هينة والغول

10

صبح صباح جديد بشميستو السخونة...بدا سلطان كيحل عينيه شوية بشوية وريحة أتاي منسمة بنعناع كتعطي فتح عينيه مزيان وتوكض جمع الكلسة وكيشوف حداه كيبان ليه توب مفرش محطوط فوقو الخبز وزبدة والعسل وزيت وبراد ديال أتاي وهينة كالسة مربعة رجليها كتشوف فيه..
هينة : صباح النور والهنا وسرور على مولاي سلطان كيصبحتي مزيان؟
يوسف : نحمدو الله ونشكروه معاش فقتي كاعما سمعتك؟
هينة(ضحكات) :
- أنا شقايا حسي مسي ماسمع حد لغايا وعياطي المهم هو الفطور واجد وانوض راه شوية ديال الما فداك الغراف ديال طين غسل بيه وجهك وشلل بيه فمك واجي تفطر راه كتسناك غير ليمنية..
يوسف : واخا غير بداي انا جاي
هينة : لاواه مكنحملش نبدا الماكلة ونبقى نتسنى ناكلو بجوج حسن باش نتهنا
يوسف : واخا يالالة واخا...جمع الوقفة كتبان ليه خيمتها مجموعة وملمومة هز داك الغراف ديال الما بعد شوية غسل حالتو وطرفها ورجع لعندها خلى وجهو ينشفو الهوى كلس قبالتها غير كلس هزات براد ديال أتاي سمات الله وكبات فجوج كيسان صغار
يوسف : إيمتا جبتي معاك هاد البراد وهاد الكيسان؟
هينة : جبتهم معايا من دار مايمكن نجي بلا بيهم فاش انعمرو أتاي سفر كيبغي تكون واكل وشارب باش تقد تمشى ومايتهدش حيلك هاك بسم الله...شد الكاس عندها كيشوف فيها
هينة : غير سمي الله وشرب راه انشرب من نفس البراد مافيه سم مافيه سحور
يوسف(ضحك) :
- متحتاجيش تكولي ليا هادشي أنا عارفو حيت كون كان فهاد الكاس شيحاجة تنداس ماطلعش رزتو بحال هكا
هينة : تبارك الله عليك هيا فخبارك قصة أتاي لي كانو مكايشربوه غير لملوك هذا زمان وكانو كيعرفو واش فيه سم ولالا غير من رزتو حيت الكاس ديال أتاي كيبقى ديال أتاي الى مشيتي حتى درتي فيها حاجة من غيرو مكيطلعش برزتو واخا يكون داك الكاس دراي فيه غير الحليب أتاي مكيبقاش يطلع فيه داكشي باش كاس أتاي خاصو يبقى ديما غير لأتاي
يوسف(جغم من كاسو) :
- معندي مانسالك حافظة سواريك وماشي لي جا يديك
هينة(ضحكات) :
- فطر بصحة وراحة...فطرات هينة هيا ويوسف بخبز دار وزويتة بلدية رجعو روح سبقها يوسف جمع خيمتو وقادها..عاد لحقات عليه هيا جمعات دوك الماعن ولي شاط خباتو قدات رزامي على الحمار ديالها...وشدو طريق من أول وجديد..
- هينة : ياربي هاد النهار مايكون بحال غيرو ياربي مايكون الهم تدبيرو ونباتو فالخلا بحال البارح على الله يبان شي دوار
يوسف : غير زيدي وتبعي طريق وإن شاء الله يكون خير...
هينة(تنهدات تنهيدة طويلة) :
- كتجينى المصايب وكتمشي ومكنعرفوش كيفاش تحلات ورحلات هذا لطف من عند الله كيتبعنا بلاما نحسو ولا ندراو لطف ربي كيجري وعبدو ماكيدري..
شاف فيها يوسف ورجع حط عينو على طريق ساكت...كملو مسافة وهوما غاديين حتى حسات هينة برجليها سخنات وعيات وقفات قدام واحد الشجرة تظلل بظلها
يوسف : الى بقينا على هاد الحال موحال نوصلو لشي بلاصة
هينة(كتلهت) :
- انا راه غير ولية ومن دم ولحم وراني عييت ورجليا طابو واش بغيتيهم يتسلخو واش شوية بشوية..شوية سكتات
هينة : أجي بحال الى كنسمع القرآن كيتقرا لا؟
يوسف(مستغرب) :
- ماسمعت والو الى سمعتي انت ماعرفت
هينة : وغير حل ودنيك مزيااان وسمع والله الى صوت القرآن بحال الى شي واحد كيجود...يوسف سكت وطلق ودنيه شوية على حجبانو
يوسف : هادا شي كنازة صوت القرآن ديال شي كنازة سمعي...طلقات ودنيها مزيان وتبسمات
هينة : والله الى بصح وهيا دوار قريب بزااف من هنا
يوسف : داكشي لي بان ليا ويلاه خلاص بلاما نضيعو الوقت
هينة : نرتاح أشوية..مخلاهاش تكمل جرها من إيدها
يوسف(غادي بيها وهيا جارة حمارها) :
- نوصلو وأراي ماترتاحي اما دابا مكاينة راحة..