مابعد الكره

٣

ما بعد الكره
البارت الثالث
…زهراء جهاد

لا شيء يشبه شيء ؛ ولا أحد يعوّض غياب أحد أشياؤنا المختلفة إن ضاعت .. ليس لها بديل !!
_________________________________
ضلينه للضهر حسبه تودينه وحسبه اتجيبنا وحايرين بزمانه شنسوي وشنو الحل وين انروح ومنو النه يشيل الحمل عنه

عمو صالح اجه وعرف بالموضوع بس هو الرجال شيسوي هم برگبته عايله وحالته ميسوره كوه مدبر عيشته

تقريب الساعه 11 ونص اندگت الباب طلعت زينب شفناها اتاخرت بوكفتها بالباب طلعت رونق وراها دشوف منو الاجه

اني واكفه بالمطبخ واباوع من الشباك وره دقايق دخلن ودخلو وياهم اربع زلم اثنين يطلعون بعمر ابويه واكبر

وثنين شباب دخلو للخطار اجت رونق اليه ودموعها بخدها وجها بي حيره اتلكيتها

ورده » ولج شكو منو ذوله وليش دخلتوهم جوه

سكتت ومجاوبتني بس تبجي بصمت

رونق » رووونق احجي شبيج شكووو

ورده »  ذوله عمامنه خوان ابويه جوي هسه

ورده  » وشيردون جوي من بعد هلسنين

رونق » مادري ورده مادري. امشي انطب عليهم

مسحت ادموعها ومشينه فتحنه الباب ودخلنه صارو جدامي صدگ يشبهون ابويه هواي هواي شبه بينهم.

كلت السلام عليكم وكعدت يم زينب ورونق كعدت من ذيج الجهه صارت زينب بنصنه وهمه مقابيلنه

زينب حاطه ايدها علئ وجها وتبجي من شفتها هيج عبراتي اتجمعت بصدري
كسر السكوت عمي وكال

عمي رسول » شوفن بنياتي اني عمجن الجبير رسول وذوله ولدي شاكر ومحمود

اشر ع الشباب الثنين يطلعون عمرهم العشرينات

وهذا عمجن حسن احنه صح جان عدنه خلاف ويه ابوجن الله يرحمه وخلاف قديم بس الضروف حكمت ان نتفارك ونگطع صلت رحمنه

بس هذا الشي ما منع اخبار ابوج. توصللنه جنه ندري بي وين كاعد وشعنده خلفه وشنهو اموره بس البعد جان احسن النه الطرفين

وخبر وفاته هد حيلنه وكسرنه بس منگدر نعترض علئ حكم رب العالمين انتن بنياتنه وعرضنه وسترنه وصفيتن وحدجن وحنا ما نرضئ نعوف عرضنه بديار الغرب

واني متاكد لو ابوجن عايش جان وصاني بيجن وهسه انه جاي اخذجن يمي وبيتي واعتبرجن امانه اخويه 

  معززات امكرمات واحنه اهلجن ومالجن غيرنه فشتكولن يابه.

حجت زينب » عمو انت علئ عيني وراسي وفتهمتك كلش زين بس مشكور ورحم الله والديك احنه عايشين اهنا ومستقرين ابويه وصانة بنفسنه ونعرف اشون نحافض علئ رواحنه