مازلت ملكة فى بيت أبى

السابعة عشر

مازلت ملكة فى بيت أبى
-----------------------------
الحلقة السابعة عشر
-----------------------بقلمى #كوثرمحمد
منار بلغت صفاء بالميعاد....... وصفاء  بلغت رامز وعبد الرحمن ............ وبعد كام يوم.......... يوم الخميس بالليل فى شقة رامز
رامز:- ايه رأيك يا روضى البس ايه بكرا
رضوى:- اى حاجه انت بتلبسها يا ابيه بتكون حلوة عليك
رامز :- ايو بس انا محتار البس كاچول ولا بدلة ولا ايه
رضوى:- بدلة ايه بس فى الحر دا يا ابيه.... اقولك انا هدخل اختارلك طقم شيك كدا على مزاجى وهيكون  تحفة عليك
رامز:- طيب يلا ياختى قدامى على الاوضة نشوف اللبس
رضوى:- حاضر يلا بينا
ويدخوا الاوضة ورضوى تفتح دولاب رامز وتجد بيه ملابس كثيرة
رضوى:- ايه يا ابيه اللبس دا كله دا فى حاجات كتير اوى عمرى ما شفتك لابسها
رامز:- اعمل ايه ما الهانم كانت بتكرهنى فى اى حاجه اشتريها وكنت اسيبها والبس القديم واوقات اسيب منهم  ل رامى
رضوى:- الله يسمحها بقا.....  وتغير الكلام........ ايه رأيك القميص دا هيليق عليك اوى وعليه البنطلون دا
رامز:- بس دا اسود يا رضوى
رضوى:- بصراحه انت بتبقا قمر فى اللون الاسود
رامز:- بجد
رضوى:- اه والله يا ابيه دا حتى البنات صحباتى كانوا بيعكسوك اما بيشفوك لابس اسود بتجننهم
رامز:- لا ياختى هما مجانين لوحدهم
رضوى:- بضحك هههههههههه والله معاك حق يا ابيه دا هيموتوا ويشوفوا ابيه رامى
رامز :- بحزن 😞 والله انا اللى وحشنى اوى
رضوى:- طيب هو انت كلمته وقولتله انك هتخطب
رامز:- بتصل بيه طول اليوم مش بيرد
رضوى:- طيب جرب تانى وشوف كدا
رامز:- ماشى هجرب واشوف ......... ويتصل ب رامى....... بيكنسل عليا
رضوى:- يمكن مش عارف يرد
رامز :- ااااه يمكن........( وهنا يرن جرس الباب)
رضوى:- دى لازم ابلة صفاء
رامز :- طيب روحى افتحى
وتذهب رضوى لتفتح الباب
رضوى:- عاااااااا ابيه رامى وحشتنى اوى
رامى:- وهو يحضنها ويرفعها من الارض............ انتى كمان وحشتنى اوى يا قلبى
رامز :- بعد ما يخرج على صوت رضوى........ رامى حمدلله على السلامة
رامى :- وهو يترك رضوى ويحضن رامز............. الله يسلمك يا غالى..... عامل ايه
رامز:- الحمدلله تمام وانت اخبارك ايه
رامى:- الحمدلله اهو زى ما انت شايف
رامز:- بتصل بيك من الصبح مش بترد ليه
رامى :- كنت نايم والله طول الطريق واما رنيت دلوقتى قولت افجئكم
رامز:- احلى مفاجئة...... طيب ادخل غير هدومك على ما نجهزلك العشا انا ورضوى
رامى :- لا ما تتعبوش نفسكم انا اكلت فى الاستراحة وانا جاى
رامز :- ماشى عديت على عمك
رامى :- لأ قولت زمانه نام الوقت اتاخر دلوقتى وهو بينام بدرى
رامز :- ايو فعلاً زمانه نام
رامى :- وانتوا سهرنين لدلوقتى ليه
رضوى:- اصل ابيه رامز كان محتار يلبس ايه بكرا
رامى :- اشمعنا يعنى بكرا
رضوى :- اصله هيخطب بكرا
رامى :- هيخطب هتخطب انت لحقت بلاش تتسرع فى الاختيار
رامز :- لااا دى اخلاقها عاليا ومتربية وبنت ناس ما انت  عارفها
رامى :- انا عارفها دى مين دى
رامز :- وهو يغمز ل رضوى 😉 صفاء
رامى :- بخضة صفاء ... صفاء مين
رامز :- صفاء بنت عمى
رامى:- صفاء بنت عمى مافيش غيرها
رامز :-مالها صفاء دى احسن واحدة شفتها فى الدنيا واكيد صحبتها هتكون زيها
رامى:- انت بتقول ايه صحبتها مين
رامز:- صحبتها منار ما انت عارفها
رامى:- ايو عارفها مالها
رامز :- مالها ايه ماهى العروسة
رامى :- بغباء........ عروسة مين انا مش فاهم حاجه
رامز :- ياربى على الغباء
رضوى:- بضحك هههههههههه يا ابيه العروسة ميس منار صحبة ابلة صفاء  فهمت
رامى :- انت هتخطب منار
رامز :- ايو يا ابو مخ حميرى
رامى:- وهو يحضن رامز........ الف الف الف مبروك ربنا يتمم بخير
رامز :- الله يبارك فيك عقبالك ان شاءالله
رامى :- يارب بس هى توافق
رامز :-هى مين دى
رامى :- هى فى غيرها صفاء طبعآ
رضوى ورامز:- صفاااااء
رامى :- ايو صفاء ايه فيها حاجه
رامز:- وانت تفتكر هى ولا عمى هيوافقوا بيك تانى بعد اللى انت عملته معاها
رامى :- انا هتصرف بس بعد ما نخلص من خطوبتك انت الاول
رامز :- ايه نخلص من خطوبتك دى هو احنا دخلين خناقة
رامى:- مش قصدى والله انا اقصد انى هحل الموضوع بس بعد خطوبتك علشان لو حصل حاجه مع صفاء تكون الخطوبة تمت بخير
رامز :- وانت ايه اللى ناوى تعمله مع صفاء
رامى :- كل خير ان شاءالله  بس هحتاج منكم مساعدة
رامز:- منا اللى هو مين بالظبط ومساعدة ايه
رامى :- مساعدة منك انت ورضوى وممكن كمان ندخل الانسة منار معانا
رضوى:- اى حاجه تصالح بيها ابلة صفاء انا معاك فيها
رامز :- وانا كمان معاك بس مش نفهم الاول هنعمل ايه
رامى:- اما يجى وقتها هقولكم تعملوا ايه
رامز:- طيب ماشى اقوم بقا انام علشان عندنا يوم طويل بكرا تصبحوا على خير
رامى ورضوى :- وانت من اهل الخير
رضوى :- وانا كمان ادخل انام
رامى :- لأ انتى هتفضلى معايا علشان تحكيلى بالتفصيل ايه اللى حصل يوم الحكاية ايها
رضوى :- بخبث....... حكاية ايه
رامى :- ببببت انتى هتصيعى عليا  دا انا اللى مربيكى
رضوى:- طيب خلاص هقولك بس تعالى ندخل جوا علشان ابيه رامز ينام
رامى :- يلا يا لمضة هانم
............ ونسيب رضوى تحكيله
       -----------------------------------------------------------
تانى يوم الصبح فى شقة عبد الرحمن
صفاء بتحضر الفطار
عبدالرحمن :- صباح الخير يا صافى
صفاء:- صباح الورد والفل والياسمين عليك يا عبودى
عبدالرحمن:- ايه اللى مصحيكى بدرى كدا
صفاء:- ابدآ قولت اقوم اعملك الفطار قبل ما انزل
عبدالرحمن:- تنزلى فين على الصبح كدا مش النهارده الجمعة ولا ايه
صفاء:- ايو يا عبودى النهاردة الجمعة بس انت ناسى ان رامز هيروح يتقدم ل منار النهاردة ولازم اكون معاها يمكن تحتاج حاجه كدا ولا كدا واساعدها كمان فى توضيب الشقة ولا ايه رأيك
عبدالرحمن :- تمام يا حبيبتى عقبال فرحك يارب
صفاء :- بغصة فى حلقها............. ان شاءالله فى حياتك يا حبيبى....... يلا بقا علشان نفطر والحق اروح ل منار
..... وبعد ما تنتهى صفاء من الفطار تبدل ملابسها وتذهب الى منار
    -------------------------------------------------------------
فى شقة رامز
رامز ورامى ورضوى بيفطرو
رامى:- انتوا هتتحركوا على الساعة كام كدا
رامز :- على 7 كدا ان شاءالله
رامى :- على خير ان شاء الله
رامز:- يارب ....... انت هتقابل عمك وصفاء ازاى دلوقتى
رامى:- انا هنزل اتكلم مع عمى دلوقتى وان شاءالله احل الموضوع معه عمى امره سهل المشكلة كلها ازاى اقنع صفاء انى اتكلم معاها
رامز :-ربك يسهل امرك
رامى :-يارب
رضوى:- انا عندى حل تعرف تكلمها بيه
رامى :- ايه هو يا لمضة
رضوى:- بزعل مصتنع.......... كدا طيب مش هقول
رامى:- طيب قولى خلاص بقا
رضوى:- الاول انت تفضل تبعت لها ماسيچات اعتذار كتير ولح عليها كتير لحد ما توافق
رامى:- يا سلام على مخك الجزمة دا ما هى يا فلحة غيرت رقمها
رضوى:- طيب ما هو الرقم معايا
رامى:- طيب ومستنيا ايه قومى هاتى التلفون بسرعة
رضوى :- واقوم ليه ما الفون جمبى اهو
رامى:- طيب يلا هاتى بقا الرقم
رضوى:- لأ الاول نتفق
رامى:- نتفق على ايه
رضوى:- تجيبلى فستان جديد احضر بيه الخطوبة
رامى:- اه يا استغلالية ماشى موافق اخلصى بقا
وتعطيه رضوى الرقم
وبعد وقت قليل ينزل رامى الى شقة عمه
   --------------------------------------------------------
فى شقة عبد الرحمن يطرق رامى الباب
عبد الرحمن من الداخل ايو يا اللى بتخبط..... ويفتح الباب
عبد الرحمن :- بصدمة..... رامى
رامى:- ازيك يا عمى عامل ايه
عبدالرحمن:- الحمد لله بخير  انت جيت امته
رامى:- جيت امبارح بالليل
عبدالرحمن :- حمدلله على السلامة
رامى :- ايه يا عمى مش هتخدنى فى حضنك وتسلم عليا زى العادة
عبدالرحمن :- مافيش حاجه بتفضل على حالها يارامى
رامى:- وهو يرمى نفسه فى حضن عمه........... انا اسف والله يا عمى على كل اللى حصل انا مكنتش فى واعى والله ولا عارف انا بقول ايه ولا عملت كدا ازاى
عبدالرحمن :- وهو يبعد عن رامى...... اللى انت قولته لبنت عمك مقلهوش الغريب...... انت اكتر واحد جرحتها بكلامك انت الوحيد اللى مكنتش اتوقع منه كدا دا الغريب وقف فى ضهرها وسندها عنك وجبلها حقها فى نفس الوقت اللى انت اتخليت فى عنها انت اكتر واحد عارف عمك وتربيت بناته انا كنت قولت خلاص لقت الراجل اللى هيحمى بنتى من  بعدى ويكون سندها وضهرها لكن انت خيبت ظنى بيك
رامى:- بأسف..... والله يا عمى انا ندمان على كل اللى قولته فحق صفاء والله انا كنت عامل زى اللى اتخبط على دماغه ومش عارف يفكر ولا يستوعب اللى بيحصل انا اما شوفت الصور دماغى وقفت عن التفكير فى اى حاجه تانية وما حستش بنفسى غير وانا بكلم صفاء واقولها كل الكلام اللى انا قولته ومش عارف انا بقول ايه....... والله يا عمى انا ندمان والله ندمان ونفسى بس تدينى فرصة تانية وانا اوعدك ان اللى حصل مش هيتكرر تانى وهكون ضهرها وسندها زى ما انت قولت وعمرى ما هخزلها ابدآ
عبدالرحمن:- دا شئ مش فى ايدى الكلام دا تقوله لها هى..... هى اللى تختار تسامحك ولا لأ........ ويكون فى علمك لو صفاء قالت لأ يبقى هى ال لأ فاهم يا رامى
رامى:- وهو يقبل يد عمه...... ربنا يخليك لينا يارب وميحرمناش منك ابدآ
عبدالرحمن :- طيب يلا اتفضل اجهز للصلاة وحصلنى على الجامع انت واخوك
رامى:- حاضر يا عمى هنكون وراك عالطول
ويصعد رامى لشقتهم ليستعد للصلاة
     -------------------------------------------------------
قبل قليل فى شقة منار وصلت صفاء وبعد السلامات بدأت صفاء فى توضيب الشقة مع منار
سهير:- والله يا صفاء مش عارفة اقولك ايه على اللى بتعمليه معانا دا
صفاء:- والله يا سوسو لو قولتى كدا تانى لازعل منك هو انا مش اختها ولا ايه
سهير :- اكيد طبعآ يا حبيبتى وربنا اللى يعلم معزتك عندى قد ايه
صفاء :- عارفة والله ربنا يخليكى يارب ويعزك
منار:- هو انا مليش فى الحب دا ولا ايه
سهير :- دا انتى الحب كله
منار:- ربنا يخليكى ليا يا ست الكل يا سوسو يا عسل
صفاء:- ربنا يخليكم لبعض يارب
منار وسهير:- امين يارب
سهير:- طيب يلا نخلص اللى ورانا ولا ايه
منار وصفاء :- ايه هههههههههه
ويكمل الثلاثة توضيب البيت وينتهوا فى وقت ليس بقليل
سهير :- الحمد لله خلصنا اوام يلا يا بنات كل واحدة تاخد دش وتغير على ما احضر الغدا
منار :- ماشى يا عسل هنخلص ونيجى نساعدك
صفاء :- لأ انتى تخلصى وتعملى ماسك لوشك وبعدين تبدأى تجهزى الوقت بيجرى وانا هساعد ماما
منار:- تمام يلا بينا
وبعد وقت تخرج صفاء من غرفت منار وتدخل لسهير المطبخ لتساعدها وتترك منار لتجهز نفسها
وبعد الانتهاء من اعداد الطعام خرجت صفاء لتحضير الطاولة للطعام وتنده منار
خرجت منار وجلس ثلاثتهم على الطاولة وبدائو فى تناول الطعام
منار :- تسلم ايدكوا الاكل يجنن
سهير:- بالهنا والشفا يا حبيبتى
صفاء:- بالهنا والشفا يا قلبى.......... بس انجزى علشان تلحقى تلبسى واعملى حسابك متحطيش ميكب كتير علشان رامز مش بيحبه
منار:- وهى تمضغ الطعام...... ماشى
صفاء :- نهار احوس اوعى تأكلى قدامه كدا  لايطفش واحنا ما صدقنا
منار:- لا ما تخفيش بعد  الجواز يبقا يشوف على الحقيقة هههههههههه
صفاء :- بضحك.... سامحنى يا بن عمى على الوقعة دى
سهير :- بضحك........ الله يكون بعونه دا امه داعية عليه
صفاء:- اه والله يا طنط دى مرات عمى الله يرحمها كانت دعوتها مستجابة هههههههههه
منار:- بزعل مصتنع......... بقا كدا ماشى
سهير وصفاء :- هههههههههه هههههههههه هههههههههه
صفاء:- هههههههههه والله هههههههههه مش قادرة هههههههههه قومى قومى يلا كملى لبسك على ما اشطب المطبخ واجيلك
سهير :- لا يا حبيبتى ادخلى انتى معاها وانا هخلص المطبخ
صفاء:- لا والله يا طنط ما يحصل وبعدين دا هما كام طبق يعنى
سهير :- يا بنتى كفاية انك
صفاء :- تقاطعها اهو قولتيها بنفسك يا بنتى ينفع بنتك تقعد وانتى تشتغلى
سهير :- خلاص اللى يريحك اعمليه
صفاء :- ايو كدا..... وتدخل صفاء المطبخ بعد الانتهاء من جمع الطولة هى ومنار....... وبعد وقت قليل انتهت صفاء من المطبخ ودخلت ل منار لتبدل ملابسها هى الاخرة
وبعد وقت ليس بقليل يأتى صلاح خال منار وابنه عزت
وبعد الترحيب بيهم من قبل سهير
صلاح:- امال فين عروستن الحلوة
سهير :- بتلبس جوا ومعاها صحبتها
عزت:- الف مبروك يا عمتى وعقبال الليله الكبيرة
سهير :- الله يبارك فيك يا حبيبى وعقبال ما نفرح بيك يارب
صلاح :- فى حياتك يارب
سهير :- ايه مافيش واحدة كدا ولا كدا شغلتك
عزت:- لا والله يا عمتى مافيش
سهير :- ربنا يبعتلك بنت الحلال اللى تريح قلبك
صلاح وعزت:- اللهم امين يارب
وهنا تخرج صفاء لتنده سهير علشان تشوف منار
صفاء:- السلام عليكم
الجميع: وعليكم السلام ورحمة الله وبركاته
سهير :- تعالى يا صفاء دا اخويا صلاح وابنه الكبير عزت...
صفاء :- اهلآ وسهلآ بيكم
صلاح:- اهلآ بيكى يا بنتى
سهير :-  ودى بقا تبقا صفاء  صحبة منار وبنت عم  العريس
عزت:- والانسة مرتبطة
صفاء:- افندم
سهير :- بسرعه....... كنتى عايزه حاجه يا حبيبتى
صفاء :- اه يا طنط كنت عيزاكى تيجى تبصى كدا على منار
سهير :- حاضر جاية معاكى ...... عن اذنكم البيت بيتكم طبعآ
صلاح :- براحتك يا ختى
وتدخل سهير وصفاء ل منار
وبعد قليل يدق جرس الباب
سهير :- من الداخل...... افتح يا عزت
ويقوم عزت يفتح الباب
عبدالرحمن :- السلام عليكم
عزت:- وعليكم السلام ورحمة الله
عبدالرحمن :- مش دى يابنى شقة منار
عزت :- ايو يا حج اتفضلوا انا عزت بن خالها
عبدالرحمن :- يا اهلا بيك يابنى
عزت :- اهلآ بيكم يا حج اتفضلوا اتفضلوا ويدخلوا جميعاً
عزت:- دا والدى الحج صلاح خال العروسة
عبدالرحمن :- اهلآ وسهلآ تشرفنا
صلاح:- الشرف لينا يا حج
عبدالرحمن :- وانا عبدالرحمن عم العريس ويشاور على رامز.... ودا رامز العريس ودا اخوه رامى والبنوتة دى اختهم رضوى
صلاح :- يا الف اهلآ وسهلآ منورين
رامز :- بنورك يا عمى
وبعد الكلام الكتير والتعارف والتهانى
صلاح:- ادخل يا عزت نادى عمتك ومنار
عزت:- حاضر يا بابا........ ويذهب عزت ينادى عمته ومنار
وتأتى منار وهى تحمل صنية من المشروبات والعصائر وامامها سهير وورائها صفاء
سهير :- السلام عليكم
الجميع:- وعليكم السلام ورحمة الله
وتجلس سهير بجانب صلاح وتضع منار ما بيداها وتجلس بجوار سهير
اما صفاء التى لم تنتبه بعد لوجود رامى تجلس بجوار  رضوى دون أن تتحدث
عبدالرحمن:- عملة ايه يا منار
منار:- بخجل..... بخير يا عمى الحمدلله
عبدالرحمن:- وانتى يا انسة صفاء اخبارك ايه
صفاء :- بأبتسامة........ الحمدلله يا حج عبدالرحمن نحمدالله
عبدالرحمن:- النهاردة صفاء من اهل العروسة
صلاح:- دا يشرفنا يا حج والله
عبدالرحمن :- دا من اصلك يا حج عزت
سهير :- والله يا حج عبدالرحمن صفاء دى بنتى التانية ومعزتها من معزت منار بالظبط يا زين ما ربيت
عبدالرحمن :- والله يا حجة ومنار ونعمة التربية بردو وزيها زى صفاء بالظبط
صلاح:-اذا كان كدا يبقا فى قبول ان شاء الله
عبدالرحمن:- ان شاء الله منار دى بنتنا واحنا مش  هنلاقى احسن منها ل رامز..... ورامز دا انا بعتبرو ابنى الكبير هو واخواته ولادى
صلاح:- ربنا يبارك فيهم ويخليك ليهم يا حج........ واحنا مش هنختلف على حاجه ان شاءالله
عبدالرحمن :- كل اللى تطلبه منار وام منار احنا تحت امركم فيه وزى ما انت قولت مش هنختلف
صلاح :- يبقا على خير الله نقرا الفاتحة
وبعد الانتهاء من قراءة الفاتحة
عزت:- كان ليا طلب من بعد اذنكم طبعآ
عبدالرحمن:- اتفضل يا بنى
عزت:- كنت عايز اطلب ايد الانسة صفاء
الجميع:- فى صدمة
   ---------------------------------------------------------------
يا ترا رد فعل كل من صفاء ورامى وعبدالرحمن هيكون ايه
الحلقة طويلة اهى ويارب اشوف تفاعل بجد لانى جالى احباط ومكنتش هنزل الحلقة بس اناوعد ناس ومااحبش انى اخلف بوعدى
واشوفكم الحلقة الجاية على خير ان شاءالله
تصبحوا على خير
مع تحياتى #كوثرمحمد