بين الألف والكاف (حب)

الحلقة 2

بين الألف والكاف. .
الحلقه 2

غفران إلخفاجي ..

ومن وصلنه لبابهم..
گالو شجابك لا تجينه

تالي طبكو بابهم
وبنار فشلتنه انجوينه 💔...

طلعنا من البيت وإني أحس النار تأكل بيه أكل يا وسفه دكيت الباب ونطبكت بوجهي ويا الف وسفه انه بنت راضي هيج أنطرد من بيت جدي ..
تلكاني عمي ها خير بويه وين رايحات ..
ياسمين -البيت اللي تتحكم بي النسوان مالي كعده بي يعمي وان جان انطردت أني وخواتي من بيت جدي فهذا عار عليكم ..
امشن يلااا. .
العم -اوكفي اوكفي وين رايحه بويه خلي نفتهم منو طردج منو وياج
ساره -أسأل مرتك عمي هي أدرى
ياسمين -اسكتي وحسج مااسمعه
عمي وخر من طريقي انته ضيفتنا يومين خلف الله عليك بس كعده بهذا البيت مالنا بعد  .
ردت امشي لزم أيدي كال والله متطلعن إلا أعرف شكو ..
ظل يصيح جوه شذذذى مررريم عليييي وينكم شصاير هنا ..

مريم -علي ما موجود يابه خير
العم -وين امج شصاير هنا منو طارد بناي اخوي
شذى -محد طردهن هن صايرات حساسات كلت لياسمين غسلي هدوم مريم لأن تريد تطلع وياي للسوك كلبت الدنيا كلاب تكول انه مو خدامه منو كللها خدامه هي مو صارت وحده من أهل هذا البيت ...

ساره -والله انتي أكبر جذابة ومع احترامي لعمي من يوم كعدنا هنا لهذا اليوم تعير بينا أيتام وملفيتجن من الشوارع واحنه ساكتين عمي تقبل بنات اخوك يكولون عليهن بنات شوارع ..

العم -صدك هذا الحجي شذى
شذى -طبعآ لا تريد تصدك بيهن يحمدان وتجذبني نسيت ذني بنات نوريه طالعات على أمهن بس يجذبن ويفرن بالعقول مثل ماامهن بهذلت ابن عمي راضي وحرمته حتى من ورث أبوه ..

ياسمين -باجي آخر مره اكلج اسم امي ما تجيبوا على لسانكم كافي مااتت وما خلصت من لسانكم ...
والله اليوم دقيقه ما أبقى هنا ..
امشن جريت خواتي حيل وطلعت سوده ابجهي على ذيج الجيه عشتوا ..
رحت لبيتنا أني شناقصني اكعد ابيت امي وابوي احسن إليه من هاي البلاوي ..
فتحت الباب ودخلت صاير كله تراب رغم ما عفناه بس يومين ..
ساره-اهوو باع التراب هاي شلون نكعد بي وهو وصخ
ياسمين -شلون برأيج ست ساره  يلا اقترحيلي طريقه اسويج وصله وامسح بيج
ساره -شبيج ياسمين متتحاجين انتي مقهورة أني أكثر منج بس مو تطلعين حركتج بيه
ياسمين -ولج كلبي موجر قهر ونار ولج انه تالي وكت اسمع هيج حجي على مود لكمه نعيش بيها أشو ارد أصير أني رجال وإني ارد اعيشجن لو اعرف امسح بالبيوت

ساره -شنو تمسحين بالبيوت جا غسلتي هدوم مريم لعد احسن .
ياسمين -الكرامه ماهية هناك أني ارد اعيشجن بكرامه يختي وانتي عليج بس شويه تكبرين عقلج ومااريد طلايبج تدوخني فهمتي ست ساره ..

ساره -عقلي جبير لتخافين بس انتي متستوعبين تفكيري يلا خلي انظف البيت .
ياسمين -عفيه عليج 😁..
نظفنا بيتنا كله وفرشته صار حلو مرتب ساره طارت من الفرح وايوته كعدت تباوع تلفزيون افلام كرتون وتلعب باللعابه مالتها ..
حطيت الفاصوليا على النار ونصيتها  ..
ياسمين -اكلج سويره ديري بالج ع الأكل رايحه شويه لام حسين واجي
ساره -شسوين
ياسمين -شسوي يعني بلكي تعلمني الخياط أكثر حتى أكدر اصرف عليجن ولج هسه أني اللي عندي جم درهم اذا ما اشتغلت شلون تكملين دراستج يمعزايه ..
ساره -هااا هم صدك ماشي روحي وإني أبقى يمه.