#لعنه_الماضى
الفصل الثانى عشر
جلست "هنا "فى غرفتها والمشهد الذى رأته يعاد فى ذاكرتها مره بعد مره
سمعت جرس الباب فلم تهتم بمعرفه القادم لكنها سمعت صوت صديقتها" نور" وهى تسلم على والدتها
ثم دخلت اليها فى غرفتها لتجدها على هذا الحال
سألتها "نور " ماذا بهافأخبرتها ما حدث
استغربت" نور" من رد فعلها وسألتها
- طب وانتى زعلانه ليه ... هو انتى بتحبيه يا "هنا" ؟!
-لا طبعا ..ايه اللى بتقوليه ده ؟!.. احبه ايه .. اكيد لا
- أهى اللغبطه اللى انتى فيها دى بتقول انك بتحبيه او على الاقل معجبه بيه
- انتى رجعتلك التهيؤات ولا ايه ؟ انا يدوب لسه عرفاه من شهرين ومتكلمناش مع بعض كفايه
ثم قالت بمراره
- وكمان ده متجوز
- بس الحب ملوش علاقه بكل ده...احنا مش بنختار اللى بنحبهم يا" هنا" ..السؤال المهم دلوقت هو احساسه ايه من ناحيتك ؟
- انتى هتكدبى الكدبه وتصدقيها يا "نور" .. انا مبحبوش.. انا بس زعلت من اللى حصل والكلام اللى ..مراته ..قالته
رن جرس الباب مره اخرى خرجت" هنا" من غرفتها لتسبقها امها وتفتح الباب
...........................
فى الشركه بعد انصراف" ميرنا"
- "سها " بلغى المهندسه "هنا " ان فيه اجتماع هاتفت السكرتيره مكتب" هنا" ليبلغها زملائها انها غير موجوده بالشركه ...اخبرت "يوسف " ما عرفته
خرج" يوسف" من الشركه وتوجه الى منزل" هنا"
...........................
فتحت" فاطمه" الباب لتجد" يوسف " أمامها
- سلام عليكم ..ازى حضرتك
- اهلا وسهلا انت مين ؟!
- انا "يوسف " مدير" هنا" ..جيت قبل كده فى عزاء الاستاذ "احمد" الله يرحمه
- اتفضل يابنى اهلا بيك
تركت "فاطمه" باب الشقه مفتوحا ..جلس" يوسف" فبادرته "فاطمه" قائله فى توجس
-خير هو فيه حاجه ؟
لم يعرف" يوسف " ماذا يقول فهو لم يحسب حساب أمها فقال
- لا انا كنت عايز" هنا" فى حاجه تخص الشغل
قالت فى لوم
- والحاجه دى يا ابنى مكنتش تستنى لبكره ...انت عارف اننا لوحدنا وميصحش يعنى تدخل البيت وهو مفيهوش راجل
قال فى احراج
- ياطنط صدقينى.. الحاجه دى مهمه ومتستناش ..انا اكيد مش قصدى اعمل مشكله
احست" هنا" ان امها انتقمت لكرامتها بدون ان تعرف ماحدث
خرجت لتقابل يوسف قائله
- اهلا يا بشمهندس خير
- اقعدى يا" هنا"
وقفت" نور" وراء باب غرفه" هنا" تسترق السمع لما يقوله ...فى حين دخلت "فاطمه" لتعد مشروب لضيافه يوسف
- انا اسف يا "هنا " على اللى حصل ..بعتذر بالنيابه عن "ميرنا"
- محصلش حاجه يا بشمهندس ..مرات حضرتك عندها حق
- مراتى !!..ميرنا مش مراتى ..دى طليقتى.. طلقتها من 3 سنين
قالت فى اندفاع
- بس اللى شوفته بيقول غير كده !!
ابتسم يوسف قائلا
- مش ملاحظه انك بتحاسبينى
ثم اكمل بجديه
- اسمعينى كويس ..انا فاهم "ميرنا" عايزه ايه هى بتستغل ابنى علشان تدخل حياتى تانى..
وتعرف اخبارى وانا بسايرها بس لحد ما اوصل للى انا عايزه ..ووقتها هتخرج من حياتى للابد
- حضرتك حر فى حياتك ..انا ايه دخلى فى كل ده ؟!
- عارف انك ملكيش دخل وان الموضوع يخصنى ..انا بس كنت فاكر ان امرى يهمك وانك هتساعدينى ..
نجح فى اشعارها بالحرج لم تستطع الرد
- قوليلى بقى انتى كنتى جايه فرحانه وشكلك عندك اخبار مهمه
- انا خلصت التصميم وكنت عايزه اوريهولك
- ده خبر حلو اوووى .. كده يبقى قربنا نخلص منهم ونبدأ شغلنا بجد
جاءت" فاطمه" وهى تحمل صينيه مشروبات فشكرها يوسف واعتذر مره اخرى على حضوره قائلا
- انا همشى دلوقت
ونظر الى "هنا"بنظره خاصه وأكمل
- وان شاء الله قريب نتقابل فى ظروف أحسن يا ست" فاطمه" .. سلام عليكم
.................
فى اليوم التالى
اعجب يوسف بالتصميم الجديد للمشروع وقاموا باجراء بعض التعديلات المهمه ليكتمل عملهم على افضل وجه
وجهز اوراق المناقصه لتقديمها فى اخر يوم بدون إعلام أحد
اما" على "و"اسلام" فقد بالغ يوسف فى مراقبتهم فى الاسابيع التاليه حتى تم الايقاع بهم
وهم يسلمون أوراق المناقصه لأحد رجال "حازم" واتهمهم "يوسف" بخيانه الأمانه
وتسريب أوراق خاصه بشركته وتم القبض عليهم
............................
- ايه الاخبار ي"عمر " ؟
- اتقبض عليهم بس للاسف "حازم" طلع منها
- ازاى بس ؟!
- اعترفوا انهم عملوا كده علشان الفلوس وان "حازم" مطلبش منهم حاجه
- معلش خيرها فى غيرها
-وانت عملت ايه مع" ميرنا" ؟
- طبعا رفضت انها ترجع البيت تانى ..واديتها مبلغ كده تبدا بيه حياتها ده لو فعلا عايزه تتغير ..
عارف الحاجه الوحيده اللى استفدتها منها ايه ... انى عرفت ان "هنا" بتغير عليا
- يا سلام ..وعرفت ازاى بقى
- بان عليها اوووى اما شافتها واقفه معايا.. واما اتكلمت معاها كمان وفرحتها اما عرفت انها طليقتى
- بس.. بس.. ايه الفرحه اللى فى صوتك دى .. تقريبا نفس الفرحه اللى كنت بتحكيلى فيها عن "ميرنا"
قال" يوسف "بانزعاج من ذكر "ميرنا"
- لا طبعا فيه فرق كبير اوووى .."ميرنا" انا انبهرت بيها.. كنت صغير ومعرفتش احكم عليها كويس ..
اتخدعت فيها وفى قشرتها لكن وقت ما اتجوزتها وظهرت على حقيتها عرفت انى عمرى ما حبيتها ..
لكن "هنا" حاجه تانيه ..مختلفه ..مش بس جميله من بره لكن كمان اخلاقها وشخصيتها
وكرامتها اللى مش بتسمح لحد يقلل منها ورقتها و..
قاطعه عمر
- بس انت لحقت تعرف كل ده امتى ؟ وازاى غيرت فكرتك عن الستات بالسرعه دى ؟
- كان عندك حق اما قولتلى مخليش تجربه واحده تأثر عليا
-بس انت متاكد من مشاعرك المرادى ؟!
-أيوه وهتاكد اكتر اما اتكلم معاها
- مش شايف انك كده بتتسرع اوى .. انا مش عايزك تكرر غلطتك وترجع تندم
- ما انت عارفنى ...انا لابعرف ألف ولا ادور ولا اخبى مشاعرى ..
- طيب وطنط ؟؟ مش هتحكيلها الاول وتاخد رايها ؟!
- اكيد هعمل كده ...هقولها النهارده واشوف
عند" حازم"
عرف خبر القبض على رجاله فاستشاط غضبا وزادت نيه الانتقام عنده
قام بالاتصال ب "ميرنا" وهو غاضب
- عملتى ايه ؟؟
- مفيش جديد " يوسف" رفض انى ارجع اعيش معاهم تانى .. بس كل يوم بروح اقعد معاهم بحجه "ادم "
وهو طبعا ميقدرش يرفض
- وانا استفادت ايه من كده ..انا عايز معلومات
- انا اتصلت ب "سها" السكرتيره وطلبت منها لو حصل اى حاجه جديده فى الشركه تبلغنى ..
وهى طلعت طماعه وهتعمل اى حاجه علشان الفلوس ..طبعا فهمتها انى بفتش وراء "يوسف "
علشان غيرانه عليه وخايفه يتجوز عليا وهى صدقتنى
- حلو اوووى ده
-وانت عملت ايه مع اللى اسمها "هنا "دى ؟!
الرجاله بتراقبها وبتراقب بيتها ..انا مش فاهم انتى عايزه منها ايه ولا هتفيدنا ازاى ؟!
- طالما" يوسف" مهتم بيها يبقى لها لازمه وضرورى نعرف بينهم ايه
- نتيجه المناقصه هتبان بكره ..وانا لو خسرتها مش هرحم حد ..حتى انتى
فى اليوم التالى فازت شركه يوسف بالمشروع الجديد ..عم الفرح الشركه بأكملها فهى خطوه كبيره بالنسبه لهم جميعا
- الفضل يرجعلك يا" هنا" فى الفوز ده
- انا معملتش اكتر من شغلى يا بشمهندس ..وكمان استفادت اوى وحضرتك حفزتنى كتير علشان اجتهد فيها
- طيب استعدى بقى ..الشغل الثقيل هيبدأ.. وانتى اللى هتشرفى على المشروع ده لحد ما يتسلم ..
دلوقت احنا هنروح نعاين الارض علشان نبدا شغل من بكره ..يلا بينا .
...........................
يعنى ايه المناقصه راحت ...انا هخرب بيتك.... بعد كل الرشاوى اللى دفعتها دى يخدها منى ازاى
مهو انا مشغل معايا اغبياء
ألقى بهاتفه أرضا ليتحطم الى قطع صغيره وهو يزفر فى غضب
- بعد كل ده عايز يكرر اللى عمله معايا زمان ...بس انا مش هديه الفرصه دى تانى ..هخليه يندم انه وقف قصادى
أخرج هاتف آخر من أحد أدراج مكتبه وقام بالاتصال بشخص ما
............................
- الموقع هايل ..هو بعيد شويه عن العاصمه بس ده بيوفرله الهدوء والخصوصيه
- عندك حق
ثم نظرت الى ساعتها وقالت
انا اتأخرت اوووى ..وميعاد رجوعى فات ومش عايزه ماما تقلق عليا .. ممكن نمشى ونكمل معاينه بكره
-ايوه طبعا .. اتفضلى
ركبت السياره بجوار "يوسف" فى طريق العوده مره أخرى
سألها عن دراستها وكيف تبلى بها ..أخبرته إنها تجاهد لتحافظ على تفوقها وتحقق حلم والدها وحلمها
تلقى" يوسف " مكالمه من مديره المدرسه التى التحق بها "آدم"
- الو ..ايوه انا" يوسف" ..
ماله" آدم "
ليصرخ قائلا
مستشفى ايه ..؟!!
يتبع
#لعنه_الماضى
أنت تقرأ
لعنة الماضي بقلم /مي محمد (مكتمله)
Romantikتحت ستار الظلام ترددت أنفاسه العاليه وسط السكون أخذ ينظر خلفه وهومستمر فى الجري حتى وصل الى مبنى من عده طوابق يحيط به سور ضخم... نظر الى الرضيعه بين يديه وقال فى ندم _"سامحينى..مش هقدر أخدك معايا ولا هقدر أحميكى منهم..ده أحسن مكان ليكى.. هنا هتك...
