جيت مابيك تحقرني جيت أبيك تعز شاني

18

ناولته وأنا احس الدنيا..سوده بوجهي ..طالعت محمد بحقد ..هالولد متى يفهم ..رجعت بسرعه
شفت مرة ابوي بوجهي تتطالعني وعلى وجهها
ابتسامه كلها خبث قالت : شمسه ابوتس يدري
بذا الموعد ولا من وراه

حسيت بقهر ..من كلامها طنشتها ورحت لخالتي
المطبخ ..وأنا باقي ..تحت تأثير.. الصدمه وبعد
فيني خوف من خبث..أم محمد أكيد ماراح
تفوت هالفرصه.. وتقول لابوي الله يستر طالعت
خالتي الي همست لي : عسى ماشر وجهتش مايبشر
بالخير
عضيت شفتي وأنا متوتره وبسرعه سحبت صحن ووقلت وأنا اصرف نفسي : بغرف لامي مابقي شيء
على موعد دواها وبنام من الفجر صاحيه

ام سميره بشك : فيتس بلى ي شمسه وسكتت وهي تشوف ضرتها أم محمد واقفه عند الباب همست عرفت الحين عوقتس الله يعطينا خير ذا الليله

شمسه بسرعه غرفت لامها ويدها ترجف
أخر شيء توقعته انها تشوفه ..الليله ...فيها قهر منه
ومن تشكيكه بأخلاقها ....أخذت الصحن ...وهي تحسه بيطيح من يدها مرت من عند حرمة ابوها وقفلت عيونها وهي ودها تصفقها بالي بيدها
من كلامها السم :هالمرة غيروامكان الللقاء ماهو بمقلط شوية رمانسيه ي بنت

طالعت خالتها أم سميره ...الي اشرت لها بيدها
تروح تدري فيها ...خايفه عليها تعلق ..معاها
بسرعة راحت لغرفة امها ...ودخلت وقفلت الباب
حطت الصحن على الطاوله وهي تطالع ..امها
الجلطه الاخيره هدت حيلها ...قربت منها وهمست لها والغصه بصوتها: يمه ي عيوني الحين موعد عشاتس عشان تاخذين الدواء
شافتها فتحت عينها ابتسمت لها بحب ...
وهي تقرب ..الصحن منها ..وتأخذ الملعقه سمت بالله وبدأت تأكلها ...بعد مأكلتها جلست تطالعها بحزن ..تمددت جنبها وهمست لها: يمه احبتس بالحيل دمعه نزلت منها مسحتها بسرعه قبل تشوفها أمها...
@
@
@
@
اصايل
مسكت على رأسي وأنا احس بالم قوي بالحيل
مديت يدي ..لدرج ادور حبوب ..صداع
ماحصلت ..بس لفتني شيء ..مثل الظرف بفضول
مديت يدي وفتحته ..شفت فيه ورقه وكانت ثقيله طاح منها ..سيدي بسرعه ..أخذته وبرجعه..بس لفتني الكلام المكتوب على الورقه... وش رأيك افضحها ...بس كم تعطيني قبلها...بينا الوو ي
حلوو هذا رقمي انتظرك ..رجعت الظرف مثل
ماكان ..وأنا أفكر ي ترى مين يفضح ..وبعد مين
الي مرسله هالسيدي ..آه يا مصعب كل مره اكتشف شيء أكبر ...الله يستر
قفلت الدرج وقفت ...بروح اشوف اي مصيبه
تخفف عني هالصداع ..لفيت الجلال علي ونزلت
وأنا ادور بعيوني شيخ الغفر الي بالصاله ماحصلتها غريبه اليوم ماهي مسنتره مثل العاده
رحت للمطبخ.. حصلت الخدامه تنظف قلت بتعب : فيه حبوب عندي صداع ذبحني اشرت لي على الثلاجه
فتحتها وأخذت وحده ابتسمت لها يوم شفتها ماده
لي بكوب المويه ..أخذته منها ...وشربت وشكرتها
وطلعت أول ماجت عيني على التلفون قربت
بتردد وأنا خايفه ...تلفت يمين ويسار ... مافي أحد
هذي فرصتي مدام مصعب ماله أثر أبد ماراح تتعوض ذي الفرصه ..بذات من يوم مافصل الحراره عن تلفون الغرفه ..قطع عني أخر أمل ..بسرعه قربت منه ورفعت السماعه ..دقيت رقم بيتنا وأنا عيني على الباب ومتوتره حدي
خايفه من مصعب يدخل اي وقت ..أخذت التلفون بيدي وحركته من مكانه وخليت عيني من الدريشه الزجاج ..ايه كذا حلوو اشوف أول مايدخل من البوابه ..مافيني على مشاكله بس حسيت روحي ردت يوم سمعت صوت أمي : الوووو
قلت بعصه: يمه
بفرحه : يجعلني فدوه يمه اخيراً ي اصايل دقيتي علي حرام عليتس لا حس ولا خبرحت جوالتس مقفلته شمسه تقول ليه يمه تسذا قلبي مخلوع عليتس أفكر بتس واقول بنتي ماتغيب إلا بها عوق بس وين ابوتس يفهم ماغير منشغل بأم الولد
كنت اسمع عتبها علي ..وأنا دموعي تنزل وش اقولها مافيني اتكلم قفلت عيوني وأنا اسمعها تقول: الو الو يمه اصايل تسمعيني
حاولت امسك نفسي وقلت : ايه يمه اسمعتس زين
اخبارتس وأخبار خواتي وش مسوين طمنيني عنكم
كلكم