هينة والغول

7

فالقصر كان سلطان واقف كيسرج عودو باش يشد طريق من تاني وجديد ويرجع يقلب مغادي يهنى ليه بال حتى يلقى ختو وهذا لي داها...ركب فوق عودو محزم بسيف ديالو وملتم شد طريق بعودو ولكن بحال الى كيدور غير فالخوا فين ايمشي وفين ايجي وهو معارف هادو لي خطفوها فين داوها كون بغاو المال كون سيفطو مبعوت ولكن مزال مبان حتى واحد فيهم زعمة يكون فعلا داو رحمة هدية لشي سلطان لا موحال مابغاش يفكر فيها حتى تفكير ختو شقيقتو روحو وتاج راسو غير كيتفكر هادشي وتجي لراسو أفكار خبيثة كيشعل شعيل..عيا يدور ويقلب ولكن والو مبانش ليه راس الخيط الشمس ضربات ورجع قلبو خايب وظهرو مكسور...دخل لقصر..ومشا لبيتو نيشان كلس فوق الكرسي ديالو قدامو كثرت سلوكة مدهبين شدهم بين إيديه كيدور فيهم ويقاد فيهم كلما كان مهموم ولا مغموم وحتى فرحان كيجي لبيتو ويديه كيبدعو ويخرجو أحسن حلي من خواتم ونبايل...سمع دقان فالباب أمر بدخول...دخل موسى حادر راسو ونطق
- مولاي درنا داكشي لي كلتي وراه فرقنا على كل دار خنشة كتوزن قنطار من القمح
يوسف : مزيان وشنو بان ليك؟
موسى : والو امولاي حتى حاجة ماغريبة من غير دار ديال تاجر علال كانت فيها وحدة ملتمة ولكن عرفناها بلي بنتهم أسيدي واخا أمرناها تزول لتام شدات العكس وقصوحية راس وحلفات متزولو بحجة مكتعريش راسها لي كان
يوسف : هاديك فيها تحريميات وكترة الفهامة خلاوها جدودنا لوالة المرة الفاهمة نقمة واخا تكون تفتن بزين..ولكن مكلتيش ليا على مولات سالف؟
موسى(بلع ريقو) :
- هنا فين عواجت أسيدي
يوسف : طلقنا خلاص اموسى معنديش الوقت ليك
موسى : كاع لي سولناه على مولات سالف كيكولو بلي كاينة وحدة فهاد القبيلة وهيا هينة...سكت موسى وشاف فيوسف بنص عين
يوسف : هينة هينة واش بنت ليك ضحكة اموسى
موسى : حاشا أسيدي هادشي لي كالو كاع ناس وكالو بلي كتخرج راسها غير بالحيلة ودماغها يوزن قنطار وفمها يخرج القوافي داكشي باش كتسلك راسها ديما...ولي بغا يسلك راسو من شي مصيبة يجيب هينة وانا غير بلغت امولاي
يوسف(تعصب) :
- لا والله حتى زوينة انا تعاوني ديك القملة الذليلة ولكن الى جيتي تشوف هيا مولات هاد الموصيبة لي صابتنا وهيا لي خاصها تلقى لينا شي حيلة...درت معاها تجي وفات ظهر ومجات بغيتكم تمشيو لدارها وتجيبوها ولكن بلا شوهة بلا صداع بلاما تخوفو والديها عليها
موسى : بحالاش أسيدي؟
يوسف(خنزر فيه) :
- نبقى غير نكوليك هيا نجي فبلاصتك؟
موسى : لا لا حاشا امولاي سلطان دابا نحضرها عندك غير كون هاني...خرج موسى وبقى يوسف غادي جاي كيفكر فشي حيلة وشنو أيدير مع هينة وكيفاش غادي تعاونو وهيا كلها مصايب من نهار هضرات عليها رحمة وهو مرتاحش ليها وفعلا صدق إحساسو وبسبابها تخطفات ختو..دازت نص ساعة وتم داخل موسى ومعاه الحراس جارينها من دراعها وهيا كتفركل بحال ديك المعزة المدبوحة..
هينة : واش سيبة فلبلاد جايبيني بحال البهيمة هادشي راه مايبغيه لا ربي لا عبدو انت حاكم انت لي كتنصر المظلوم وتبيت الظالم فقاع البير..سكتها بغواتو
يوسف(بالغوات) :
- أتسكتي عليا ومنسمعش حسك مزال..شاف فموسى وأشر ليه براسو باش يخرج..خرج موسى والحراس وبقات غير هيا وهو وقف كيشوف فيها كيف ملوية فالحايك غير وجها لي كايبان..
يوسف : بصح عندك شي سالف ولا غير مقطعاه من شي بهيمة وكضحكي على ناس لقبيلة؟
هينة(علات حاجبها) :
- حتى الى قطعت شعر البهيمة حنا منها وهيا منا دور دور وترجع لينا كيت لي شطارتو شطارت الغربال يطلق الزبيب ويشد فنخال
يوسف : عرفي أش كتخرجي من فمك اديك دواحة الخيام كولي شي كلمة مسكمة وانت من كلامك كيبان ليا قليلة العرف
هينة : علاش مالي شنو كلت ولا درت ولا بغيتي تبقى تصبن فيا ونسكت ليك
يوسف : سولتك بغيت جوابك على قد سؤال ماشي على قد لسانك
هينة : سالفي من عند الله طويل بحال البير تهبط شمس يولي كحل بحال ليل ومنين طلع شمس يولي بحال لون تمرة فنخيل..
يوسف : وباش انتيق بلي سالف سالفك وهادشي لي كتكولي صحيح؟
هينة : الى بغيتي بالك يرتاح سيفط معايا خادمتكم لكبيرة هيا تأكد واخا كنشوف مكاين لاش وفاش اينفعكم سالفي أمولاي..يوسف سكت كيفكر شحال عاد النطق
يوسف : انا وانت أنشدو رحال لقبايل لي حدانا باش نجيبو رحمة
هينة : لا واش عند بالك انا دليلة لي نسافر مع راجل ماحلالي ما من دمي ولا لحمي شنو انكول لمي وبا وأهلي
يوسف : كولي ليهم غادية عند عمتك ولا خالتك
هينة : انا معندي لا عمة لا خالة عندي غير با ومي...سكت يوسف وحدر راسو كيفكر شوية رجع شاف فيها
يوسف : لمرا ماتقد تخوي بلادها بلا حرمة داكشي باش علمي باك وماك بلي لخطاب هاد الليلة جاوك
هينة(مخرجة فيه عينيها):
- وشكون هاد الخطاب ؟
يوسف : براكة ماديري راسك دمدومة كولي ليهم بلي سلطان ومو جايين هاد الليلة يقراو الفاتحة عليك باش يكون ساهل عليا نديك...هينة لسانها سرطات مابرقات ماقشعات كتسمع اتخرخيش ودنيها تصمكات وفمها حلات وعينيها خرجات ماهضرات ماتكلمات..

يوسف مزgي فيها شوفة حيت عارفة اتوافق وعلاش لا وكاع بنات القبيلة كيتمناو شارة منو خاصهم غير رضاتو
يوسف : كيبان ليا معندك متكولي نعتابر سكاتك موافقة؟
هينة(علات عينيها لي لونهم لون لوز مكحلين بكحل أسود غري) :
- لا أمولاي انا مكنخبي على با ومي حتى حاجة مأمنيني على صراحة كانجي نيشان معندي مناش نخاف مكندير حتى حاجة لي هيا خايبة ومالفة ليا نعاون الناس ماشي جديدة عليا
يوسف(ستغرب ليها مكانش عارفها بحال هكا) :
- شنو بغيتي تكولي وضحي كلامك؟
هينة : مقصودي باين ومفهوم واخا انا معندي دخل فهادشي غير واخدة لومة ولكن رحمة عزيزة وماشفت منها غير الخير وحتى انا سري لي قبلت نعاونها ونقلب ليها على مرا تكون شريكة لخوها داكشي باش معندي مشكيل نعاونك ونكولها لوالديا صراحة راحة امولاي ولالا؟
يوسف : مابغيتش يسيقو ناس لخبار لختي مخطوفة ونوليو ضحكة فالقبيلة
هينة : غير تهنى مي ما بركاكة مابروالة وحتى با الى سكت على لكلمة بحال الى لحتي ريال فالبير متقد تجبد منو الهضرة واخا ضربو لقفاه بمغرفة
يوسف(مارضاش) :
- هادشي مكاي همني فوالو وعنداك يغرك شيطان وتكولي بلي درتي شيحاجة أنا مامحتاج لا ليك لا لغيرك ولكن انت لي كنتي مع ختي وانت لي شفتي دوك ناس لغراب وانت لي تقدري تعرفي عليهم من شورة والهضرة..وقفات هينة وقدات لحافها علات حاجب وهبطات التاني
هينة : يجيك يوم ياناكر خيري يوريك زماني من زمان غيري خليت ليك الخير امولاي سلطان
يوسف(وقفها بصوتو) :
- مزال مكمل لكلام
هينة : لاواه لكلام سالة كفى او وفى وجا لوقت لي نمشي بحالي يلاه نهضر مع هلي وغدا بحال هاد الوقت تلقاني هنا بلاما تبقى تعدب نخل ديالك(ضحكات وغطات وجها عطاتو بظهر وخرجات)..خلاتو حال فمو فيها ماتسرطاتش ليه كيفاش وحدة بحالها ذليلة فلفلة حارة دير معاه هكا ولي قتلو وجننو هو فاش رفضات الأمر ديالو تما جابت ليه تمام ولكن غير بيه ولابيها الفكوسة المنحوسة..
****
حليمة شادة حنكها وتخمم تمشي وتجي براسها بحال الى كتعدد أما علال سكت وماعرف باش تبلى ولا شنو يكول...شافت فيه حليمة وهنا هضرات..
حليمة : وهضر أهاد الراجل شفتك سكتي كلستي فديك الركنة وجمعتي وطويتي شفتي فشوشك فين وصلنا سمعتيها ولالا؟اويلي ياويلي ويلى سمعو أهل دوار خبارنا أيديرو علامنا فوق جامع ونوليو حتيت وضحكة عند القبيلة
هينة : أمي راه مكاين لي غادي يسيق الخبار الما هضرتي انت وبا
حليمة : أيه هاحنا سكتنا وتجي شي وحدة تسول فيك شنو أنكولو ليها؟
هينة : مشيت عند خالتي لقبيلة ولدات وخاص لي يقابلها
حليمة : انت عارفة خالة وحدة عندك ماشي شقيقتي وكاينة فتلت الخالي
هينة : والمهم خالة خالة وزايدون انا عارفة راسي شنو كنسوى وغادية مع سلطان وجماعتو وراه الى جيتي تشوفي انا مولاتها انا زغبية أش داني نمشي من تم والبنت كالتها ليا ومتسنطش ليها
حليمة : علاش انت فين عمرك كنتي كتسنطي لشي واحد فينا حنا نكولو شا وانت تكولي را
هينة : وامي وبراكة خلاص عليا با هضر كول شيحاجة
علال : أش انكول أبنتي ماصبت منطق ولا نهضر سكتيني ولكلامي نسيتيني لي بان ليك ابنتيه ديريه عارفك حرة غرة وحافظة سواريك ومكتخلي حد يديرها بيك..