تاني يوم الساعه 5 في شركه السيوفي
صفاء / استاذ حسام عايز حضرتك يا باشمهندسه
غاده / دخليه بسرعه
حسام / مساء الخير
غاده / مساء النور ها عملت ايه
حسام / اتفضلي دا ملف عنها من ساعه ما اتولدت لحد دلوقتي
غاده / انت متاكد انها هي
حسام / ايوه هي اللي كانت في الفيديو بتاع المراقبه مع حازم الشرقاوي
غاده / انا متشكره اووي يا حسام مش عارفه اقولك ايه
حسام / لا شكرا علي واجب يا غاده
غاده / نيره عامله ايه في الحمل
حسام / الحمد لله بخير اهي قربت تولد
غاده / ربنا معاها لو عايز تاخد اجازه في اي وقت علشان تبقي معاها انا معنديش مانع
حسام / لا هي لسا شهر علي ولادتها يعني قبلها بأسبوع كدا ابقي اخد اجازه
غاده / ماشي براحتك ابقي سلملي عليها اووي و قول لها اني هبقي اجي ازورها انا و هنا قريب
حسام / حاضر يوصل يلا سلام بقي علشان اللحق اروح
غاده / مع السلامه
بعد ما خرج مسكت الملف
نايا سليمان الاسيوطي بنت سليمان الاسيوطي صاحب اكبر شركه استراد و تصدير بتحب حازم الشرقاوي اووي علشان غني و بيعاملها ببرود بس هو مش طايقها بس بيعاملها كويس هي بنت مستهتره درست اداره اعمال و كل يوم تقريبا تروح تشتري لبس جديد عربيتها بتغيرها كل شهرين اما بسبب حادثه بتعملها او عربيه جديده بتحب المجوهرات جدا
غاده قفلت الملف ومسكت الموبايل
غاده / الو يا حسام
حسام / ايوه يا غاده في حاجه حصلت ولا ايه
غاده / لا متخافش بس عايزك تبعت واحد يراقب نايا الاسيوطي و يعرفلي بتعمل ايه كل يوم و بتقابل مين و بتكلم مين و بتقول ايه كل حاجه حتي الفون بتاعها يتراقب
حسام / للدرجه دي هي عملتلك ايه
غاده بغموض / معملتش لسا هتعمل علشان كدا لازم اعرف خطواتها خطوه خطوه
حسام / مش فاهمك و لا فاهم حاجه
غاده / بعدين يا حسام بعدين يلا سلام
حسام / سلام
باب المكتب خبط
غاده / ادخلي يا صفاء
هنا / مينفعش هنا
غاده / لا طبعا تعالي يا نوني
هنا / خلصتي شغل
غاده / اه و انتي
هنا / و انا كمان تعالي نروح نتغدا برا و نشتري شويه حاجات علشانك
غاده / طيب تمام انزلي استنيني في العربيه و انا جايه وراكي
هنا / تمام
بعد ما خرجت غاده حطت الملف في شنطتها و نزلت وراها
في مكان تاني في بيت نور
هدي / انا مش مصدقه نفسي يا احمد انا فرحانه اوووي
احمد ببتسامه/ يا رب دايما يا حبيبتي
هدي / لا بجد فرحانه انا اول ما شفت فارس دا و انا قولت يا رب يكون من نصيب نور و الحمد لله ربنا استجاب دعائي
احمد / و البنت كمان تقريبا كدا معجبه بيه
هدي / الحمد لله بس انت عرفت منين
احمد / امبارح لما رحت قولتلها انه جاي يتقدم لها انهارده اتكسفت و وشها احمر و قالتلي انت شايف ايه يا بابا انا قولتلها قابليه و لو فيه قبول وافقي و لو مفيش خلاص
هدي / انشاء الله هتوافق و انا بعد ما يمشوا هشوفها
في غرفه نور
ملك / يا ربي دي خامس مره اقولك شكلك قمر
نور / بجد يا ملك
ملك / بجد
نور / هما غاده و هنا مش هيجوا
ملك / لا اصلهم هيروحوا يجيبوا حاجات علشان غاده هتتجوز الشهر الجاي و انتي عارفه ان غاده مفيش حد ينزل معها و هنا قالتلي هتاخدها و تنزل علشان يلحقوا يجيبوا الحاجه و احنا نروح معاهم بكرا
نور / طيب انا خايفه اووي يا ملك
ملك / متخافيش تحبي انزل معاكي و اعقد معاكوا زي العزول وبعدين انا بايته هنا انهارده هما هيجوا امتي
نور / المفروض الساعه 8
ملك / نعم دا لسا ساعه و حضرتك جاهزه من دلوقتي
نور / اعملك ايه يعني
ملك / عوض عليا عوض الصابرين يا رب
نور / مالك
ملك / مفيش هنتحر منك بس
نور / بس و انا كنت فاكركي زعلتي
ملك بغيظ / اااااااه
نور قعدت تضحك جامد
