صدمته بقوتي 🔥

١٠

#صدمته_بقوتي_١٠
نزل محمود وقفني و اني انصدمت شبحتله ب نظرة عتب نظرة مليانة مشاعر محمود هذا انت ؟ شن تبي و شن في ؟ كنت نردد ف داخلي و الحمد الله الأمن يشوفوا فيا من وراي
محمود : اخيرا لقيتك ! وين اختفيتي ؟ خيرك !
- لو سمحت حول من طريقي الكلام مش فالشارع الساعة ١ فالليل 🤦🏻‍♀️
محمود : بلا تفاهة خوك اني
- خوي ميسيبنيش ٥ سنين ميندريش عليا حية او ميتة و اللي فالشارع كلهم ميعرفوش ان حظرتك خوي ف لو سمحت حول
حط يده ع كتفي وقالي منيش محول لين تسمعيني
- لو متحولش بنادي عالامن يلي مقابلك تبي تدوي معاي تفضل غدوة ل شقتي فالدور التاني رقم الشقة ٢٦ مع الساعة ١ متبيش براحتك 😅 نستاذن توا
مشيت و خليته وراي و اني كأني نعاقب فيه ب طريقتي هادي رغم ان عارفهه ان فالفترة اللي اختفيت قلوبهم لانت وحنتلي و عارفهه انهم جو لهالمنطقة خصوصاً باش يدوروني بس اعتقد عقاب البشر ف بعض الأحيان يلي تكون قلوبنا مجروحة تستاهل يلي نديرو فيه ✨
ركبت ل شقتي و حسيت في حد وراي تلفتت لقيته محمود مقدرتش نقول ولا كلمة ولا حرف شبحت ل عيونه نظرة تفضل
محمود : حبيت نطمن انك وصلتي ع خير بس ♥️
- مشكور بإمكانك تتفضل توا
محمود : نتفضل نخش ولا نتفضل نروح
- لا روح بعد إذنك اني ساكنة ف عمارة فيها ناس محترمة منقدرش نستقبل حد اخر الليل
محمود : اني خوك مش غريب
- خوي مات من ٥ سنين معاش عندي تؤام اني خوي يلي تحكي عليه مات من وقت بعتله مسج قتله الحقني و هو لاهي بغيري و لاهي ف الشرب و الهم الأغبر ع راسه مع كمشة مردف و مسيب اخته لأمثال أصحابه و جاي يحاسب فيها وقت ملقاتاش و جت بتشكيله قدام باب حوشهم و لزوها لان جت مع واحد غريب أنقذها من الموت و قاعد ينقذ فيها لمدة ٥ سنين و يشبحلها ع انها اخته و عائلته استقبلوها بيناتهم فالوقت يلي كانت غريبة عاملوها زي بنتهم مش زي عيلتها الحقيقية يلي تخلوا عليها و تقولي خوك ؟ خوي ميسيبنيش بروحي وقت نحتاجه 😊
محمود : فاهمة غلط اني أولا مكنتش مع المردف اللي تحكي عليهم و تعرفيني مش هكي و تانيا من قال مكنتش عندي شغل او حاجة
- لو مشفتش انك فتحت المسج و مرديتش ره صدقتك و مفيش اي اخ فالدنيا يفتح مسج اخته اللي مكتوب فيه الحقني ي خوي اختك بتموت و يمشي ولا كأنه فيه شيء ارجوك خليني ف حالي الوضع معاش يسمح للنقاش اكثر من هكِ
اسلام : شن في انت و هي صوتكم واصل للشارع خشوا تناقشوا داخل
- مفيش ف شن نتناقشوا
خشيت و خليت محمود يشبح ل اسلام بنظرات تعجب وترجي يقول فيهم ان يبي يفهمني يلي صار و يقول ل اسلام انت شن جايبك هني و نسمع فيهم يهدرزوا
اسلام : من يوم كلمتني قلتلك اني مع الولاد اني مع اختك اكيد مش زيك اني اختك وقت تتصل بيا تقولي تعال نجيها نجري منحسبهاش كارثة 😉 و بإمكانك تتفضل مهما يكون انت خوها و هي رح تسمع شن عندك بس صدقني لو حاولت تكسرها بكلمة وحدة حنكسرك انت و متحاولش انك تقربها مرة تانية 😉
محمود : بس اني مقلتش كارثة لانها اختك قلت كارثة لان مفهمتش التعبير الأصح يلي يمشي مع الموقف
اسلام : يكفي الكسر يلي سببته ليها و عاشت فيه ٥ سنين متجيش تكسرها ب كلمة كارثة اعرف ألفاظك ي سيادة خوي المحترم مش اني اللي بنعلمك ألفاظك وانت اكبر مني ب ٥ سنين
٥ سنين يعني انت كنت ف سني وقت سيبت اختك و اني توا ف سنك نحمي فيها هذا الفرق بيناتنا يلي خلاها تستقبلني و تلزك 🤷🏻‍♀️ لو تبي تناقشها النقاش داخل لو متبيش تقدر تتفضل ي خوي المحترم بما انك قاعد تحسب فيها اختك .. اختك سيبتها من ٥ سنين مش لازم سمعتها تتشوه لان واقفة ع خوها
قال اسلام هالكلمات و خش للحوش وخلى محمود يفكر و رجل داخل ورجل برا خوفاً من اني نلزه او شيء زي هكي ف كان من الأدب ان اني نتكلم و نخليه يخش حفاظا على سمعتي و حفاظا ع علاقتي بيه ك اخ 🤷🏻‍♀️
- بإمكانك تتفضل و تقول اللي عندك 😪
قلت هالكلمة و محمود خش و هو بيطير من الفرحة يتخايل اني سامحته خش و صكر الباب و لان حني تربينا ف بيئة رجالية متقدريش تقولي علاش قعمزت ومن سمحلك و شن هذا يلي ادير فيه ف محمود قعمز وولع التلفزيون بعد صدمته بالحوش و يتبرد يقول شني مفيش ضيافة ف فاللحظة هادي شبحت اني و اسلام نظرات كانت كفيلة توصل كلامي لإسلام يلي ادخل بدوره و قال
اسلام : محمود صح استقبلناك بس قلنا قول يلي عندك بدون زيادة دوة اختك وراها يوم طويل غدوة و الوقت متأخر
محمود : هي يلي بتحكي و تفهمني شن صار مش اني
و هني كانت النظرات من اسلام و محمود موجهات عندي بإنتظار اني نتكلم
- للاسف كلشيء بتعرفه بعد كم يوم و اني معنديش شن نقول استقبلتك متوقعة تبرير لفعلتك او اعتذار مرموق بمرتبة حظرتك بس نسيت ان طول عمرك من صغرك تكره انك تتأسف حتى لو يلي ضريتها هي تؤامك 🤷🏻‍♀️💔 ونعتذر منك معاش عندي جهد ان نسمع شيء فالوقت الحالي الوقت متاخر و اني بنستاذن و انت تقدر تتفضل و باللهِ بعد م تطلع سكر الباب وراك 😪
قلت هالكلمات و توجهت ل داري فورًا و لسان حالي يقول ف بعض الأحيان الوضع يستاهل ان تكون قاسي القلب و فظ اللفظ و اني صح كنت قاسية القلب بس مكنتش فظة اللسان والحمد لله على الاحترام المتوارث من الأهل حتى لو غلطوا ف حقنا بيقعد فضلهم كبير 😪💔
واني ف بحر افكاري سمعت الباب تسكر و اسلام يخبط ع بابي بعد م دار بينهم حديث كان بعيد كل البعد عن مسامعي 💔😪
- تفضل
اسلام : فهمت من نظرة عيونك وقت جبت البنات ان في شيء صار قبل م نجي و انك تبي تحكيلي و تأكدت وقت قلتي بتعرف كلشيء بعد كم يوم احكيلي شن صار حبيبة قلبي ♥️
- حيييي كيف نسيت بكل كنت بنرقد منغير م نقولك اني مقتلكش اني رفعت دعوة ع فهد و كانت كل الإجراءات قانونية من سارة صاحبتي و وقت كلمتني ومعاك البنات هي كانت عندي قبلها ب ثواني و قالت ان اول جلسة بتكون بعد غدوة يعني ف نفس اليوم يلي صارت فيه الحادثة و يلي بنخش فيه ل ٦ سنين و قالت ان ٩٠٪؜ الحكم بيكون في أيدينا يعني حناخذ حقي 🤲🏻♥️ كل الظلم يلي عشته ف ٥ حيمشي باذن الله و حياخذلي ربي حقي باذن الله ونرفع راس بابا و روسكم انتوا 🤷🏻‍♀️♥️
اسلام : حبيبة قلبي ♥️♥️ الحمد الله ربي م ينسا في حد وبترجعي حقك بإذن الله ي غالية ♥️
كنت نقول ف كلماتي وعيوني يدمعوا و وقت سمعت سند اسلام ليا ف لحظتها حضنته وكأني نستمد فالقوة منه و بديت نبكي و كأني نقوله عوضني ي ولدي عن كل يوم عشته بعيد عليا 🥺♥️
قعدت اني و اسلام نهدرزو بعدها خش كل واحد منا لمكانه و كل واحد في باله يلي بيصير و وعدني ولدي ان بيرجع ل جامعته من غدوة ♥️
نضت الصبح وكانت صدمتي كبيرة بالرقم يلي بعتلي الرسالة و ايهدد فوقها يحساب قاعدة الطفلة الضعيفة يلي خطفها و عذبها و بعدها ع عيلتها قاعدة حية ميحسابش انها ماتت و ان جت ف مكانها وحدة قوية تبيع اللي ايضرها و تشريه
#يتبع