الفصل الخامس
تجلس زينه مع حماتها وشقيقة زوجها يتحدثن سويا حول موعد ولادتها وعن مستلزمات المولود الجديد
هدي بتفاؤل:ان شاء الله تقومي بالسلامه ياحبيبتي ربنا يجبرك في اوانك ويخليكي لشبابك وبنتك
مي بمرح:ومهاب ياماما
هدي بحب صادق:المهم هي الاول يابنتي مهاب ابني وضي عيني بس الست مننا عمود البيت بتلم الكل حواليها ولو بعدت الكل بيضيع.. ربنا يحفظكم ويخليكم كلكم يابتي وتزيدو ماتنقصو ابدا
زينه:يارب ياماما هدي.. كان نفسي ماما تلحق تحضر ولادتي.. وحشتني جدا
هدي معاتبه:واحنا مش كفايه يازينه
زينه وهي تقبل رأسها:والله ياماما انتو عندي بالدنيا ربنا يطولنا في عمرك.. ويصلحلك الحال يا مي عن قريب
ليقطع كلامهم دخول مهاب ومعه احد الاشخاص
لم تتفاجأ هدي بل رحبت بالضيف بشدة.. ظلت زينه تنظر اليه بدهشه تعتقد انها تحلم او تتخيل
زينه:بابا.... انت ايه اللي جابك هنا... ليه يامهاب ليه
اسرعت زينه تبتعد عنهم وذهب مهاب اليها
توجهت زينه لغرفتها تشعر بغضب واشتياق .. فرغم رفضها التام لرؤية والدها الا انها كانت تتمني رؤيته.. مازال وسيما كما هو.. لم تغيره السنين.. كانت تتمني الاحتماء به وباحضانه ولكنها لن تفعل
مهاب:حبيبتي اسمعيني
زينه :قلتلك مش عايزة اشوفه... بتحطني قدام الامر الواقع
مهاب وهو يقترب منها لتهدأ : طيب اهدي عشان متتعبيش
زينه:ملكش دعوة حتي لو مت بيكون احسن..
مهاب واضعا يده علي فمها :متدعيش علي نفسك وتعصبيني.. ربنا امرنا ببر الوالدين حتي لو كفار.. وابوكي مش كافر يازينه.. غلط ورجع عن غلطته واعتذر وطلق الست اللي ضحكت عليه وبقاله سنين بيحاول يقابلك
كفايه كده ارجوكي انا مش عاوز من الدنيا غير ان ربنا يتمم نعمته علينا وتقومي بالسلامه.. سامحيه عشان خاطر نداء ومراد.. عشان ربنا يرزقنا ببرهم لما يكبرو
سامحيه عشان خاطري انا... عشان هوبا حبيبك
زينه بعيون يملؤها الحزن:مهاب ارجوك سبني براحتي
مهاب باصرار:لا لو مش بحبك هقولك براحتك.. لكن بحبك وعايز ربنا يرضي عنك
ظل مهاب يتحدث معها فترة حتي استجابت له اخيرا
مد يده اليها وامسك بها بقوة
مهاب:يلا ياقلبي انا معاكي متخافيش.. لو كنت اقدر كنت شيلتك بس اخاف علي نفسي وعلي شبابي ياحبيبتي ماشاء الله انتي بقيتي اكس لاااارج
زينه وهي تضحك مرغمه:ان شاء الله هولد قريب واظبط جسمي وهتشوف معجبيني
مهاب :ان شاء الله تولدي وتقومي بالسلامه ونجيب نونو جديد عشان محدش يبصلك
زينه:ربنا يخليك ليا يامهاب
مهاب :ويخليكي ليا يازينة الدنيا... يلا حبيبتي اعتبريه حد غريب.. ضيف وواجب نكرمه.. اوعي تزعليه يازينه ده في بيتك
توجهت زينه لمقابلة والدها الذي اعتذر منها كثيرا.. لتتغلب في النهاية عاطفتها واحتياجها لابيها لتلقي بنفسها بين ذراعيه تنعم بحنان ورعاية اب حرمت منها سنوات
مرت الايام وسافر سليم وجميله وسولي وتركو نداء والطفلين مع والديها واخيها.. كانت تشعر بالخوف من ابتعاد سليم ولكنها دعت الله ان يعيده اليها سالما
نديم:ايه يادودو من يوم ما الحاج سليم سافر وانتي ساكته وزعلانه
نداء :اول مرة يبعد عني فترة طويله كده يانديم.. كمان سولي وماما جميله وحشوني
نديم خلاص ياحبيبتي بعد بكرة ان شاء الله جايين
ليقاطع كلامهم اتصال لنديم
نديم:hi sofia.. I miss you too.. No i will come soon may be after three weeks... Ok baby see you
نداء بعد ان انهي نديم مكالمته:صوفيا دي الجيرل فريند اللي قلت عليها
نديم:ايوة هي
نداء:انت فعلا هتسافر وتسيبنا تاني
نديم :اكيد هسافر.. انا بس جيت مصر عشانك
نداء:وسارة يانديم
نديم:انا معجب بيها يانداء بس لسه مشاعري مش واضحه
نداء يبقي متعلقهاش بيك وتسافر.. ارجوك سارة بنت رقيقه ومتتحملش
نديم :حاضر يادانا
نداء:انا عارفه انك محتار ياديمو بس ارجوك متطولش في الحيرة دي.. انا محتاجه نديم اخويا جنبي
أنت تقرأ
وصفولي الصبر 1/2/3 بقلم نداء علي
Misterio / Suspensoتجبرنا الحياة اغلب الاوقات على اتخاذ قرارات نندم عليها لاحقا ولكن مرات تكون تلك القرارات قاتله للنفس والروح ومن يحب بصدق هو من يستطيع ان يقاوم تلك الظروف حتى وان قهرته في البداية لا يستسلم بل يحارب بكل قوته من أجل من يحب حتى وان أضاع سنين لا يمل ولا...
