بين الألف والكاف (حب)

الحلقه 10

بين الألف والكاف

الحلقه العاشره

...................الكاتبة غفران الخفاجي ........

اريد ارتاح
لو ليله
ياهو اليخسر احچايه
ويگلي شبيك وحچيله
ياهو اليشتهي عيوني
وافرع ضيمي وبچيله
بهت بيه ضوه العشرين
العمر يركض بكل حيله 🥀☹️..

طلعت وراها واشوف عمتي ساميه واكفه يم الباب شافتني ودمعت عيونها ..

ولج أنتي ياسمين بنت اخوي راضي ؟؟ يا يمه اجت عليه وحظنتني وتبجي ..

استغربت من تصرفها أني صح ما شايفتها يمكن جم مره من جنت صغيره ...
اني هم حظنتها بس بداخلي حاقدة عليهم واحد واحد يمكن لو هم ما عافونا ما جان هسه شذى لعبت بيع لعب ...

العمه- ولج شذى ما تعيفين البنية شني خدامه خلي تطلع تشوف حالها حال البنيات شني طالبتها طلابه. .

شذى -يمعوده شمسويتلها أني هن اماعين غسلتهن

-اي الشغل ما طاير ما شفناها من الصبح لسه البنيه بس تركض .
تعاي بعد عمتج تعاي سولفيلي شلونج خواتج وينهن. .
أخذتني حاظنتني وتحجي وياي شذى باوعت عليها تريد تطك من القهر ...

أخذتني طبيت سلمت على عماتي عمتي كواكب وعمتي أنعام اثنينهن حاوطني ياا هاي بنت راضي ...

ويبوسن بيه ووحدة تباوع للثانيه وتكول سوده ابجهج شذى كل هذا الجمال مااخذتج لايمن اللي راح تجيبها احسن منج ولج ..
سكتت ما حجيت دنكت ماكدرت أسيطر عيني دمعت  .
تقربت مني عمتي ساميه ولج سالفتج مو خاليه هاي دمعتج وراها قصه وإني اعرف سوالف شذى وياج وحده وحده  بس ما صارلي وكت اجي اشوفجن  ..

-عمه انتن حتى بجنازه ابوي محد اجت شافتنا عبالكم أبويه ما ميت وعفتوا امي وحدها ...

أنعام -ولج شلج بهذا الحجي احنه وي امج ما جنه صلح يمه وابوج من مات اجينا مو ما اجينا بس كعدنا وطلعنا ..انتن جهال متذكرن. .

سكتت ما حجيت كتلها عمه اللي راح الله وياه احنه ولد هذا اليوم وربنا ميعوف أحد. .

ساميه -فدوه لهذا اللسان ولج وين خواتج خلي اشوفهن. .

باوعت أشرت كتلها ذيج ساره تركص وهاي ايه بحظن مريم  ..
أشرت الهن اجن يمي ..
-هاااي ساره ييمه ولجن كبرانات فدوه الله بنيات معتبرات صايرات  ..
حاوطنا وكعدنا نسولف وايه بحظني صراحه فرحت بيهن وشذى تباوع علينا وتخزر بيه ما درت بال الها طبها مرض شسوي خلي تسوي  ..

أنعام -جا هاي ليش اختج متحجي يمه شني شكد عمرها .
-عمه هاي مو متحجي هاي خرسوها كوه ..

-شلون يعني خرسوها. .
كعدت سولفت كل شي صار وياي لعماتي احجي وامسح بدموعي هن تخبلن عمتي كام تصيح وهذا حمدان الطرن وين عن هاي السوالف  .