بين الألف والكاف (حب)

الحلقه 1

بين ألالف والكاف ..

الحلقه 1

الكاتبة غفران الخفاجي ..

عرفت الناس والمو ناس..
وماعاتب گفة الرايح
الشجرة شما حداها الريح
متعاتب ورگ طايح..!..

بابل 8/7/2016 الساعه العاشرة مساءا  

ديار / كاعده بالليل صافنه وحدي بغرفتي أبويه يم مرته وإني كاعده ساعه ابجي ساعه أقره حتى الدراسة احسها طالعه من عيني كلما أتذكر أمي راحت مااكدر أسيطر على دمعتي حتى شكلها ما شفته ولا حجيت وياها بيوم من الأيام لا سمعت كلمه ماما ولا شفتها فد يوم وهي تحظني وتبوسني. .

خلصت حياتي وإني أصيح لمرة أبويه يمه تالي تطلع امي جوه التراب وإني ماادري بيهه ..

سوده عليه ييمه ليش عفتيني ورحتي هسه كبرت وشفت الحياة شلونها البنبه من دون امهه كل شي متسوه  .

تنهدت ومسحت دمعتي بيدي وكمت من غرفتي طلعت وصرت اصعد درجه درجه اسحل برجليه وإصعد لحد ما وصلت لباب غرفتها رفعت أيدي ماعندي غير هاي الباب ادكها من أني طفله لحد هذا عمري ماعندي غيرها اروح انام بحظنها وأحس بحنانها ريحتها من ريحه الغاليه أمي دكيت الباب صاحت طبي يمه ديار ..

ابتسمت ودخلت من دكة أيدي تعرفني وتميزني تعرف أني اجيهة بهيج وكت كل يوم ..
فتحت الباب ودخلت شفتها ذيج هيه شيلتها بيضه لافتها على وجهه واحسها تضوي رغم وصلت للخمسينات من عمرها بس لسه تحسها جمال الدنيا كله بيها . .

رحت يمها كعدت وبستها من راسها. .
الخالة  -ها ييمه شو كاعده لسه بأجر وراج دوام وعويناتج مو زين عليها
ديار -حطيت راسي بحظنها وكتلها مااكدر انام خاله من لحظة اللي عرفت انه ماما ميته كل يوم أكل بنفسي أني جنت أظن هاجر امي طلعت أمي رايحه وإني ماادري

الخالة -لا ييمه هاجر صح مره ابوج بس هي حسبه امج والأم اللي تربي مو تولد وبعد انتي كبرتي لازم تتقبلين لتخليني أندم لأن حجيت الج .

ديار -وهاي انتي كلتيها خاله انتي كبرتي يعني أني ماعدت طفله احجيلي عنها الله يخليج

الخالة -يمه وراج دوام بعدين غير يوم نسولف ما طايره أني هنا يمج
ديار -ماراح أكوم إلا تحجيلي واعرف كل شي صار وياها والا ماراح اسامحكم ابد لا انتي ولا حتى بابا الي هو أكثر واحد خدعني. .
تنهدت خالتي وصارت تلعب بشعري وتحجيلي عن كل شي صار وي امي واني اسمعها 
............ ...... .....
بابل 1985/7/2  الساعه ب 7 الصبح ..

ياسمين -كعدت الصبح من النوم وإني بالي يم امي شلون بيها خطيه اليوم تأخرت عليها بالدوه. .

نزلت من السطح اركض الجو جان حار نصعد فوك ننام أني وخواتي ساره وايه وإمي تبقى جوه خطيه متكدر تصعد ومتقبل نبقى يمها تكول حارة أني عاد أبقى يمها منا لمن تغفى اذا اجت الكهرباء أشغل البنكه الها واصعد. .