مازلت ملكة فى بيت أبى
-----------------------------
الحلقة التاسعة عشر
------------------------#بقلمى_كوثرمحمد
---------------------------
عبدالرحمن:- شرط ايه
صفاء:- يعتذر الاول من عزت
عبدالرحمن:- هو دا شرطك
صفاء:- ايو هو دا
عبدالرحمن:- ماشى اللى يريحك
ويخرج عبدالرحمن ليرد على رامى
رامى:- بلهفة...... ها يا عمى قالتلك ايه
عبدالرحمن:- موافقة بس بشرط
رامى:- وانا موافق
عبدالرحمن:- مش لما تعرف الشرط الاول
رامى:- اتفضل يا عمى قول
عبدالرحمن:- يسكت
رامى:- ها يا عمى قول
عبدالرحمن:- شرطها انك تعتذر من عزت
رامى:- ايه 😏 نعم هى اتجننت ولا ايه
عبدالرحمن:- بغيظ....... هو دا شرطها وليك حرية الاختيار
رامى:- بتفكير....... ماشى يا عمى وانا موافق
عبدالرحمن:- خلاص يبقا اشوفك بعد ما تعتذر من عزت
رامى:- يعنى ايه مش هتكلم معاها دلوقتى
عبدالرحمن:- لأ اما تعتذر الاول
رامى:- بغيظ....... ماشى يا عمى حاضر عن اذنك
عبدالرحمن:- اتفضل
....... ويذهب رامى وتخرج صفاء من غرفتها
عبدالرحمن:- طبعآ سمتعى كل حاجه
صفاء:- ايو يا بابا سمعت
عبدالرحمن:- وبعدين هتعملى ايه...... فى ايه فى دماغك
صفاء:- ولا حاجه هو اللى هيعمل
عبدالرحمن:- اول مرة اكون مش فاهمك
صفاء:- وهى تقبله فى خده.......... هتفهم كل حاجه فى وقتها
----------------------------------------------------------
نروح عند رامى بعد ما طلع على شقتهم
فى غرفة رامى وهو رايح جاى مثل الاسد المحبوس
رامى:- لنفسه........ ماشى يا صفاء ماشى ان مطلعته كله عليكى مابقاش انا رامى...... قال عيزانى اعتذر قال طاااااايب يا صفاء اما اشوف اخرت دماغك دى ايه
....... فى الخارج عند رامز ورضوى
رامز:- هو فى ايه ماله المجنون دا
رضوى:- مش عارفة والله يا ابيه..... من ساعة ما طلع من تحت وهو عمال يخبط ويرزع كدا
رامز :- اكيد صفاء قالته حاجه وهو معرفش يعمل ايه........ انا عارف دماغه دى فيها ايه
رضوى:- طيب احنا هنسيبه كدا
رامز:- محدش هيعرف يتكلم معه وهو فى الحالة دى...... تعالى يلا ارجعلك على اللى انتى عايزاه
رضوى:- ماشى يلا
-----------------------------------------------------------
ونرجع تانى عند صفاء كانت خلصت الغدا ومر وقت طويل
صفاء:- يلا يا بابا الغدا جاهز
عبدالرحمن:- حاضر يا حبيبتى جاى....... تسلم ايدك يا قمر
صفاء:- بالهنا والشفا يا حبيبى
ويدق جرس الباب
صفاء:- يا ترا مين
عبدالرحمن:- خليكى انتى ليكون حد من ولاد عمك
..... ويذهب عبدالرحمن ليفتح الباب
عبدالرحمن:- بعد ما فتح....... اهلاً اهلاً بحبيبت قلبى
مكة:- جدو حبيبى وتحضن جدها
ولاء:- طيب مش هتسلم عليا ولا ايه يا بابا
عبدالرحمن:- وهو مازال يحمل مكة...... يسلم على ولاء .....اعملك ايه ما انتى اللى بتغيبى عننا وفين وفين على ما بتيجى
ولاء:- وهى تحضن والدها......... غصب عنى والله يا بابا البيت والشغل ومكة وخدين كل وقتى
وتدخل تسلم على صفاء
ولاء:- وحشتينى اوى يا صافى
صفاء:- وهى تحضنها...... انتى اكتر يا لولو...... امال فين احمد
يأتيهم صوت من على الباب
انا اهو
صفاء:- تسحب حجاب بجوارها...... اهلاً اهلاً يا ابو حميد
احمد:- وهو يضع حقائب بيده...... ويسلم على عبدالرحمن وصفاء...... ليكم وحشة والله يا جماعه
عبدالرحمن:- وانتوا اكتر والله
صفاء:- اظاهر يا ولاء حماتك بتحبك اوى. ..... الاكل جاهز يلا هجيب باقى الاكل واجى
احمد:- والله يا صفاء حماتى انا اللى بتموت فيا الله يرحمها
الجميع :- الله يرحمها
ويجلس الجميع لتناول الغداء
صفاء:- هو ابيه رامز كلمكم ولا ايه
ولاء:- يكلمنا ليه
صفاء:- اصله هيشترى شبكته النهارده
ولاء:- بتعجب....... شبكته هو رامز هيشبك
صفاء:- اه
ولاء:- هيشبك مين
صفاء:- هيشبك منار صحبيتى
ولاء:- بجد والله منار بنت حلال وتستاهل
احمد:- ورامز كمان يستاهل كل خير بعد كل اللى شافه من طالقته
عبدالرحمن:- ماتجبش سيرتها يا احمد الله يخليك....... خلى اللقمة تتبلع
احمد:- بضحك....... والله عندك حق يا عمى...... خلينا فى الاخبار الحلوة..... احنا كمان عندنا اخبار حلوة
صفاء:- خير اخبار ايه
ولاء:- انا حامل
عبدالرحمن وصفاء:- الف مبروك ربنا يتمم لك على خير
احمد:- يارب...... الخبر التانى بقا اننا هنقعد معاكم هنا شوية على ما الجنين يسبت
عبدالرحمن:- بفرحة....... دا انتوا تنوارو
صفاء:- حلو اوى اه الواحدة تلاقى حاجه تسليها شوية....... وخصوصاً البت موكة العسل دى
ولاء:- موكة دى يا ختى اللى هطفشك من هنا وهتخليكى تقولنا يلا عـلى بيتكم ههههههههه
عبدالرحمن :- بضحك...... محدش ليه دعوة بحبيبت جده
احمد:- طيب الحمدلله الواحد كدا هيعرف ينام كويس
الجميع يضحكون على كلام احمد........ وبعد ما انهو الطعام جلس احمد مع عبدالرحمن...... وجلست صفاء مع ولاء
وبعد وقت من الكلام الكتير .......... حكت صفاء لولاء كل ما صار مع رامى من اول ما شافته عند منار لاخر ما قاله له والدها
ولاء :- بضحك...... احسن يستاهل...... وانتى هتعملى معه ايه
صفاء:- هقولك
....... هنعرف بعدين
-------------------------------------------------------------
فى شقة رامز بعد ما رامى هدى من التفكير
رامز:- رامى انت نمت ولا ايه
رامى:- ادخل يا رامز
رامز:- مش هتتغدا ولا ايه
رامى:- مليش نفس اتغدوا انتوا
رامز:- طيب براحتك.... بس احب اقولك ان اللى انت بتعمله دا مش هيجيب ناتيجة مع صفاء
رامى:- تقصد ايه مش فاهم
رامز:- انت واخد الموضوع تحدى.... ودا غلط.... المفروض انك عايز تعتذر من صفاء..... بس انت بتتعصب بسرعة.... فلازم تهدى اعصابك شوية وتكون هادى قدامها علشان تقدر تتكلم معاها
رامى:- انت متعرفش الهانم طالبة ايه
رامز:- هتكون طالبة ايه اى حاجه هتهالها
رامى:- دى مش عايزه حاجه اشتريها
رامز:- امال طالبة ايه
رامى:- عيزانى اعتذر من اللى اسمه عزت دا قريب منار
رامز:- بضحكة مكتومة....... والله معاها حق...... انت غلط اوى فيه... دا انت كان ناقص تموته
رامى:- يعنى كنت اعمل ايه انا مقدرتش امسك نفسى اول ما طلب ايديها الهانم
رامز:- والله اى واحد فى مكانه شاف وحدة عجبته هيعمل كدا
رامى:- خلاص بقا انت كل شوية هتقولى الكلمتين دول
رامز:- وهو يرتب على ضهره....... اهدا كدا واسمعنى..... اللى انت عملته مع صفاء مكنش من المفروض انك تعمله
رامى:- بندم...... عارف وندمان بس والله كان غصب عنى
رامز:- انا عارف انه كان غصب عنك بس المفروض بعد ماهديت كنت فكرت تانى ورجعت صلحتها فى وقتها مش جاى بعد كذا شهر وعايزها تقولك شبيك لبيك
رامى:- كل الكلام دا قالهولى وليد صاحبى واكتر منه كمان...... انت متعرفش انا كنت عامل ازاى هناك انا كنت زى الميت لا كنت باكل ولا بشرب ولا حاسس بأى حاجه خالص وكانت دماغى غايبة عن الدنيا..... كنت هتشل من كتر التفكير لحد ما جالى وليد واتكلم معايا وفضل يحللى كل حاجه وحطلى النقط على الحروف ووضحتلى الصورة صح
رامز:-وانت كنت مستنى وليد هو اللى يوضحلك الصورة..... كل مرة كنت اكلمك فيها واحاول اوضحلك الامور وانت مكنتش بترضا تسمعنى وتقفل معايا فى الكلام
رامى:- بصوت متحشرج من البكاء...... كنت بقول لنفسى انك عايز تدافع عنها علشان حاسس بالذنب اكمن مراتك هى اللى بعتتلى الصور
رامز:- خلاص سيبك من السيرة الغم دى وقوم اغسل وشك وتعالى اتغدا معانا... دا انا عامل شوية عك انما ايه تلبك معوى عالطول
رامى:- لا وعلى ايه انا اطلب اكل من برا احسن
رامز:- لا ابدآ والله لازم تاكل منه اشمعنا البت الغلبانة اللى برا تاكل منه وانت لأ...... يلا يلا علشان نلحق نجهز ولا انت ناسى انى نازل اجيب شبكتى النهاردة
رامى:- لا يا خويا مش ناسى وكمان هقابل اللى اسمه عزت دا كمان
رامز:- طيب يلا قوم وحصلنى علشان تشوف العك بتاعى
........ ويخرج رامز وترك رامى لوحده..... وبعد وقت يخرج رامى ويتغدا معهم
رامى:- والله عامل اكل حلو يا رامز..... اتعلمت فين
رضوى:- هو مين دا اللى عامل الاكل....... انا اللى عاملة الاكل هو بس كان بيشرف عليا وعامل فيها الشيف شربينى
رامز:- مش انا اللى بقولك تعملى ايه وتحطى ايه
رضوى:- اه بأمارت ما كنت هتخلينى احط سكر بدل الملح..... الحمدلله انك هتتجوز علشان ترحمنى شوية
رامى:- بضحك عالى.......... انا مش ق ا د ر ا م س ك ن ف س ى (انا مش قادر امسك نفسى) ههههههههه
ويظل الحال هكذا حتى ينتهوا من الطعام
..... بعد وقت ليس بقليل يجهز كل من رامز ورامى ورضوى
رامز:- انا هستناكم تحت عند عمى على ما تخلصوا
رامى:- انا خلصت خلاص
رضوى:- وانا كمان خلصت
رامز:- طيب يلا بينا..... ويارب تكون صفاء كمان خلصت
وينزلوا الثلاثة الى صفاء
بعد ما رامز ضرب الجرس
فتحت مكة الباب
مكة:- خالو يامز وخالو يامى وياضوى يا جدو
رامز:- وهو يحملها...... اهلآ بموكة هانم..... عاملة ايه
مكة:- كويسة
عبدالرحمن:- ادخلوا يا ولاد وقفين على الباب ليه
رامز:- بنسلم على الانسة موكة
رضوى:- طيب ممكن تداهانى بقا انت خلاص سلمت عليها
رامى:- اسلم انا الاول وبعدين خديها
احمد:- يا عم انت وهى سلموا علينا وبعدين اتخانقوا براحتكم
بعد ما الكل سلموا على بعض وهنئوا رامز
رامز:- مش يلا يا جماعه ولا ايه
صفاء:- يلا انا جاهزة
رامز:- وانت يا احمد مش جى انت وولاء
احمد:- لا والله يا رامز معلش فى الفرح ان شاء الله
رامز:- ليه كده بس
احمد:- معلش يا رامز علشان ولاء ممنوعة من الحركة الكتير علشان حامل
رامز:- والله ماشى يا عم الف مبروك وربنا يتمم لها على خير يارب
الجميع:- يارب
رامز:- طيب نستأذن احنا يلا سلام عليكم
وينزل كل من رامز ورامى ورضوي ووراهم صفاء
على السلم تنزل صفاء براحة علشان ما تحصلش رامى
لكن رامى وقف يستناها
رامى:- وهى نازلة ومش واخدة بالها........ وحشتينى
صفاء:- بخجل....... شكراً وتنزل بسرعة
رامز:- مالك يا صفاء
صفاء:- لا ابدآ مافيش حاجه
رامز:- طيب يلا بينا... ويذهبوا جميعاً إلى بيت منار
صفاء:- تتصل على منار
منار:- ايو يا صافى... انتوا فين
صفاء:- احنا تحت البيت يلا انزلوا
منار:- حاضر حالآ يلا سلام
صفاء؛- نزلين حالآ
رامى:- طبعآ الاستاذ عزت معاهم
صفاء:- لا ترد 😏 واكتفت بالنظرة فقط
رامز:- وبعدين يا رامى
رامى:- هو انا قولت حاجه
رامز:- طيب خلاص اسكت علشان نزلوا
منار:- بخجل.... السلام عليكم
الجميع:- وعليكم السلام ورحمة الله
سهير:- ازيكم يا ولاد
الجميع:- بخير الحمدلله
عزت:- وعينه على صفاء.... السلام عليكم
الجميع:- وعليكم السلام
....... وبعد السلامات الكتير.....والاتفاق على المكان اللى هيروحوا يشتروا منه الشبكة
رامز:- احنا نقسم نفسآ مجموعتين وكل مجموعه تاخد تاكسى
عزت:- وليه انا معايا عربية اخد عمتى والبنات وانتوا تيجوا بالتاكسى
... لسه رامى هيعترض.... ردت صفاء
صفاء:- فكرة حلوة.... يلا بينا
عزت:- وهو يشاور على السيارة..... طيب اتفضلوا
رامى:- بغيظ..... اتفضلوا قدامنا واحنا وراكم
..... ركبوا البنات مع عزت وسهير... كالاتى
سهير بجوار عزت فى الكرسى الامامى...... وخلف عزت تجلس رضوى وفى الوسط صفاء وبجوارها منار
عزت:- وهو عينه على صفاء بمرأة السيارة...... انتى ايه رأيك يا عمتى فى العربية
سهير:- حلوة يا حبيبى.... ربنا يكفيك شرها
منار:- وهى تاخد بالها من عزت ونظراته لصفاء....... بص قدامك الله يكرمك يا عزت وخليك فى الطريق.... وادخل الشارع الجاى يمين 👉 احنا وصلنا
عزت:- ادا بالسرعة دى
سهير:- ايو يا حبيبى ماهو الراجل مش بعيد
وينزلوا جميعهم من السيارة........ وياتى خلفهم رامز ورامى وينزلا من التاكسى
رامز:- يلا ادخلوا وقفين كدا ليه
سهير:-مستنينكم يا بنى
رامز:-طيب يلا ندخل
رامى:- ادخلوا انتوا..... وهفضل انا والاستاذ عزت عيزه فى كلمتين
رامز:- راااامى مش وقته
رامى:- فى ايه يا عم انا هتكلم مع الراجل كلمتين على ما تخلصوا
سهير:- سيبهم يا بنى براحتهم هما مش صغيرين
رامز باستسلام دخل المحل مع سهير والبنات وساب رامى مع عزت برا
عزت:- وهو يكتف ايده امام صدره.... خير
رامى:- وهو ينظر له بغضب....... انا عايز اقولك كلمتين
عزت:- اتفضل سامعك
رامى:- اولآ صفاء دى تشلها من دماغك خالص نجوم السما اقربلك منها دى تخصنى انا ملكى فاهم
عزت:- وهو مازال على وضعه 😎...... وثانيآ
رامى:- ثانيآ وعاشرآ ابعد عنها خالص متوجهش لها كلام لا من قريب ولا من بعيد وتنسا خالص الكلام اللى قولته امبارح دا.....لانها خطبتى
عزت:- خلصت اللى عندك خلاص
رامى:- لا رد
عزت:- طيب اسمع اللى عندى بقا....... صفاء مش ملكك ولا ملك حد هى حرة نفسها.... وهتكلم معاها..... وهعيد كلام امبارح تانى وهتقدم لها...لانها مش خطبتك....انت سيبتها وتخليت عنها وهى من حقها انها تختار
رامى:- 😡😡 دا انت مجنون بقا.... ولسه هيهجم عليه.......... تخرج صفاء اللى كانت متابعة الحوار من اوله
صفاء:- راااامى... اظن كدا كفايه
رامى:- لسه هيتكلم....... كانت صفاء رجعت المحل تانى
بعد ما انتهوا من شراء الشبكة. ... عادو الى البيت بعد ما منار وسهير اخدهم عزت وروحهم...... ورامز اخد رامى وصفاء ورضوى وروحوا البيت
------------------------------------------------------------
بعد ما وصلوا عند البيت..... صفاء طلعت على شقتهم عالطول بدون ولا كلمةوتركت الباب مفتوح.... ودخلت على غرفتها عالطول بعد ما القت السلام على ابيها وولاء وزوجها
دخل بعد منها رامى ورامز ورضوى.... والقوا عليهم السلام
رضوى:- انا استاذن علشان اطلع اذاكر...... وتطلع رضوى.... ويظل رامز ورامى
عبدالرحمن:- اشتريت يا رامز الحاجة خلاص
رامز:- ايو يا عمى الحمدلله
عبدالرحمن:- طيب يا بنى الف مبروك وربنا يتمم بخير
رامز:- الله يبارك فى عمرك يارب
احمد وولاء:- الف مبروك يا رامز
رامز:- الله يبارك فيكم عقبال موكة
وبعد الكلام الكتير والضحك والهزار
رامى:- لو سمحت يا عمى انا عايز اتكلم مع صفاء شوية
عبدالرحمن:- طيب يا بنى انت نفذت الشرط بتاعها
رامى:- وهو وشه بالارض........ للأسف مقدرتش
عبدالرحمن:- بتفهم...... ماشى يا رامى انا هدخل اقولها
رامى:- يهز راسه ويسكت
....... ويدخل عبدالرحمن لصفاء
عبدالرحمن:- صفاء رامى برا وعايز يتكلم معاكى
صفاء:- انا اسفة يابابا مش هقدر اتكلم معه
عبدالرحمن:- آسِتٌغُفُر آلَلَهّ آلَعٌظُيَمً...لَآ حًوٌلَ وٌلَآ قُوٌةّ إلَآ بًآلَلَهّ آلَعٌلَيَ آلَعٌظُيَمً...... طيب ممكن افهم ايه اللى حصل
صفاء:- يا بابا رامى عصبى اوى ومش بيقدر يتحكم فى اعصابه..... يعنى النهارده مثلآ بدل ما يعتذر من عزت زى ما طلبت منه...لأ الاستاذ راح اتخانق معه وكان هيضربه قصاد المحل لولا انى كنت متبعاهم وخرجت فى الوقت المناسب وفضيت الاشتباك الله اعلم كان ممكن يعمل ايه
عبدالرحمن:- هو الواد ده ايه اللى حصله مكنش كدا ابدآ كان طول عمره هادى كدا وعمر صوته ما علي على حد..... لَآ خِوٌلَ آلَلَهّ يَآربً..... طيب المهم اقوله ايه دلوقتى
صفاء:- زى ما قولت لحضرتك يا بابا مش هقدر اتكلم معه على الاقل النهارده...خليها يوم تانى
عبدالرحمن:- امرى إلى الله اللى يريحك ياحبيبتى اعمليه
.....ويخرج عبدالرحمن ويترك صفاء لوحدها
صفاء:- مع نفسها....... ماشى يا رامى ان ما وريتك مابقاش انا صفاء
خرج عبدالرحمن واعتذر من رامى
عبدالرحمن:- انا اسف يا رامى صفاء مش هتقدر تتكلم معاك دلوقتى.... واظن انت عارف السبب
رامى:- عارف يا عمى.... طيب انا استاذن....تصبحوا على خير
الجميع:- وانت من اهل الخير
....وصعد رامى الى شقتهم......واتجهوا الجميع إلى النوم
------------------------------------------------------
سألوني.اتحبه
قلت لهم الحب بحقه قليل
فسألوني... ان رحل
ستكرهه.....
صمت وبداخلي حزن فقلت لهم،
اترحل روح عن جسد.الا.بالموت،
قالوو مجنونة
ابتسمت وقلت.. جنوني به اكبر من هذا الكون.!!! _______________________________
وكدا تكون انتهت حلقة النهارده واشوفكم الحلقة الجاية على خير
ايه اللى صفاء هتعمله فى رامى؟
هنعرف الحلقة الجاية
اتمنى الحلقة تكون عجبتكم
واتمنى اشوف تعلقتكم ورأيكم فى تصرف رامى وصفاء
وبمناسبة الشعر اللى فى اخر الحلقة اهداء من صديقتى سلطانة زمانى....وهى صديقة من سوريا الشقيقة
وان شاء الله هيكون معانا اشعار كتير فى الحلقات الجاية وهتكون من ضمن الاحداث اللى جاية ان شاء الله
مع تحياتي #كوثر محمد
أنت تقرأ
مازلت ملكة فى بيت أبى
General Fictionالقصة اهداء الى روح ابى رحمة الله عليه بداءت 10 أكتوبر 2019 وانتهت 23 ابريل 2020
