هينة والغول

16

#فلاش_باك
هينة : انا كنسمع غير أرى ماعندك
يوسف(هاز حجبانو سود) :
- الحل هو نكولو ليهم بلي حنا مزوجين ولكن قبل مايصدر الشيخ قرار زواجو بيك
هينة(بستغراب) :
- وكيفاش غير انجيو ونكولوها ليهم بلا موجب شرع؟
يوسف : زعمة انت مولات الحيلة ومولات الحكمة... فبحال هاد الليالي كيسبقو الماكلة عيا لولة يتعشاو الناس ويعمرو الكرش ويسكتو الراس عاد لي بغى يتكال يتكال
هينة : أياااه وباش عرفتيها؟
يوسف(غوبش فيها) :
- بعد المرات كتعيطي على زلط وعلى لغباوة وتكولي انا مولاتها ماضرني غير ضاربين بيك المثال فاالقبيلة
هينة : حتى واحد مكامل من غير الله سبحانه وماشي انا جامعة كولشي فدقة وحدة شوية هك وشوية هك
يوسف : زعمة انا راه سلطان وبحال هاد الليالي والوجبات كيكونو فالقصر ولالا😒
هينة : بصح عندك الصح كمل
يوسف : من ورا العشا تقيل كيجي أتاي ديما هادي فكل وجيبة انا غادي ناخد ليك أتاي من يديك ونكوليك بلي واعر عليك على قبل الحمالة هنا الشيخ مايعرف باش يتبلى غادي يسول ويسال وغادي نكولو ليه بلي حنا مزوجين
هينة : اهاه والى ماتاقش بينا ماشفتيهاش
يوسف : غادي يتيق الى عطيتو امارة مايعرفها غير راجل ومرتو
هينة(هزات حاجبها كتشوف فيه) :
- بحالاش زعمة هاد الأمارة تاني؟
يوسف : بلاما عقلك يخطط بين شمال والغرب غادي تكولي ليا شي أمارة فيك ماشفتها غير عينك انت ولي ولداتك...هينة سكتات وحشمااات بقات تفكر ورجعات شافت فيه
هينة : عندي خالة حدا صرتي عمر شافها حد من غيري انا ومي
يوسف : دابا مزيان هكا الى كدبنا كدبتنا ايتيقو بيها والى شيخ سيفط وحدة من عيالاتو يشوفو الخالة ايتيق بلي حنا مزوجين نيت😉..
↩↩
#عند_الشيخ
فبيت الشيخ لي كان عندو طابع ملوكي شوية بطبعو عزيز عليه الترف ويزيد فيه واقف وداير إيديه ورا ظهر...هز واحد الجرس صغير من نحاس حركو ودخل واحد من عيانو..
- نعام أسيدي؟
الشيخ : عيط ليا على منانة؟
- واخا أسيدي...مشا الخادم يعيط على منانة الخدامة...لي جات بزربة دقات عاد دخلات
منانة : نعام أسيدي طلبتيني
الشيخ : سمعيني مزيان شنو غادي نكوليك..اتمشي عند الضيفة الجديدة غير انت وهيا راس فراس وشوفي واش لحمها فيه شي علامة ولالا
منانة : كيفاش أسيدي ؟
الشيخ : واش كنهضر بالعبرية فتحي معايا مخك شوية شوفي كيف ديري ديها لحمام ولا شوفي كيفاش الموهيم هو تشوفي لحمها واش فيه شي شامة ولا أمارة بغيت الخبار ليلة قبل غدا يلاه سيري...خرجات منانة وهيا كتهضر غير مع راسها
منانة : الله ياربي كيفاش انشوف لحمها ماحدها تقاقي وهيا كتزيد فالبيض الله يخرجنا من هاد جرة بلا تهراس...قصدات منانة بيت هينة دقات ودخلات
منانة : سمحيليا الالة على هاد الدخلة ولكن سيدي وصاني دخلي تغسلي وتريحي قبل ماتنعسي
هينة : غير سيري انت انا غادي ندخل واحد الشوية
منانة(بلعات ريقها) :
- غير خليني هنا الله يمسي عليك بالخير وربح ورجى الالة حيت سيد الشيخ وصاني نغسل ليك بيدي نغسل ليك شعرك بلورد والغاسول ونغسل ليك بالحنة والقرنفل والخزامة😊
هينة(تبسمات) :
- ااااه كولي شيخ بغاك تأكدي من كلام راجلي واش صحيح واش لحمي فيه شي علامة ولا شي شامة ونكون كنكول كلام صح ما كذابة مانصابة واخا أجي معايا...دخلات هينة ومنانة لي حشمانة معاها لحمام...من بعد شوية خرجات منانة حادرة راسها خرجات من الباب بلا كلمة بلا زوج قاصدة بيت الشيخ وهيا تنعل فيه وتعاير فسرها...دقات ودخلات لقاتو على نفس الوضعية مدارش عندها حدو سولها
الشيخ : أمضرا؟
منانة : سيدي تبارك الله ماشاء الله سبحان لي صورها من غير واحد شامة ربي عطاها ليها فكرشها وجنب صرتها...صافي شيخ رضى بلي كان أشر بيدو لمنانة تخرج وخلاتو بوحدو يلعن فحضو لي كان شوية وميمونو ايتسكد ساع زهر المتعوس ينبش عليه..

صبح الحال وكل نهار وصباحو وكل نهار وصياحو كل نهار وزهرو كيف داير ناضت هينة ويوسف كيف تافقو لبارح باش غير يصبح عليهم الحال وشمس تبرق يشدو رحال براكة مشافو فهاد القبايل وكيف كالتها هينة مغادي يوصلو لقبيلة ألف ليلة وليلة حتى ايطرطق ليهم الشيب فنواضر ويا يوصلو مربوحين ولا مدبوحين...
- خرجو هازين حوايجهم فيديهم لوسط الدار حتى وقف عليهم الشيخ كيشوف فيهم وعلى وجهو تبسيمة ومعاه عيالاتو بتلاتة بيهم
الشيخ : شفتكم جمعتو رحيلكم وسخيتو بينا
هينة : إيوا خلاوها ناس زمان الله يرحم من زار وخفف وضياف النبي تلت يام بلاما نتقلو عليكم كثر يلاه نوصلو
الشيخ : لالالا ماشي بساهل لي كيدخل لهاد دار مايخرج حتى نكرموه ونتهلاو فيه ونحطوه فعينينا
يوسف : كرمتونا ودرتو كتر من جهدكم الله يكبر بيكم ويعلي مقامكم
الشيخ : هادشي غير شوية من بزااف كيبان ليا انتوما يلاه تزوجتو وتجمع شملكم داكشي باش قررت ندير ليكم عرس زاهي باهي نزوجوكم على تقاليدنا وأعرافنا ديال القبيلة...يوسف سكت اما هينة وحلات ليها
هينة : كك كيفاش زعمة؟
الشيخ : عزيتو علينا داكشي باش بغينا نفرحو بيكم وبالحمالة جايا انعاودو ليكم العرس نزوجوكم على تقاليدنا لي معروفة المرا تلبس الراجل خاتم من نحاس وراجل كيلبس المرا خاتم من فضة فيها تلاتة دالحجرات بيضين باش لي شافهم فيديكم يعرفكم مزوجين ومايوقعش الغلط لي وقع معانا حنا يلاه أسيادنا وجدو ريوسكم الليلة ليلتكم...عطا الشيخ الاوامر لعيانو ولخدم باش يباليو بهاد الليلة اما عينة ويوسف بقاو واقفين فبلاصتهم دارت شافت فيه كترمش يلاه اتهضر...حتى جراتها منانة وشي بنات أخرين
منانة : لالة جا وقت الحمام الليلة ليلتك...تنو غاديين بيها حتى غابت على عينين يوسف.. لي واقف متبعها بالعين حتى حس بشي ظل واقف حداه..دار يوشف شكون بانت ليه مرات الشيخ الغالية كتشوف فيه مبسمة
الغالية : كايبان ليا فعينيك الفرحة وتبسيمة عاجبك الحال ماشي بحال هينة لي صدمة هيا مولاتها
يوسف : معرفتش شنو كتقصدي؟
الغالية (ضحكااات) :
- مقصودي باين او وصل بلاما درق الشمس بالغربال عينيك فاش كيشوفو فيها كيلمعو بحال شي نجمة وسط الليل مبسمة كتبقى متبعها بعينك حتى تخفى وهادشي باين فعينيك هادشي كيسموه ناس العشق والغرام وانت دايب ومعشوق فحبها غير ماباغيش تبين ودليل قدامك باين كيفاش مابغيتيش الشيخ يحط عليها العين وكيفاش درتي هاد الحيلة باش تنجيها من زواجها ليه ودابا ماهضرتي مانطقتي بحال الى عجبك الحال ومرتاح وفرحان ههههههه ماعندك ماتخبي اسي يوسف كولشي واضح بحال شمس وسط الغيام..طلعاتو وهبطاتو بضحكة خفيفة مشات وخلاتو...شحال وهو واقف كيفكر فكلامها لي كالت ليه عقل متيق هضرتها وعقل ماباغيش يرضخ ليه...سمع سميتو ودار بان ليه الغريب ديال ديك نهار كيعيط ليه يتكلم لسيد الشيخ...حدر راسو ومشا لعندو..
- هينة فوسط الحمام ضايرين بيها البنات ولعيالات يدهنو ليها بالحنة والخرقوم البلدي الحر ولقرنفل وهيا عقلها مكاينش هنا حتى كتكول صافي سلكات وخرجات وتعاود طيح من سما لأرض أش هاد المصيبة طاحت تاني فيها واخا هيا مصيبة زوينة لي يلاه خلاتها تبسم شوية جمعات تبسيمة
هينة (مع راسها) :
- واش عارفة راسك فين مليوحة يا هاد هينة لهبيلة ومزال كتفرنسي وتبيني سنانك بحال العتروس لي عاد دبحوه وشوطوه ياربي تفكني من هاد الوحلة بالحيلة بلا عار...
- عاطياهم يديها وسالفها يغسلو ليها ويدهنوها بالحنة من راسها لرجليها وهوما يغنيو ويصلو على نبي ويزغرتو كيرددو بفم واحد :
- سانية والبير والمجاري لالة لالة
- سانية والبير والمجاري لالة لالة
- وين نروح سماح يا عين وين نروح صبري لله...
البنات بيها فرحانات أما هيا كتسنى غير لوجيبة لي تلاقيها بيوسف ويخرجو من هاد الغار لي ماعندو باب...
#يتبع