هينة والغول

29

داز المنظر كلو قدام عينين هينة فلمحة بصر ماعرفات باش تبلات ولا كيفاش غادي دير ولا كيفاش غادي تصرف ماعرفات تغوت ولا تبع هاد الطير لي طار ديك الساع بحال الى مكان واقع والو...نزلات من على العود تولول وتضرب فخاضها وتكول
- انا سباب انا سباب كون غير بقيت عند الغول...بدات تبكي وتنوح ولكن البكا باش غادي يفيدها وباشمن عين اترجع شنو اتموليهم انا سباب السلطان حتى سرطو طير وطار..بقات كالسة وشادة على راسها... داز شحال وهيا شادة راسها بين يديها حتى حسات بشي نفس حدا وجها هزات راسها بسوية وتنفضات منين بانت ليها كلبة واقفة قدامها وكتشوف فيها ودور فيها راسها هينة بلعات ريقها عرفات راسها منحوسة..حتى سمعات صوت لي صدمها
- مالك حزينة وعلى فراق السلطان غبينة ماتبكيش وتغميش السلطان مزال عايش خاصك غير تعرفي فين تمشي ليه وتجيبيه..هينة سكتات وبقات غير كتشوف فيها لسانها تسرط...رجعات الكلبة دوات :
- شديني وبالخنجر سلخيني ولجلدي لبسي ولعود سيري
هينة : كك كيفاش نسلخك ا انا نسلخك لا لا عفيني عفاك منقدرش ندير يدي فيك
الكلبة : متخافيش كولشي ساهل ماهل وانا نعاونك عليه غير هزي الخنجر فيدك وحطيه عل  ظهري...بلعات هينة ريقها او وقفات مشات لعود وهزات واحد الخنجر إيديها كيترعدو حطاتو بشوية على ظهر الكلبة حتى كتبان ليها الغبرة والعجاجة نايضة كتشوف فراسها بجلد الكلبة تكسات ولي شافها يكول كلبة حقيقة...مشات العجاجة ومابقى بان حتى واحد غير هينة بوحدها وهيا متخفية فجلد الكلبة ستغربات ولكن قررات دير لي عليها ولي وصاتو عليها الكلبة وتشوف فين غادي توصل ركبات فوق العود وزادت...غادية ومعارفة لفين غادية حتى بان ليها واحد السراح سارح بالغنم ديالو..ضار كتبان ليه الكلبة فوق العود كتشبه لكلبتو لي ضاعت...تم جاي عندها وفرحان..
السراح : الله كلبتي رجعات وفين كنتي يا لحنينة وجايا بعود افرحي واسعدي...جر العود وهينة بغات تهضر ولكن ماقدات خافت على راجل لا يكول بلي راها شي جنية ولا مسكونة...خداها هيا والعود لدارو وبدا يعيط على مراتو تخرج...غير خرجات فتحات عينيها وفرحات تزغرت :
- الله كلبتنا رجعات الله كلبتنا رجعات...فرحت السراح ومراتو مكانت بحالها فرحة اما هينة عير ساكتة وصابرة على مكتوبها اللهم الكوري مع البهايم ولا تبات فلخلا يفرسوها الذياب...راح الليل جاب السراح النخالة لبهايم ولكلبة...بقات هينة تشوف وساكتة ومبيدها حيلة خرج السراح وسد على هينة وعلى البهايم...شوية حتى كتسمع صوت طير تحط فوق الكوري حلات ودنيها مزيان او وقفات قربات لواحد السرجم صغير من القزدير كتشوف فسما وفليل وفنجوم حتى سمعات صوت مخافيش عليها صوت السلطان يوسف :
- هينة وا هينة واشنو عشاك أحبيبة قلبي الليلة؟
هينة(تنهدات) :
- عشايا النخالة وركادي بين الخوالف(البهايم)
السلطان : قرحة قلبي قرحة ماتشفى ماتبرا...سمعات صوت الطير طار...رجعات لبلاصتها ونعسات...هذا كان حال هينة كل ليلة حتى لواحد النهار...دق جار السراح الحاج مسعود خرج عندو السراح وبعدو على دار وبدا كيعاود ليه مسعود علاما كتسمع مرتو كل ليلة
مسعود : واش عندكم شي مرة أموحا فدار؟
موحا : لا معندنا حد غير انا والمرة وبنياتي والبهايم والكلبة
مسعود : لعجب مولات دار كل ليلة كتسمع شي طير كيحط فوق الكوري ديالكم وكيكول هينة وهينة واش عشاك احبيبة قلبي الليلة وهيا كتجاوبو كتكوليه عشايا النخالة وركادي بين الخوالف...موحا ستغرب ومافهم والو مسعود دخل ليه الشك رجع لدارو كيخمم ويكول ماخمم مشا عند مراتو وكاليها :
- هاد الليلة ديري لينا الفتات(التريد) وديه لبهايم ولكلبة ومنين تعشا جيبيها ودخليها ونعسيها بين البنات...مراتو ستغربات :
- اويلي أموحا على بين البنات؟
موحا : كتجاوبي معايا كتليك نعسيها بين البنات...خلا مراتو حايرة وخرج على برا مشا لكوري كيطل من داك السرجم وحاضي الكلبة لي لاحظ بلي فيها شيحاجة ماشي حتى لتما...رجع لدار كيتسنا العشا يمتى يأدن...راح الليل وسدل ستارو حطات مرت موحا العشا تعشات هيا وبناتها ودات لي بقا لكوري حلاتو حطات الماكلة لبهايم ولهينة لي كلات حيت كان فيها جوع بزااف من نهار جات وعمرها داقت النعمة من غير الما...عسات على لكلبة حتى كلات ونوضاتها خرجاتها وداتها دخلاتها على بناتها ونعساتها حداهم كيفما كاليها راجلها...مشات النرة تنعس وبقا السراح موحا عاس على باب بناتو وحاط ودنو كيتسنط...بحال كل ليلة حط الطير جنب سرجم ديال بيت البنات ونطق وكال :
- هينة واهينة أش عشاك أحبيبة قلبي الليلة؟
هينة(تنهدات) :
- عشايا الفتات وركادي بين البنات
السلطان : فرحة قلبي ماقداتها فرحة...رجع طار من جديد وماولاش...دخل السراح على هينة هيا تخلعات وماعرفات باس تبلات...خىجها لبرا وكلس حداها وكال :
- شكون انت واش إنس ولا جن؟
هينة : انا إنس بحالي بحالك أسيدي
موحا : ولكن كيفاس وعلاش؟.عاودات ليه هينة الحكاية من لول الأخر ومانساتش حتى سلطان يوسف من الحكاية..

السراح تعجب لحكاية هينة بقى غير ساهي وكيشوف
موحا : معرفت منكول والله نوضي نوضي ابنتي تنعسي يصبح ويفتح...ناضت هينة جنب لبنات ونعسات..ولا نكولو نص نعس ونص العقل مشغول...صبح الصباح فاق موحا بكري وقصد الفقيه ديال جامع...دخل عندو من بعدا الترحاب عاود ليه موحا لي وقع بتفصيل وطلب منو شي حيلة ولا شي حل
الفقيه : أمر عجيب هذا عمري سمعت بيه لا من عقال ولا من علماء وحكماء هادشي كنا نسمعو بيه شحال هادي فالقديم اما فهاد الوقت عمري ودني سمعات بيه سمعني مزيان اموحا غادي تصدق بواحد من الغنم لي عندك دبحو ودير وليمة كبيرة وتعرض على كاع الطيور لي كلى وطار راه ماشي هو ولي تقال وبقى عرف راه هو مول هادشي
موحا : ولكن اسي الفقيه كيفاش غادي نعرض على هاد الطيور؟
الفقيه : نوي اموحا نوي نويها فخاطرك...يلاه صلي معايا جوج ركعات...مشا موحا مع الفقيه صلى معاه وخرج مشا لدارو خرج واحد الحولي من الغنم ديالو سما الله ودبحو وكيف كاليه الفقيه نوا فخاطرو بلي هاد الوجيبة هدية لطيور...باش ياكلو ويشبعو...مرتو لي كطيبة ومافهمات والو...خرج داك الحولي على حقو وطريقو وحطو ورا دارو فواحد الوسعة وكلس كيتسنى بقى مدة حتى فقد الامل عاد تمو طير بطير هابط على ديك الوليمة كانو هوما 3 طيور كبااار كياكلو ومامسوقين لحد حتى سلاو كاع داك الحولي رجع طير لول بلور وطاار رجع تاني بلور وطاار رجع الثالت بلور يلاه ايطير وهو يرجع طاح حيت تقيلل موحا جمع الوقفة وتم جاي لعندو كيجري الطير كيشوف فيه بعينيه..حتى نطق السراح
- طير أطير حط ليا ولدي..جاوبو طير بصوت تقيل :
   - نحطو ليك عور
موحا : طير يا طير كلت ليك حط ليا ولدي
الطير : نحطو ليك زحااف
موحا : كتليك حط ليا ولدي كيف سرطيه...تما الطير ماقدش مزال يبقى صارطو ديك ساع لاحو...كان يوسف سخفان..دخلو السراح لدارو فرش ليه فراشو وكساه بكساتو وكلو وشربو وتهلى فيه حتى رجع لوعيو..
موحا : على سلامتك أولدي
يوسف : الله يسلمك ويحفظك وينجيك بلا بيك مكنتش عرفت شنو ندير
موحا : ماتشكرنيش انا شكر هينة مسكينة هيا لي عاودات ليا لي بيك...تمات جايا هينة على داك الشكل كلسات جنب يوسف...لي حط يدو على راسها
موحا : شنو ادير دابا أولدي؟
يوسف : ماعرفتش اش المعمول خاصني نرجع هينة كيف كانت
موحا : كيبان ليا اولدي هاد جلد الكلبة لي على ظهرها بحال شي لعنة ولي شي سحر وخاصو يتبطل
يوسف : وكيفاش؟
الفقيه : اتمشي معايا عند واحد الفقيه ديالنا الله يعمرها دار هو ايفك لينا هاد الحجاية هادي..ناض يوسف مع موحا وقصدو فقيه جامع من بعد الهضرة ولكلام دخلو فالمعقول عاود ليه موحا على لي واقع لهينة ولي كان عارفو الفقيه من هضرة موحا لولة
الفقيه : شنو انكوليك اولدي الحل ديال هاد البنت بين يديك انت
يوسف(بستغراب) :
- كيفاش؟
الفقيه : هاد البنت باش ترجع كيف كانت بنية تسر العين واجب عليك تزوج بيها على سنة الله ورسوله تخطبها من والديها ودير ليها عرس بحال أي بنت تلبسها التاج والقفطان وخيط الريح..يوسف بقى كيشوف نطق السراح :
- ولكن هذا راه سلطان كيفاش ايقبلو اهلو وناسو وحبابو انو يتزوج...(سكت)
يوسف(بلا تفكير) :
- انا قابل أسي الفقيه ولي كلتيه غادي نديرو ومن دابا انشد الطريق...وقف يوسف وخرج تبعو موحا ماوقفو حتى لدار بلا كلمة بلا زوج هز حوايجو وسرج عودو..ركب هينة لور وشدها مزيان باشما طيح او وقف مع موحا..
يوسف : سي موحا الله يجازيك بيخير على كاع لي درتيه معانا نتسالك زيارة موحبا بيك وألف مرحبا
موحا : لهلا يخطيك اولدي الله يكمليك كولشي بيخير وينصرك ويحفظك ويحرسك...عنقو يوسف ركبو على العود وشد الطريق...