لعبة الحياة (رواية ليبية )

حلقة 15

#لعبة_الحياة
.
.
.
.
الحلقة الخامسة عشر
،
.
.
.
طلع حاتم وغير محمود دبشه و خذا دخانه وطلع لقا حاتم مقعمز يدخن

محمود >> احكي وفكني من المقدمات

حاتم >> انا متجوز
محمود بحت فيه >> كنك ما عزمتنا ؟
حاتم>> يسترلي بيتك راه من ربي الموضوع متعقد مافيش داعي للهزوه

محمود >> تحسابني نبصر معاك نحكيلك جد ؟؟؟ جاي تقولي متجوز بدون اي مقدمات ؟ قتلنا بنجوز وقلنالك لا ؟ عليش جاي تقوللنا توا شن بنديرو نديرولك عرس ثاني ؟

حاتم>> بتفهم القصة ولا نصبي نرقد ؟
محمود>> لا احكي

حاتم >> من حاجة ست شهور هكي درت عركة مع واحد اجنبي و طبعا وصل لموضوع للشرطة وعلي اساس يبو يرحلوني ويردوني بنغازي
وانا كنت خلاص مازالي شويه ونكمل قرايتي يعني سنه وشويه ومعقوله يريح لي قريته كله وتعبت فيه الاربع سنين لي فاتن عشان عركة تافهه
سكت شويه و بعدها كمل كلامة

قبل ماندير العركة كنت متعرف علي وحده اجنبيه كانت تقرا معايا وصديقتي كانت
لما حكيتلها القصة قالت لي انا نكفلك ونطلعك من هنا بس بشرط تجوزني
وانا من كثر الورطه ما سالتهش حتي ليش ؟ او شن الغرض ماهو الاجنبيات عايشات حياة المتجوزين بدون عقد زواج بس الكلام هضا كله مافكرتش فيه مافكرتش غير اني بنطلع من هنا ونكمل السنه وشويه لي مازالن و نروح

وفعلا كفلتني وطلعتني بعد ما وقعتني علي اوراق ماكنتش عارفهن شنو

واجوزنا وقلت عادي شويه ونتفاهمو ونطلقها ونروج بلادي ولا من شاف ولا من دري !

محمود >> تفكير ولد كلب مشاء الله ذكاء خارق ؟
باهي بعدها شنصار ؟؟

حاتم>> قعدنا اول شهرين مع بعضنا عادي وعادي كاننا مصاحبين تطلع وتخش ونمشو لجامعة وعلاقة عاديه
لعند يوم جت قعمزت وقالت لي اني نبي نطلق

وفعلا فرحت وما صدقتش خبر

بس الصدمة كانت هنا !
الصدمة انها كانت موقعتني علي اوراق تنازل علي كل قرش معايا والسياره لي باسمي غادي برضو
وكل شي و يا نطلق ونخسر كل شي يا تقعد علي ذمتي طول العمر

تعاركنا وقتلها تشرط الاوراق وكل حد يعدي في حاله وبعد مناوشات عدت بلغت اني انا نضرب فيها وبحكم ان فيه حكم ضدي من قبل فالعركة لي درتها واني انا عربي وهي بنت لبلاد
ف علي طول صدقوها بدون حتي تحقيق
وساومتني يا نطلق يا ننحبس

وطلقتها وخسرت كل شي
فلوس الجامعة والسياره وحتي الايجار طلعت منه عشان ما فيش كيف ندفع
سكنت في شقه مع خمس انفار بمبلغ بسيط اخر شي مشيت لسفارة و قتلهم يرحلوني ورحلوني

محمود >> فيلم هندي
والنبي تحكي من جدك ولا تبصر.

حاتم>> اوكي بكل
محمود>> كان القصة قصة فلوس محلوله
حاتم>> القصة قصة ان عليا حكمين
و ترحلت يعني كل شي راح مني ومعش نقدر نرد
وانت عارف خوك وعارف امي
اقسم بالله باتي حايجيه القلب لو سمع