احتواء

البارت السابع عشر

#احتواء
#البارت_17
#الكاتبه /// Rehab ///

مساء الورد 🍃🥀

سدن : بدون وعي مني
وبلا ادراك لتصرفي
طلعت رقم ليث واتصلت عليه
ليش خابرته ماادري
حسيت بروحي محتاجته
جني وحده تايهه ماتدري شتسوي
بس دموعي المنهمره تبين حالتي شگد انظلمت
وشكثر تأذيت
رد بنبره هادئه
ليث : الوو نعم

بقيت ساكته بس اجر نفسي
وصوت انفاسه تخترق مسامعي
رجع حجه من مالگه جواب
ليث : نعم منو
اخذ نفس ونتر
تحجون لو اسد الخط

من بين دموعي جاوبته
بنبره باكيه
وصوت حزين
سدن : احم شلونك ليث

ليث : بأستغراب
الحمدلله منو ؟

بخجل گتله
اني سدن

صفن ورجع جاوب بأستغراب
ليث : سدن اسف ماعرفت رقمج موعندي

سدن : لا عادي اني اعتذر اخاف اتصلت وانت مشغول

ليث : لا يمعوده هلا بيج بأي وقت
سكت ورجع گال
صاير شي شبي صوتج

سدن : ها ماكو شي بس تعبانه اخذ راحتك

تنهد بقوه وگال
ليث : سدن احجي اسمعج تگدرين تگولين الي تردينه بدون مااقاطعج ادري مقصر وياج وكان لازم اني اتصل بعد عقدنا

سدن : لا ماكو مشكله

ليث : احجي سدن همس

سكتت ماادري شحجي وشگول
بقى ساكت ماحجه منتظرني
اخذت نفس قوي
اشجع نفسي
بس داخلي متردد
ومرتبك !
وبديت احجيله عن مكالمه ماجده وكلشي حجته
رجعت دموعي تنهمر بعد ماتوقفت
لفتره معينه .
تركني احجي وافرغ الكبت الي بداخلي
بدون مايقاطعني
بساعتها تمنيته يمي
ردت اكون بحضنه واشكيله
وهو يمسح ع راسي ويهدأني ويگلي دموعج غاليه كافي تبجين
مجرد تخيل اتخيلته
وتمنيته حقيقه

ماادري ليش هالانجذاب لـ ليث
وليش هذا الضعف وياه
كملت وسكتت اخذ نفس وارتاح
احس الكلام اخذ جهد مني
وسلب طاقتي
ماادري الدموع الي ذرفتها تعبتني

همس
ليث : ارتاحيتي

هزيت راسي عبالك هو ديشوفني
وماادري شلون حس بيه
يمكن من نفسي الي انتظم
ونحيبي الي اتوقف
بعد عناء وتعب هواي

ليث : بأي وقت تحتاجين تحجين اني موجود تگدرين تتصلين حتى لو جانت اكو شكوى تجاهي اتقبلها برحابه صدر اني اعرف بنفسي مقصر بس مو بأيدي اتحمليني وساعديني

همست
سدن : اتعبك وياي

ضحك برهاوه وخفوت
ليث : تعبج راحه ماعندي شي
عضيت شفتي خجلانه
وخدودي حسيت بيهن احمرن

سدن : احم اخذ راحتك باي
حجيتها بسرعه بسرعه وغلقت الخط
حتى قبل لا اسمع جوابه
شويه ورجع دگ تلفوني مرة ثانيه ع الواتساب
رفعته متلهفه عبالي ليث
ماادري ليش اشتاقيتله
صوته ونبرته الخشنه كلشي بي يأسرني
وخابت امالي ولهفتي من شفته رقم بتول