صدمته بقوتي 🔥

٩

#صدمته_بقوتي_٩
وبعد تمعن فالاسم اكتشفت ان اخت فهد يااه عالوقت مصعبه و الله ع التربية يلي خلتني نعاين اخته حاليا مريضة عندي و عاملتها بكل حب و احترام شن ذنب القلوب الحلوة انها تتعاقب ع افعال خوتها 💔
اليوم البنت هادي مريضة عندي ل حالة ضرب راجلها يلي سببلها كوارث داخل جسمها 💔 الله يكون بعونها
قعدت نسجل ف حالاتي لين شرين تليفوني كنت نحسابه اسلام بس لقيتها سارة ف موعد غير موعدها يلي تتصل بيه راودني شعور خوف بس تغلبت عليه و حاولت ان نتماسك 🔥
- الو حبي شن الجو
سارة :- الحمد الله وانتي
- ماشية اهو كيف كملت حالاتي وانتي
سارة :- حتى اني كيف كملت خدمتي و تلقيت اتصال مهم جدا وين انتي
- فالعيادة بنكتب خروج ل وائل و بنمشي للحوش علاش شن في
سارة :- توصلي للحوش كلميني ضروري
- خوفتيني ادوي
سارة :- لالا منقدرش فالتليفون تروحي توا نجيك لاف يو
- تمام حبيبتي لاف يو تو
طلعت من المكتب و الف شعور ف لحظة مشيت ل وائل لقيته يهدرز و حاله تمام كتبتله خروج و قتله
-تقدر تروح للحوش و لازم متتحركش هلبا و اني كل يوم بنخطم عليك
وعد انتي خودي اجازة هالاسبوع ع خاطر الخرا هذا أدويته و حاجاته كله لازم انتي تتصرفي فيهم
خالتي مريم ارتاحي وائل رجع طبيعي غير فترة راحة أسبوع قبل م يرجع انحيله البونتوات
ربي يشفيك يدراه انت
عمر تقدر تروح بيهم توا ♥️
سلمت عليهم و حضنت وعد و خالتي مريم و سقدتهم شفت بقية المرضى و خليت العيادة مفتوحة مع الأمن باش لو جي حد يتصلوا بيا و الساعة ١ يسكروها
روحت للحوش و اتصلت ب سارة و اني نفكر شن في ١٠ دقايق بالزبط وكانت عندي
خشت حضنتني و سلمت عليا و هي تضحك ف اطمنت ان شيء حلو
- ادوي طيحتيلي قلبي شن في خيرك
سارة :- اول جلسة هتكون بعد غدوة و شبه كلشيء ب ايدي اني يعني عندنا ادلة هلبا ضده و حتاخذي حقك انتي طلعتي ذكية وقت بعتتي تسجيلات و ڤيديو لينا و احلى شيء كلشيء موثق بالتاريخ ♥️♥️
شبحتلها و دموعي ينزلوا و حضنتها 😭♥️
- نحبك سارة نحبك 😭😭
حضنتني
سارة :- حناخذ حقك زي م وعدتك و ترجعي تمشي و راسك فالعالي ي قلبي ☹️♥️
- لو تبي اي مساعدة ع فكرة عندي صاحبتي تقدر تساعدك محامية حتى هي و اليومين يلي فاتوا كلمتني و قاتلي نقولك ♥️
سارة :- حاليا لا بس لو زاد الضغط عليا توا نقولك
- تمام ي عمري و ربي يفرح قلبك زي م فرحتيني ♥️
شعور النصر يلي جاني ف اللحظة هادي كان شعور مليان بالكلام الغير مفهوم و اني ف عز شرودي اتصل بيا اسلام
- أيوا سام شنن
اسلام :- جايين انا و رغد و ريم
- متجيبش حد
اسلام :- عيب بعد م أعطيتهم امل يشوفوك
- تفاهمنا ع وحدة مش ع زوز
اسلام :- مه قالت المحل شدت فيها التانية بعد م حطها راجلها تبات عندنا هي و ملك
- تي ماشي ماشي
سكرت المكالمة و اني معاش فهمت بشن نحس مش هنحكي قدامهم ع شيء خلي انوض ندير عصير و حاجة معاه م بين يجوا
نضت درت عصير و حاجة حلوة و حطيتهم عالطاولة و انا كيف كملت توضيت وصليت و خبط الباب
بدلت عالسريع و ساويت شعري و فتحت الباب لقيتهم اسلام و البنات
شبحتلهم نظرة مليانة شعور مليانة معاني
- تفضلوا خودوا راحتكم الحوش حوشكم ♥️
رغد :- انتي 😳😭😭😭 بكري كنت معاك و مقتيليش 💔 مش حرام اديريلي هكي و انا حكيتلك عليك 🥺💔
- خشي توا نهدرزوا رغد
خشينا مع بعض و ريم في حالة صمت تامة و دموعها ف عيونها
بديت اني ف كسر الصمت
- مكنتش نبي نقولك قدام الناس ي رغد و مكنتش نبي نكسرك كنت نبيك تجي هني و نهدرزو و لو منبيش تعرفيني او نتلاقا معاك ره قلت ل اسلام لا
رغد :- اختي 😭😭😭😭♥️ وناضت حضنتني 💔 و اني فاللحظة هادي دارت الدنيا بيا 💔 اخخ ي دنيا
فرقتيني ع أغلى الناس عندي 💔 خديتيني ل عالم تاني منغيرهم 💔 كنت محتاجتهم وقت بعدتيهم علاش ايصير هكي حسبي الله ونعم الوكيل فيك ي فهد ان شاء الله تلقاه ف صحتك مش ف اماليك 😭💔 كنت شادة روحي بالسيف مبكيتش و قلبي يقول ي بنت خواتك ابكي عيطي سمعيهم صرختك سمعيهم انك كنتي محتاجتهم و مبكيتش بس وقت قمت عيوني ف ريم بعد م بعدت رغد و شفت هادوكا الدموع ف عيونها و هي تشبحلي بدون م تتكلم بدو دموعي ينزلوا فتحتلها أيديا نقوللها تعالي و هي مبتش تصدق تحرك ف وجهها ايمين و ايسار كانه تقول لا انتي مش اختي لا اني نحلم و بعدها جت حضنتني و تبكي كان مشهد مش هننساه كان شعور استحشته من ٥ سنين كان شيء منقدرش نوصف بشاعته ولا نتمناه ل حد 💔
حضنتها و دموعي ينزلوا و حضنتنا رغد و كان موقف سيئ مكانش فالحسبان 🥺 بس فرحت انهم بخير و اني شفتهم بعد كل هالسنين ♥️
نوضتهم عالسفرة باش ياكلوا الكيك و يشربوا العصير
ريم :- الله يسلموا ايديك يشهوا
رغد :- نوريان
- نعم ي روحي
رغد :- نحبك 🥺♥️
ضحكت ضحكة من قلبي و اني نقول ي ريت يسمعوك اهلك و يفهموا اني مظلومة 🥺
شبحتلها و قتلها حتى اني
ريم :- احكيلنا وين كنتي و شن درتي فهالفترة يلي بعيدة علينا 🥺
- هي خلي نحكيلكم بعد م جيتكم هداكا اليوم مع وائل و لزني محمد مشيت معاه ل حوشهم هو و امه و اخته و خوه ساكنين فيه قعمزت غادي و اني نشبح للفراغ حكالهم وائل عاللي صار و استقبلتني امه كأني وحدة منهم و بعد فترة طلبت من وائل ان يدبرلي كيف نسافر نقرا برا و ان معاش نقدر نكمل هني مشي دار المستحيل مسكين و سفرني ل بريطانيا قعدت نقرا و نخدم غادي باش استقريت و كملت قرايتي و تخرجت بعد م تخرجت خديت امتياز ف واحد من اكبر المستشفيات و خدمت سنة و روحت كنت نخدم غادي و نبعت ل وائل في مبلغ يخليه عنده باش امتا نروح نجهز بيه عيادتي لان منقدرش نروح بيه كله اني بعد م كملت خدمتي و درت مبلغ كويس روحت منغير م نقول ل وائل و اتصلت بيه قتله يجيني جالي هو و وعد و خشيت ع اكاونتي لقيت مسجات من محمد خوكم و قتله ع عنواني و بهالطريقة خديت رقم اسلام و اني قدامكم توا
ريم : ربي يوفقك ديما حبيبتي ♥️
رغد : هذا علاش قتيلي توا نتفاهموا وقت تتعافي ؟
- لا نقول فيها للكل هادي
رغد : ربي يفتحها ف وجهك ي رب
- وانتي ريم شن حال بنتك و وينها علاش مجبتيهاش نشوفها ♥️
ريم : خليتها مع ماما و محمد متعلق بيها هلبا ديما و هي معاه ♥️
- وانتي رغد توتي ل عرسك ان شاء الله ربي يهنيك حبيبتي ♥️
رغد : ايه اهو قريب ان شاء الله ههههه
- بس اني مش هنجي للعرس ره 😅
رغد : والله ماني مدايراته لو متجيش
- ي حي من توا لوقتها انتي امتا ؟
رغد : بعد شهرين من توا ان شاء الله
- توا نشوف العيادة و نقولك
هدرزنا ع ايامات زمان و ضحكنا و حكيتلهم ع بريطانيا و ع قرايتي و ع عيلتي يلي استقبلوني و لسان حالي يقول انتي بديتي خالتو و مشفتيش بنت اختك لتوا و اهو اجتمعتي ب خواتك شعور غريب بس مش مفهوم اخخ وخلاص
روحوا البنات رفعهم اسلام و اني مشيت بنصكر العيادة و اني مروحة فالطريق لقيت سيارة وقفتني 😳
#يتبع