هينة والغول

11

عطاتو بظهر وقصدات العطار مول دكانة لكبيرة رسمات تبسيمة على فمها ودارت نكابها خلات اعينيها لمكحلين زينين لي كايقدفتنو هوما لي يبانو
هينة : هاواحد السلامو عليكم
العطار(على عينو فيها وفعينها تسحر وحمارو خدودو تكول اولد 10سنين كيحشم) :
- وعليكم السلام أهلا وسهلا ومرحبا مرحبا أش خاصك الالة سواك ولا كحل واخا هو متحتاجي لحتى واحد فيهم تبارك الله عينيك غزلااان من عند الخالق سبحانه
هينة(ضحكات) :
- الله يكبر بيك أسيدي انا ضيفة على هاد الأرض وجيت طالبة ضيف الله ولكن ماجيتش بيديا خاويين
العطار(عينيه كيلمعو) :
- مرحبا بضيف الله هاد الزين كامل ويكون ضيف عندنا الى مساعتك الأرض تسيعك كفوف يدينا يازينة
هينة(فخاطرها) :
- الله يمسخك ياشيبة العاصية بقى ليك شبر لقبر وكتغزل فقد حفايدك...هههه ربي يخليك غير هو كوليا كنقلب على شي واحد لي كايشري نبايل ولخلال
العطار : السوق عامر غير بتجار ذهب والفضة والنحاس
هينة : لاواه ماعطاوناش سومة لمزيانة كول واحد فيهم كينقص لينا حاجة والسلعة مضمونة وخويا هو لي مقادها بيدو...سكاات العطار كيفكر شحاااال
العطار : بلاتي بلاتي كاينة واحد السيدة لالة الباهية فينما كان شي خلخال ولا شي نبالة ولا سلسلة وخاتم كاتشريهم هيا لولة الما كتجمع راه عندها حصيصة لي تحرك ماتم سوا كان ذهب ولا فضة ولا نحاس تشريه كيفما بغا يكون نوعو غير همها ماتكون سلعة عند غيرها وتبان بيها هيا بوحدها فالقبيلة
هينة : همممم إيوا هاديك هيا مقصودنا ومورادنا ولكن فين نقدرو نلقاوها؟
العطار : كلسي هنا انت وخوك هيا كل صباح كتجي عندي تقدى وكتمشي هذا هو وقتها نيت كلسو بينما جبت ليكم كيسان ديال اللبن عاد تنخض من المعزة ليكم كلسو....د
  - دورات هينة راسها شافت فيوسف لي غير كاينفخ معاجبو حال غمزاتو باش يكلس...دار بكلامها وسلم أمرو لله وكلس خرج العطار من حانوتو بجنب بسيف كرشو سادة عليه باب المحال....دار مع دورة غاب 5دقايق وتم راجع بجوج غرارف ديال النحاس عامرين بلبن مزال بزبدة ديالو مد لهينة غراف هيا لولة وعينيه غير كيبريو عاد مد ليوسف غراف ورجع لدكانو...لبن كان بارد ومجتاجاه النفس...شوية وقف عليهم ظل علات عينة راسها كاتبان ليها مرة قصيرة وعريضة شوية كلها مزرزرة بالخواتم وشرتلات دايرة حايك بيض ونكاب مطروز.. وقفات وسلمات..
- أصباح الخير أسي معتوق لباس عليك
معتوق : أهلا أهلا بلالة الباهية مرحبا بيك
الباهية : ربي يخليك كاينة شي حنة زينة كيف كنبغيها عنداك تكون مخلطة مع أزاز تكون هضرة وريحة زينة مافيها نخالة مافيها عواد ودير ليا معاك جوج قراعي ديال الكحل يكون غري...وزيد معاهم صابون البلدي والورد والخزامة وزيد ليا حتى القرنفل مطحون
معتوق : واهيا شي تحميمة دايزها الكلام؟
الباهية : بحال الى علمك الله...هينة عرفاتها هيا صاحبت دعوتهم حطات الغراف من يديها او وقفات مع الوقفة طيحات نبالة من نبايل لي صايب يوسف...دورات الباهية راسها وقشعات شنو طاح...عينيها خرجو كيبريو هينة قشعات شوفاتها وضحكات ولمورادها وصلات..يلاه أتحنى تهز نبالة حتى تحنات الباهية وهزاتها قرباتها من عينيها وكتميز فيها وتقلب...حتى حطات عليها هينة يديها
هينة : الله يكبر بيك كون تجلات كون ماعرفت شنو أيطرا ليا
الباهية : هي عزيزة وغالية؟
هينة : كاع صنعت ليد عزيزة وغالية
الباهية : أول مرة كنشوف هاد النوع فسوق منين جبتيها؟
هينة(ضحكات) :
- وعمرك مغاتشوفيها حيت لي صانعها خويا ولد مي وبويا...نقز معتوق :
- هاد الناس ضياف فالقبيلة عندهم سلعة زينة وكيقلبو على لي يقدرها ويشريها..
الباهية : ودابا عاد كتكولها أمعتوق زعمة راك عارفني...نقزات هينة :
- ولي ماعرفك خسرك الالة
الباهية : عندمن جيتو بعدا؟
هينة : حنا غير طالبين ضيف الله فهاد القبيلة كنتوسدو الأرض ونتغطاو بسما ونجومها
الباهية : ولاواه الباهية هنا وتعسو على برا مرحبا بيكم عندي من هاد النهار أنتوما ضيافي والى كالت الباهية شي كلمة مكترجع عليها..هينة غمزات يوسف بالخف ودارت تبسيمة على وجها
هينة : ومكاينش لي يرفض ليك كلمة الالة الباهية خاطرك فوق كاع الخواطر..