتي عندها اختها لصغيره كانت عازمه صحباتها ومن ضمنهن اخت حمزه الي هيه حواء

هديل :و باه كيف عرفتي انها اخت حمزه
رنا : تقول مش حاكيتلك ، م قتلك انا فلمه مكنتش نعرفها بس صدفت ونحن طالعات انا و حواء حكينا و انا تلخبطت فسياره و عرفته خوها
هديل : يييييييه رايحه ننسي خلاص بنمشي نكلم انا من مبدري يرن

رنا : حتي انا سامي رن عليا كذا مره منبيش نرد نخاف نضعف :(

هديل : ربي يصبرك ي خيه يضرب الحب شو بيذل

رنا : هيييييي البنت دزتلي رساله وانا فوني عصامت

هديل : وريني شن كتبت

رنا : دازتلي " هايات ناني ، خويا تعب شويا و شالوه للمستشفي بس توا احسن اهو قاعدين نهدرزو حذاه ، شكرا علي سؤالك ، و قولي لهديل مش ناسيتك تو نكلمك بكرا ههههههههه سلام"

هديل : ههههههههههههه ي خيه برغم انها صغيره في العمر بس عقلها كبير وتخش القلب
رنا : اها كيوت بكل ، انا نموت ونعرف قصة خوها حمزه هض غامض بكككل خاطري نفهمه
هديل : شن مالك و ماله ، خلاص اسكتي سلومه يرن

رنا : مالت عليكي و عليا الي نحكيلك -_-
و قعدت هديل تكلم و رنا حطت راسها ع المخده و تفكر في حمزه خاطرها تعرف ليش ناقص و لحيته طويله و ليش داخ و كل هالافكار في راسها من التفكير نعست و رقدت .

**********************
سالم روح للحوش و گان مش فاطن التلفونه علقه فشحن و لقاها رساله استغرب يحسابه من عرم البنات لي يعرفهن -_- بس هوا فات البنات :/ فتحها لقاها من بشري ، قراها وقعد يضحك برغم من انه الرساله كلها هزيبه بس فرحاته بكل ، سيب التلفون و طلع للمطبخ  " طبعاً سالم عنده اختين و حده متجوزة ووحده مازالت تقرا فثانوي وعنده اخيين و هما لثنين متجوزين وشاقيين بحياتهم "

هناء : سلملم
سالم : منحبش الاسم هضا -_-
هناء : اسكت -_- انا نحبه

سالم : شن اديري واعيه لعند توا !

هناء : مكسده بككككككككل كملت امتحاناتي و نرجي فنتيجه ، و باتك و أمك تعبولي نفسيتي

سالم حس بأخته انها مضايقه : امك و باتك ربي يهديهم ، امتي تطلع نتيجتك ؟!

هناء : كل أسبوع يقولو لاخر بس مبدري نور صاحبتي رنت قالت كلمت الابله و الاسبوع الجاي اكيد