لعنة الماضي بقلم /مي محمد (مكتمله)

الفصل الثالث

#لعنه_الماضي

الفصل الثالث

تمضى الايام بحلوها ومرها ..تتغير الاعمار والملامح لم تعد "هنا "   تلك الرضيعه دات اللون الوردى ..تجاوزت مرحله المراهقه وأصبحت فتاه جميله ومتفوقه  تدرس بكليه الهندسه .. ادخلت الهنا والفرح الى حياه والدها ووالدتها بشقاوتها ومشاغبتها معهم عاشوا معها كل ما كان ينقصهم ..لم يشعروا يوما انها ليست ابنتهم ..ولم تشعر هى ايضا بذلك .
عادت "هنا" من الخارج واخذت تدق الباب بطريقه مرحه وسمعت صوت امها من الداخل
-ايه الازعاج اللى انتى عاملاه ده..الجيران يقولوا علينا ايه..ثم انتى مش معاكى مفتاح ؟!
-كده يابطوط ياجميل بقى" هنا "بنتك حبيتك مزعجه وانا اللى جايه ابشرك تقولى عليا كده..لاخلاص انا زعلت واحتمال اكتئب وده خطر على اللى فى سنى و...
قاطعتها امها فى تأفف
بس بس كفايه كلام ..انتى ايه مابتصدقى..عملتى ايه فى الكليه ؟.. انا قلقانه وبدعيلك من الصبح
قالت" هنا" فى مرح
-تدفعى كام واقولك
اندفعت فاطمه باتجاهها فى عصبيه فتحركت هنا فى سرعه وهى تضحك
-خلاص خلاص قلبك ابيض يابطوط ..امتياز زى كل سنه الحمدلله .
اطلقت" فاطمه " زغروده عاليه واحتضنت ابنتها فى سعاده
-الحمدلله انت كريم يارب ومش بتضيع تعب المجتهد..ألف مبرووك ياحبيبتى..
لم تتمالك نفسها وتساقطت دموعها فى غزاره
-الله بتعيطى ليه بس ياماما ؟!
-من فرحتى يا"هنا" ..انتى متعرفيش انا بحس بايه وانتى بتكبرى قدامى يوم بعد يوم وبشوف نجاحك وتفوقك وقبل كل ده اخلاقك ونفسك الحلوه .
قالت" هنا  " فى حب
-هو يعنى كل ده جه منين ياست الكل.. منا طلعالك ياحبيبتى انتى السبب فى كل حاجه حلوه وصلتلها
قبلتها مره اخرى فى امتنان وقالت
-انا ربنا عوضنى بيكى عن صبر السنين ربنا يخليكى ليا ياحبيبتى
-ويخليكى ليا ياست الكل
ثم صرخت فجأه وقالت
- يانهار ابيض..انا ازاى نسيت !!
فقالت امها فى خوف
-نسيتى ايه  يا"هنا "؟!..ايه اللى حصل؟
-دى حاجه صعبه اوووى..ده ممكن يقتلنى كده
زاد خوف فاطمه وامتقع وجهها وقالت
-هو مين ده؟
قالت" هنا" وهى تغمز بعينها فى شقاوه
-بابا اصلى نسيت اقوله على النتيجه .
اندفعت امها تجاهها مره اخرى وهى مصممه على ضربها هذه المره
دخلت "هنا" غرفتها فى سرعه وأغلقت الباب خلفها وهى تقول بمرح
-خلاص حرمت حرمت .
.............................

حطت الطائره القادمه من لندن فى مطار القاهره وبدأ الركاب الخروج منها وهم يتنفسون هواء الوطن الحبيب.. يستقبلهم اهلهم وذويهم بشوق وترقب .
وقف "عمر "ينتظر خروج صديقه الوحيد وهو يحمل باقه من الزهور الجميله..ابتسم فى سعاده حين رأه امامه واحتضنه فى حب قائلا
-حمدالله على سلامتك يا"جو" ..نورت مصر
=الله يسلمك يا" عمر"..ايه ده ..ورد..!!!! الله يكسفك انت جاى تقابل صحبتك ولا ايه؟!
-ياعديم الذوق ده مش ليك طبعا.. ده للقمر اللى وراك ..حمدالله على سلامتك ياطنط نورتى مصر والله
=الله يسلمك يا "عمر "عامل ايه ياحبيبى بقالى سنه مشفتكش..ينفع كل المده دى تبعد عنى؟
- اعمل ايه بس ياطنط .
ونظر الى "يوسف" هامسا فى مرح
-حكم القوى  ..ايه ده ..الاستاذ" ادم" شرفنا بنفسه اهلا اهلا يا بطل
احتضن الطفل الصغير الذى حضر مولده وشارك فى تربيته وطالما شعر انه ابنه ايضا وليس ابن" يوسف " وحده
- ازيك يا اونكل ..فين بقى الاهرامات مش قولتلى هشوفها أول ما اجى مصر مجبتهاش معاك ليه؟؟
ضحكوا جميعا وقال" عمر"
-معلش يا ادم كان نفسى اجبهالك بس عربيتى ضيقه شويه ..متزعلش بكره هاخدك ونروح نشوف الهرم وابو الهول كمان
- مين أبو الهول ده؟
- لا ده موضوع كبير هقولك عليه بينى وبينك
قال" يوسف " فى ضجر
مش يلا بينا بقى ولا هنبات هنا.
-انا بقول من بدرى يلا بينا بس طنط اللى معطلانا...ليه كده ياطنط؟
قالت والده "يوسف " فى مرح
-انا برده ..ماشى يا "عمر "
اقترب "عمر " منها وقال هامسا
- معلش ياطنط انتى كبيره وتستحملى الضرب انما انا لسه صغير مفرحتش بشبابى.. وانتى عارفه ابنك مفترى وإيده تقيله
رفعت صوتها قليلا وقالت بخبث
-مش سامعه.. انت بتقول على مين مفترى وايده تقيله .
-  بقى كده ياطنط انتى بتبعينى من اولها ..الله يسامحك
ضحكت فى مرح وقالت
- مش انا كبيره وبستحمل الضرب.
قال باستنكار مرح
-كبيره !! مين العبيط اللى قال كده .. ده انتى اصغر منى
ضحكت بشده وقالت
-وحشنى هزارك والله يا"عمر".
-وانا وحشنى اكلك والله ياطنط
التفت اليهم" يوسف" وهويمسك ايد ابنه وقال فى عصبيه
- مش هنخلص بقى.. انت راكن فين يا ابنى ؟
-ماتهدى يا"جو "شويه .. تعالى العربيه اهى
قام "عمر" بوضع الحقائب فى السياره وفتح باب السياره  لوالده" يوسف" ثم جلس على مقعد السائق وانطلق باتجاه فيلا" يوسف"
فى  اليوم التالى اجتمع "يوسف"و "عمر" ليتناقشوا فى أمر يخص شركتهم
-دى لازم تبقى اكبر شركه مقاولات فى مصر...شغلنا مش هيكون فى القاهره واسكندريه بس هيكون فيه توسع للقرى السياحيه فى البحر الاحمر وكمان الصعيد والنوبه...عملت ايه فى موضوع المجمع السكنى؟؟
وضع "عمر" بعض الاوراق امامه على الطاوله وقال
-ده موقع الارض.. هى المنطقه فيها خدمات بسيطه بس اما نبدأ الشغل فيه اكيد الوضع هيتغير
قال" يوسف "
- تمام بس احنا مش عايزين نزود الاسعار متنساش اننا عاملين المجمع ده لمحدودى الدخل بس مش معنى كده اننا هنغير من المواصفات اى حاجه..اناعايزالمجمع ده يطلع فى احسن صوره.. والتشطيب كمان يكون على اعلى مستوى مش عايز اى غلط.
-متقلقش يا"جو "انا هشرف على كل حاجه بنفسى المهم هنعمل الافتتاح الرسمى للشركه إمتى ؟..الناس بدأت تسألنى
- ان شاء الله اخر خميس فى الشهر ده هنعمل الافتتاح ..المبنى الادارى مش ناقصه اى حاجه والبركه فيك .
-كله بتعليماتك يا زعيم
-أخر  وأهم حاجه بقى المهندسين وموظفين الشركه عايزك تنزل اعلان تطلب فيه مهندسين من كل التخصصات ويكونوا خبره مش اقل من 10 سنين  انا عايز كفاءات تدينى الشغل اللى يرضينى وعايز كمان مجموعه مهندسين تحت التدريب .
-ودوول هنعمل بيهم ايه ؟  احنا مش محتاجينهم
-بالعكس الناس دى هتبقى أهم من الخبراء.. دوول هيتربوا فى الشركه على إيدينا ولاءهم هيبقى لينا احنا بس...هنختارهم كويس أوووى وهيبقوا هم رجالتنا فى المستقبل لوعايزين نكبر .
- تمام هبدأحالا
..................................
فى الشقه المقابله لشقه "هنا " تسكن صديقتها "نورهام "مع والديها واخوها الوحيد" ياسر "
- شوفتى الاعلان ده يا  "نور"
- اعلان ايه؟
-شركه مقاولات  كبيره ناشرين اعلان  وعايزين مهندسين تحت التدريب
  ثم اكمل بتلعثم
- أأأ... ما تقولى ل"هنا" تقدم هى مش كانت بتدور على مكان تتدرب فيه
-دى شكلها شركه كبيره اوووى طالبين ناس كتير..  دى فرصه حلوه و"هنا" هتفرح بيها اوووى  .
ثم غمزت لاخيها فى خبث وقالت
- وهقولها كمان انك انت اللى وريتنى الاعلان وطلبت منى اقولها  يمكن قلبها يحن عليك شويه .
-لا طبعا اوعى تعملى كده ..وبعدين "هنا " دى زيك بالظبط اختى يعنى.
قالت باستنكار
-اختك!!!!  اه باماره ما بتستناها كل يوم الصبح علشان تقولها بس صباح الخير ولا قعدتك فى البلكونه طول الوقت وانت عامل نفسك بتقرأ بس علشان تلمحها ولا تسلم عليها
قال "ياسر" فى خجل
-هو انا مكشوف اوووى كده
ابتسمت" نور" فى حنان وقالت
-لا طبعا ياحبيبى انا بغلس عليك بس.. ربنا يكتبلك اللى فيه الخير وينولك اللى فى بالك .
....................

أخبرت" هنا" والديها بموضوع الاعلان فرحت والدتها وشجعتها على التقديم بينما تخوف والدها من عملها وما سوف تتعرض له من متاعب هو اعلم بها منها
-مابلاش يا بنتى الشغل ده وكفايه عليكى دراستك والمشاريع اللى بتعمليها وأهى كلها سنه وباذن الله تتعينى معيده أد الدنيا فى كليتك.
-بس انا يا بابا مش طموحى انى ادرس فى الجامعه انا بحب الشغل .. بحس بتحدى اما باخد مشروع واخرج فيه كل طاقتى وموهبتى.. هوده حلمى يا بابا وأرجوك تسمحلى انى أحققه وأخليك تفتخر بيا .
-عارفه يا  "هنا "كل ابن نفسه  يطلع يلاقى ابوه احسن أب فى الدنيا وكل أب نفسه يلاقى ابنه احسن ابن فى الدنيا  بس انا مش أحسن واحد  دى صعبه اووى لكن سهل أخليكى يا بنتى أحسن الناس ..أنا دايما وراكى يا "هنا"  فى أى قرار تاخديه هتلاقينى معاكى ..قدمى يا "هنا " ربنا معاكى يا بنتى.
أرسلت "هنا "    أوراق التقديم الخاصه بها الى الشركه  وحددوا لها موعد لإجراء   المقابله مع مدير الشركه ...
يتبع
#لعنه_الماضي
#مي_محمد