أول ماوصلت بيت أختها وقابلت أمها وخواتها سلمت عليهم بشوق ...يالله من متى عنهم
حست بفرحة غمرت قلبها ..وهي تشوفهم قدامها
قربت من سميرة وضمتها وهي تصيح معاها
كلن فيهم بقلبها جرح ....
طالعت شمسه يوم قربت منا وهمست :خلاص شوفووا الاطفال وشلون يطالعونكم وبعدين طلبتس تجين عشان تهوني عليها لاتزيدينها
طالعتها وطالعت عيال سميرة وخواتي الصغار
ابتسمت وأنا امسح دموعي ...
وأشرت لولد سميرة يجي ...اخذته وضميته
وطالعت سميرة يوم قالت:وش مصيرنا بعد وافي والله اني شايله هم هذولا الصغار على الي يسويه الله يهديه ويغفر له بس والله كنت احس بأمان وهو حولنا
عضيت شفتي ...وهزيت راسي عيبنا ي بنات
بدريه قلوبنا تسيرنا ..مهما يسوون فينا رجالنا
ليت طلعنا لشمسه قويه ..وأبد ماهي مثلنا
تدوس على قلبها لو بيحط من كرامتها
بلعت ريقي وقلت :ماعليه ربي يطلعه لكم بالسلامة
بس انتِ تصبري وخليتس قويه
وافي ربي يفك عوقه
وابتسمت لشمسه يوم قربت الضيافه وقلت : اوه شموس لا تحسسيني ضيفه يقال آلحين
شمسه وهي تضحك : اليوم بس انتِ وجهتس بس بعدها بكرفتس كراف ...
صبت القهوة وناولتها الفنجان وقالت الحين اعطينا اخبارتس ي حلووة والله انتس فقده ي الدوبه
اصايل أخذت رشفه وقالت بغصه : اخباري تسركم
حيل وصغرت عيونها ماهو دوبه شوفة عينتس سويت رجيم ونحفت
شمسه طالعتها وقالت : فعلاً نحفتي عن قبل
بس ماهو واجد باقي ينقال عنتس دوبه
اصايل بقهر : الله يأخذ العدوو حرام عليتس وزني كان بالسبعين والحين بالستينات
سميرة ابتسمت وقالت : القصر له دور مايوضح عليتس مهما نحفتي وبطنتس يوم كبرت لها دور بعد
اصايل طالعتها بصدمه وبنفس الوقت فرحت يوم شاركتهم : من أول ارتجي تتكلمي معي ويوم تكلمتي كذا وجعتي مشاعري حرام عليتس والله
أم سميرة قالت بقلق : يمه تتابعي مع الدكتوره وتشوفي وشلون وضع هالحمل ولا تسذا مخليتها على البركة
اصايل نزلت رأسها لو تدري أمها انها نزفت مرتين
وتعرضت للتسقيط أكثر من مرة
شمسه حست ان بها شيء قالت وهي تمد لها صحن الحلا :ذوقي بس يقال اختس سلمى مسويته لسميرة عز الله زادت ضيقتها
سلمى رفعت عينها عن الجوال وقالت متذمره : حرام عليتس وطالعت سميرة بالله ماعجبتس وأكلتي منه
سميرة ابتسمت : ماقصرتي ي بعد قلبي طعمه حلوو
فاديه وهي تفشلها : تسذب عليتس والله ماذاقته
سلمى قربت من اصايل وهمست لها : شوفي انتِ
كنتي تطقيني كثير بس الحين بأخذ حقي منتس
مدام حامل ومافيتس حيل تردين الطق بس في أمل اسامحتس إذا بردتي خاطري ب فاديه وفصلتي عليها طقطقه مثل ماتسوين معي
أنت تقرأ
جيت مابيك تحقرني جيت أبيك تعز شاني
Romanceالروايه منقوله🥀. اتمنى تعجبكم🥀. الكاتبه : &نـــونـي بنت الجنوب &
