بين الألف والكاف (حب)

الحلقه 21

بين الألف والكاف
الحلقه الواحد والعشرون
....................الكاتبة غفران الخفاجي  ..........

مشغول بالك احس مومثل حبك قبل
يومية ينقص شكو هوة العشگ هم يقل
معگود گلبي عگد شيفلهة عگدة حبل
يمكن اساسك رمل لو ورد حبنة ذبل
تحرگني نار البعد اخمد وارد اشتعل
دايخ وادور عذر يمكن تجي؟ تتصل
ايجوز ضرفك صعب لو صرت ماانحمل
گول اني اريد افتهم احچيلي وبلا خجل
ناسيني انتة صدگ خليني اگطع امل
ساكت ابد ماترد جاوب سؤالي سهل
بس لاتغشني تره وتبرر بأي فعل
الراسب بدرس العشگ لا ماينفعه النقل💔

ياسمين -الله يخليج لتحجين وياه كدامي ولتتقربين منه صدكيني اموت مو شغله كرهه وحقد بس اني أغار عليه أكثر مما تتصورين ايمن مو بس رجلي هذا حب طفولتي وكسرت كلبي ياما ضكت المر بدونه الله يخليج ارحميني. ..

ماراح اجاوبج شي ابد هدت أيدي حيل وخري عني أعتبرتج اختي بس شوفي انتي شدا تسوين راح اعتبر نفسي ما سمعت كلامج ابد ..

طلعت كعدت ع الجربايه ابجي لو يطيح بيدي اموت اي آريد اموت نفسي ايمن المفروض إليه ليش تجي وحده تشاركني بيه لييش
مو هذا حب طفولتي مو اني االي أنكسرت وطاح حظي على مودة تجي وحده تأخذ حقي وتقاسمني بيه ..

ساعات مرت وإني على نفس الونه والبجي لحد ما حسيت عليه اجه تمدد يمي قلصت نفسي مااكدر اتحرك وغمضت عيني سويت نفسي نايمه ...
حسيت أنفاسه حارة يم وجهي باوعلي وابتعد وإندار ع الجهه الثانيه ...
ليش ماراح يمها ؟ اي أكيد يحبني إليه أكثر مااريده يروح اصلا بيومها نمت مرتاحه كلش وفرحانه انه قدر مشاعري واجه يمي ...
ثاني يوم كعدت على صوت الباب وهو يندك كمت ايمن ماكو والملابس ع الجربايه مالته كمت مثل وحده مخبله ...

ساره واكفه بره شمرت ابنها عليه مثل كل يوم هذا آخر امتحان الها ذبته وراحت هي ورجلها. .

حطيته بالغرفه جان نايم وطلعت غسلت ورحت ع المطبخ محد اكو الظاهر ايمن وهاجر راحوا للدوام ومثل كل مره بقيتي وحدج يا ياسمين ...بس عجب هاجر وين ودت ابنها. .

صعدت فوك فتحت الغرفه على كيف خايفه لا تطلع موجودة الغرفه فارغة ما بيها أحد ومرتبة. .
شويه جرت ثوبي من وره حسيت كلبي يريد يوكف التفتت طلعت ايه ..
ولج يمه شوكت تطلعين صوت انتي خرعتيني طاحظج. .
شبيج ماما والله مو قصدي دنكت زعلانه. .
شلتها وبوستها هاي شنو لج كبرانه متنشالين دخيل ربج فدوه ..
نزلت أني وياها وادغدغ بيها وهي تضحك لكيت باجي بالمطبخ وابن هاجر بحظنها ما حجيت شي ..
حطيت ايه وسويت ريوك وكلتها صاحت عليه وليج تعاي هذا الطفل ديري بالج عليه اني مالي خلك طفل أخذته وما حجيت وياها ...
اني مو احجي وياج لو ميعجبج تردين عليه صرتي بنت الخير أم الوصخ بنت الفكر لو شما تغيرتي تبقين انتي بنت الفكر بنت نوريه أم الخيوط وراضي الي يكدي الفلوس جان كداوه حسيتها طلعتي عن طوري ذبيت الطفل بالكاع ورحت عليها ...