صدمته بقوتي 🔥

٥

#صدمته_بقوتي..٥
شافلي محمد بنظرة فيها هلبا كلام بس ميقدرش يقول شيء لان عارف اني مش هنسمعه 😔
شفت للسفرة و تفكرت هلبا حاجات في ايام حلوة نزلت دمعتي بس مسحتها و شبحتله بنظرة كلها عتاب كأني نقوله ليش درت هكي وباعدتني 💔😔
قعمزت ع السفرة و كنت مخاطريش ناكل بس كنت نساير فيه وكان الصمت يعم المكان لدقائق و الوضع مكانش مريح.. يكفي 🤷🏻‍♀️
كان قاطع الصمت هو صوتي
- اول شيء يسلموا ايديك و ايبارك ف عمركك و تاني شيء تفضل نسمع فيك 🔥
محمد: الله ايسلمك نويرتي الحلوة ♥️ شن بنقول انتِ قولي
- لو سمحت احكي شن جاي تبي تقول احترمتك و جبتك ل شقتي و قتلك تفضل و استقبلتك بكل احترام تقديرا لعدم قدرتك ع الكلام فالأماكن المزدحمة رغم ان مكانش في حد و انت توا احترمني و تفضل احكي شن في لان وراي هلبا شغل والوقت يجري وانت عارف 🔥
شافلي بنظرة مفهمتش نفسرها هل هي ندم او ترجي او اشتياق او فخر
تكلم بعد مدة صمت كانت حاملة معاها افكار طويلة و مراودني شعور الخوف معاها 💔
محمد: انا عارف اني مستحيل نعوضك عاللي صار و ان اني سيبتك وقت احتجتيني و صدقت فهد بس انتِ يلي اختفيتي و خليتي الكل يصدق تخليتي ع نفسك نوريان و تخليتي علينا و محاولتيش تبرري ليش هربتي ؟ ليش محاولتيش تواجهينا ؟ 🔥
- وقت جيت وقفت مقابلاتك انت محمد انت شن كانت ردة فعلك ؟ 🔥البنت الخائنة صح 💔؟ البنت التافهة ! البنت غير المحترمة ؟ 😔وقفت ف وجهي و اني ف نظرك كل هالكلام رديتني فاسدة رغم المنضر يلي كنت فيه 💔جابني وائل ل فم الحوش لان خوك محمود وقت بعتله مسج قتله الحقني محمود كان حضرته يتمهتك مع بنات الناس 🔥ليش مسمعتنيش وقتها ولفيت ظهرك 💔؟ ليش مقتليش اختي حبيبتي مستحيل ادير الكلام هذا🥺 ؟ ليش صدقت فهد و حطمتني ؟ 💔
وقت جيت وقفت مقابلاتك انت نشبح لعيونك انت مش ل محمود او اسلام مش ل بوي مش لامي او البنات لااا كنت نشبح ل عيونك انت يا محمد انت 💔💔 كانت عيوني تقولك صدقني عيوني كانت تقولك انت اللي ربيتني و انت يلي متصدقش الكلام هذا عليا 💔 كانت عيوني تقولك محمد انت توأمي و يقولوا التوأم تحس ب بعض و انت حاسس بيا 💔 بس شن كانت ردة فعلك ؟ قلت كلمات مننساهمش طول عمري 🔥
اني معنديش اخت توام خشو يا ولاد و خش يا بوي
خشي يام و ناديت ع رغد و رنيم و كشخت خشووو 💔
شبحتلي بطرف عينك وقتلي انتِ من اليوم معاش بنتنا حني معندناش بنات فاسدات زيك و سكرت الباب ف وجهي 💔 شن تبيني نديرلك نبوس رجليك و ايديك ؟؟ نقولك او بليز محمد مديرش هكي و لا زيادة الجيران كلهم يشبحولي بنظرات استحقار مني اللي وقف معاي وقتها ؟ وائل وبس 🔥 وتوا تحاسب فيا علاش مقتلكش ؟ تعرف ان الوحيد يلي كانت نظراته توحي ان مصدقني منكم هو اسلام ؟ رغم صغر سنه الا انه كان يشبحلي ب نظرة اني واثق فيك اختي و انتِ مستحيل اديري هكي كانت نظرته تقولي اختي حبيبتي ديري بالك من نفسك و اسف معنديش جهد ليك ؟ 💔 عبدو كان صغير وقتها كان يمدلي ف أيديه ويبكي 💔 كان كانه يقولي اختي متسيبيش الحوش 🔥 كانوا صغار صح بس كانوا يفهموا فالعدل اكثر منك انت 💔 ياللي تبي روحك خاش قانون يا ظالم 😭💔
وقف محمد وجي حضنني و اني دفيته 💔

مجرد حبر على ورق 🔥

شبحتله بطرف عين وقتله ادوي رد عليا علاش درت هكي 💔
محمد: عارف انك عندك حق بس اني انصدمت وقت جانا قاللنا كنت واقف عليها و نبي نتصالح معاها بس هي قالتلي لا و وقت جاها ولد منعرفش من يكون ركبت معاه و طلعوا 🔥 و قاللنا ان تطلعي معاه اكثر من مرة و انك كنتي معاه ف علاقة و ان لاحظ تغيبك طول الفترة الأخيرة عالكلية
ضحكت اني ضحكت من القهر و من الظلم ضحكت من الكسرة وشبحتله
- وانت صدقت هالكلام عليا ؟
محمد: حاولت منصدقش بس جاب صور جاب ادلة جاب ڤيديو وانتِ راكبة معاه فالسيارة لونها اسود مظلمة
ضحكت و قتله
- شن كنت لابسة فالڤيديو ؟ كيف كان منظري ؟ كيف كانت ملامحي ؟ اصلا كيف شكل السيارة ؟ هل هي مش مألوفة ليك ؟ هل هي غريبة عليك ؟ من كان يسوق فيها ؟ هل انت متاكد انه ولد ؟ هل انت متاكد انها مش سيارة سارة ؟ او متاكد ان مش سيارة مفيد صاحب محمود و ان اللي ف السيارة محمود ؟ او ليش انت متاكد انه مش اسلام بسيارة صاحبه ؟ ليش مدققتش فالڤيديو ليش مسالتاش عالتفاصيل ؟ 💔 وصلني الڤيديو و شفته ايكون بعلمك 🔥
اللي ف الڤيديو من امتا اني منلبسش ف وشاح ؟ وين ربطة شعري ؟ وين ظهري المستقيم ؟ وين طولي المتوسط ؟ توا اني ضعيفة زيها ؟ او طويلة زيها ؟ 💔 من امتا اني ندير ف مكياج مبالغ ؟ من امتا اني هكي ؟ وانت مصدق ؟ 😔💔 جاوبني 💔
محمد : مش هكي يا غالية بس ف وقتها كنت شايف اللبسة مركزتش ف التفاصيل النار ركبت فيا وحسيت بالغيظ و اني مقدرتش نربيك 💔
- لو سمحت محمد الزم حدودك تربيتي قاعدة و الحمد الله و عارفة حدودي و ديني و عارفة كيف نتصرف والكلام تم هني انت حاليا تطمنت عليا و اني تطمنت عليك و عالعيلة سلملي عاللي تبرو مني و ع البقية خصوصا عبدو و اسلام يلي ف وقتها نظراتهم كانت محور ل قوتي توا و كانت محور لان نخليهم يثبتولكم انكم ظالمين و إذا ميضايقكش الموضوع انك تعطيلي أرقامهم الخاصة لاني نبي نكلمهم لانهم الوحيدين يلي يستاهلوا🔥
محمد : نفهم منك انك تقوليلي برا روح ؟
- إذا سمحت وراي شغل
محمد : اوك و هادوا ارقام خوتك و من الطبيعي ميضايقنيش فالاخير انتِ أختهم زي م اختي 🔥
اسلام :- ٠٩٢........
عبدو :- ٠٩١........
و رح نرجع نوريان نوعدك بنرجع 🔥

مجرد حبر على ورق 🔥

طلع محمد و اني نهرت نبكي نبكي بالعبرة و مخنوقة بعتت مسج ل ويل قتله تعال بليز 💔 جالي وائل و يعرف مكان المفتاح ف خش طول لقاني نبكي و منهارة حضنني طول 💔 مقدرش يتكلم بس كان مفتخر بيا اني كنت قوية طول الفترة يلي كان محمد عندي و كيف عرف ؟ لان اني وقت ننهار يعني اني كنت قوية و القوة هادي خلتني مهزوزة 😔💔 شديت فيه كأني نقوله انكسرت يا ويل 💔 كأني نقوله كلهم ضدي و اني يلي متمسكة بالقوة 🥺 كأني نقوله م عندي حد غيرك احميني ارجوك 💔 نسمع ف تليفوني يرن قمته لقيته سارة عطيته ل وائل قتله يرد 🔥 رد وائل و قاللها اني فالشقة مش فالعيادة و ان منقدرش نتكلم دقائق وكانت سارة عندي 🔥 و لقتني راقدة ع الكنبة و راسي ع رجل وائل و منظري زي الطفلة الصغيرة 😔💔 ونسمع فيهم يتكلموا بس معنديش قدرة ان نفتح عيوني 💔 كان راسي ع مخدة و المخدة ع رجل وائل و يدي ف يده كانه نقوله متمشيش زيهم كلهم 😔💔 و وقت جت سارة خدت مكان وائل و شدت يدي و وائل طلع 🖤 و حرفيًا كل يوم يزيد يكبر ف عيني اكثر هالولد ♥️
بعد ساعة من طلوع محمد هديت 😔 و حكيت ل سارة يلي صار و خديت تليفونها و اتصلت ب سام خوي الصغير و متصلتش ب رقمي لان كنت متاكدة انهم يبوا ياخدوا رقمي منه و اني منبيش 🔥

#يتبع