Ito ang ikaunang beses na pakikinggan ko ang sigaw ng puso ko
Sa pagkakataong ito, nais kong piliin ang sarili ko
Nais kong pakinggan ang daing nitong puso kong napapagod na
Nais kong pansinin ang bigat ng mga problemang pasan ko sa araw araw
Ako naman itong pakinggan niyo
Ako naman itong intindihin niyo
Sa akin naman kayo magbase ng desisyon
Ako naman ang isipin ninyo
Pagod na rin pala ako
Akala ko, mas mabuting isipin ang ibang tao
Ibang tao muna bago ang sarili ko
Problema muna nila bago yung sa akin
Tutulong ako kahit alam kong sa huli, ako lang iyong mahihirapan
Pagod na rin pala ako
Pagod na rin naman ako
Hindi lang ikaw
Hindi lang kayo
Sa ikaunang beses na pakikinggan ko itong puso ko
Yayakapin ko itong sakit na dinadama ko
Hahagkan ko ang pait at pipilitin kong bumangon
Magpapahinga lamang ako
Hindi ako katulad niyo na pag umabot sa puntong napapagod na
Aalis at hindi na muling babalik
Lalayo at hindi na lalapit
Pare pareho lamang tayong napapagod
Subalit, hindi pa rin ako katulad ninyo
Hindi ako kailanman lalayo
Hindi ako mangiiwan
Magpapahinga lamang ako
Palalayain ko ang aking sarili mula sa bisig ninyo
Dahil sa pagkakataong ito,
Kailangan ko ang sarili ko
