بين الألف والكاف (حب)

الحلقه 4

"بين الألف والكاف "

الحلقه الرابعه ..

...............الكاتبة غفران الخفاجي ........

كولوله شو طال البعد موكافي ياناسينا
والروح ماتصبر بعد صار البعد ياذينه
كولوله نشفنه الدمع ومشتاكه عيني لعينه
كولوله ذبلنه السهر والطيبته حنينه
وصلوله كل كلمه وحرف بلكت يحن أعلينه
ماعشنه متنه بغيبته تعذبنه وانذلينه
                 (ياسمين 💔)

ايمن -شنو يعني اللي أفهمه منج تخليتي. .
باوع عليه وضحك كتلجياها من قبل انتي مو كد شي اسمه حب ابدآ أني وفيت بوعدي تجاهج بس انتي سويتني اخوج رغم الحاجز الي بينا راح ..

ياسمين -رفعت عيني بعينه وكتله لأن انته صدك اخويه ووحدة مثلي متناسبك يبن شذى روح أسأل امك وتعال اعتب عليه بعدين ...

-تردين تقنعيني امي هي السبب !! هه والله غلطانه وجثير غلطانه أني مو رجال غبي كبالج ولا لعبة او محبس تجيبيني منا وترديني منا ..

تردين تسوين هيج حتى عود اعوفج بحالج وتلعبين بكيفج بهذا البيت .
لا والله اصكرج ولو اعرف أعوف دوامي بس ماارجع لبغداد إلا وترجعين يم أبويه وكافي هيلكه باقية هنا ومكيفه وتطلعين وتطبين واذا بأجر عكبه اجتنا حجايه منا منا تكعدين تتمسكنين

-خايب انته اشايفني بنت شوارع كبالك لو على كد ايدك شوف عيني ابن حمدان اذا عبالك سكتت تره مو خوف منك سكتت لأن احترمتك عبن ابن عمي الجبير بس الله كفيلك أني مرة ماانجرع واللي يكرب صوبي وصوب خواتي راح اضوكه مرورتي. .

-جان يرفع صوته عليه انتي جايه تتحديني أني مو لسواد عيونج ولج اذا جتنا حجايه من وراج بله شنو شنحجي مره هاطولها مشت حجايتها علينا ..

-هاي كل همك هسه ترفع رأسك !! وكل همك حجي الناس !! ولك الناس ذوله كلهم يرحون فدوه لسواد عباتي وهذا حبك وتمثيلك للحب بعد هذا كلامك ماراح يمشي عليه ..
ماراح افتح الباب وأكلك اطلع ولا اطردك من بيتي لأن تجاوزت بس اذا عندك غيره صدك بعد لتوصل يمي لأن هاي مودتكم مااريدها. ..

-رايح هسه بس إلا هاي عينج اللي تحطيها بعيني افكسها وكولي كالها ايمن ...

دنحجي جان تنشمر حجارة على رجل ايمن صرح اخخخ التفتت أني بسرعه واشوف ايه بيدها كومه حجار ولازمته وتشمر عليه .
روح يا شرير كافي تصيح على ياسمين وتبجيها احنه منحبك روح روح ..

-ولج عزه بعينج هاي شنو ايه عيب  امشي طبي جوه لا ابتلي بيج طبيي..

-اي ما أطب إلا يروح هذا ياسمين شوف شلون يصيح عليج أني مااحبه حتلوا اخو علي ..
علي حباب احسن منه بس هذا شرير يدخل النار ....

ايمن -هي هاي ترباتج خوش محشيه برأس البنيه عليه الله اليعلم شتحجن كدامها ..

-لا مو هيج بس هي سمعتك لأن صوتك واصل لآخر الدنيا 😊 وبعدين هي طفله متفتهم ماكو داعي لهذا الحجي ..