هينة والغول

1

بقلم: #سناء_الصنهاجي

- جدة لحنينة
اعزيزة اعلينا
مني يسالي النهار
اندوروا اعليها اكبار واصغار
وآ راك للتحاجي
كايبداو الصغار بالخبير
حاجيتك وانسيت
حاجيتك اعلى راه راه
والغوت وراه
حتى تهدى الگلسة
وتحلى النعسة
عاد تبدى الجلسة
الله يرحمك آ دادا
تبدى بالصلاة على النبي
سيدنا محمد العربي
كان حتى كان
في اقديم الزمان
وتبدى القصة لولة
احنا نسمعوا وهي تگول
وتفرق لمعاني
احكاية الشر والخير
احكاية الصراع الأزلي
ما يطيب انعاسنا
حتى ننساو هم انهارنا
و نُعسو اخفاف
نفيقو اخفاف
لكتاف احديد
ولعقل اجديد
ومن بعد
ايجي الدور
اعلى الثالية بنت المنصور
القاطعة سبع ابحور
وعايشة الدويبة
الحادگة اللبيبة
واحديدان لحرامي
وشلا من اتحاجي
كل واحد وجداه
من امو ولا من اباه
تقوم بدور الطبيب النفساني
تعالج اهمومنا بالتحاجي
ودير الهم في الشبكة
شي يمشي وشي يبقى..
*** أما أنا حكايتي ليكم أبنياتي هاد المرة غير خليو لي فيديكم وجيبو دوك الهياضر المبطنة واجيو تجمعو حدايا نمتعكم ونسقي مسامعكم إيه كان حتى كان فواحد القرية سميتها قرية أولاد بن حدو هاد القرية صغيرة لي جنب منها كاين قصر قصر أيت بن حدو لمعروف عند الكبير وصغير معروف بسلطانو مولاي يوسف وختو سلطانة رحمة الأب ديالهم مات هذا شحال وبقاو عايشين مع الأم ديالهم لالة غيثة يوسف تولى الحكم من بعد موت باه كلمتو ماطيحش الأرض يبيت المظلوم بعشاه وظالم بلا كساه هيبتو وزين لي عطاه الله خلاه مقبول عند ناس وخصوصا بنات القبيلة فينما شافوه يتجاراو ويتخباو ورا نكابهم ولغميز ولهميز هو سلطانهم..
- هادي واحد 5 سنين قبل فواحد الدار جات فزاوية بابها زرق من حديد وكرارب الما معلقين فسواريها واقفين 6 ديال البنات كل وحدة وشنو تكول لتانية وضحكتها تسمع حتى لتلت الخالي..نقزات وحدة فيهم
- وهاد لالاهم هينة ديما معطلانا ومكنرجعو لديورنا حتى كيطيح الظلام...نقزات تانية
- وهانتي تشوفي ياختي حتى كنكولو مابقيناش نخلطو عليها ولكن مكنلقاو غير رجلينا حدا باب دارها...نباتها صاحبة هينة كان سميتها ياقوت
ياقوت : وباااز ليكم شحال فيكم ديال الهضرة والى كنتو حرات غرات ومزغرتة عليكم مكم 100تزغريتة سيرو بلا هينة وانتوما كلكم عارفات اللمة وجماعة ماتحلى غير بيها..
- ياقوت مالك اختي حنا غير ضاحكين وعارفين جماعة ماتحلى غير بهينة مولات سالف لي متلفة صابي وشارف(ضحكات) ههههههه😂😂...تفتح الباب وسبقات رجل بشربيل فالحمر وطلات  بتبسيمة وعين كبيرة مشفرة مكحلة وشعر من جمعة ديالو باين طويل واصل لتراب الأرض لونو بحال لون العسل شفايف عرات بيهم على سنان بحال جوهر وتبسيمة زينة تأسر لقلوب وتأسر العيان..
ياقوت : وعلى السلامة الالة العروسة كون اكلستي شوية مزال
هينة : عاوتاني ياربي واش هاد الميمون عندي نفس الهضرة عاود شوف ليك شي كلام خور
ياقوت : ماشي انا البنات لي عياو
هينة(ضحكات) :
- عياو ايوا انا مضربت حد على يديه ولا رجليه وطريق باينة والعواد معروفة بلاصتهم ولالا؟..نفزات فطيطيم
فطيطيم : ولاواه أهينة حنى راه غير توحشناك وتوحشنى قوافيك وكلامك داكشي باش ماقدينا على بعادك وتعطالك...صغرات هينة فيها عينيها
هينة : أحيانة عليك أعود سبسي ديال عمي دريس وكون ماكنت كنعرفك حتى نتيق ويلاه يلاه خلاص قبل لا يظلام الحال...تجمعو البنات وشدو طريق الغابة يجمعو الحطب ويرجعو قبل ما شمس تغرب..