ها يمه جيت ؟؟؟؟
اي يمه جيتج …. شلونج يمه خلي احب رجلج …
لا وليدي كوم انته رفعة راس .. لا تنزل راسك هنا .. انت شهيد بعد امك …
يمه وليدي احجيلي شصار وياك قبل ما تستشهد ..
يمه شحجيلج ماعرف منين ابدي …
يمه العالم اذتنا هواي اكثر من الي كتلونا … يمه يصيحولنه كومه اسماء … مرة انتو الفينات جماعة ببجي .. مرة انتو ما شايفين و ماتعرفون تلبسون .. و كل شوية مطلعينا احنا غلط و همه صح ..
ببجي شنو وليدي ؟؟
يمه هاي لعبة ننهزم من العالم و من الي يصير داير مدايرنا و نكعد نلعبها ..
وليدي يعني متأذون بيها احد ..
لا يمه لعبة …
زين وليدي بس هيج ؟؟
لا يمه بعد يصيحولنه عطوانين و يعيبون علينا و على صورنا اذا اخذنا صورة جماعية ..
يمه حتى بالعيد هذا عيد الله و اكبر … الوكت كله بالشغل احنا و يجي العيد نكيف حتى نروح نطلع .. اذا نروح للجزيرة لو لمدينة العاب يطلعوها من خشمنه الروحه .. ياخذون صور النا من بعيد اكثر مياخذون صور لنفسهم ..و كل شوية جوي الالمانين جوي الاسبان … يمه شحجيلج والله مادري …
يمه حتى بالانترنت محاربينه .. اذا نكتب كلمة غلط واحد يسوي تاك للثاني حتى يضحك علينا ..
بعد امك اوكف ترى اني مجاي افتهم نص كلامك انترنت و تاك بس الي افتهمته انت و ربعك الي بعمرك كلكم استشهدتو علمود هالشي يعني ضجتو و مليتو من حياتكم و طلعتو مظاهرات ؟؟
زين وليدي الحكومة شعليه انتو تكول الناس مضوجتكم !!!
لااااا يمه لاااا …
احنا استشهدنا علمود وطن علمود حق الناس الي ضحكت علينا و طلعو علينا القاب ميروح بلاش … طلعنا احنا و تكاتكنه و دراجتانا الي مضوجتهم .. طلعنا نريدلهم وطن بدون بوك .. طلعنا يمه علمود يتعدل حالهم و حال المثقفين الدارسين الي ظالين بدون تعيين …طلعنا علمود حقهم …يمه اني مرتااااح … لان استشهدت ..
بس يمه الج وحشى … من يوم صار الانفجار بالسوك وانتي رحتي … يمه جنت اتهزم من الحياطين الي بالبيت … يمه صورج جانت يوميا تحركني حرك … جنت اشمشم بيهن و احاجيج … يمه البيت من بعدج ما يسوى والله … يمه جنت انعصر عصر من اشوف واحد من اصدقائي يحجي وي امه بالتلفون لو تصيحه امه وهو كاعد يمي … يمه من رحتي حتى الاكل صار ما بي طعم … بس صدك يمه اريد اسألج ... اني شلون جابوني يمج هنا ؟؟
وليدي جابوك يمي لان اني وانته شهداء .. اني استشهدت بأنفجار سوك الشعبية .. و انت استشهدت لعيون الوطن ..
(الشهيد و امه)
انتهى
