هينة والغول

17

من بعد الحمام لي كان بالهمة وشان والمرشان خرجو هينة بزغاريت والعلامات كلسوها فواحد البيت كبير عامر عيالات هازين طعارج والبنادر وكيغنيو ويصليو على نبي كلسو هينة حالين شعرها وملبسينها قفطان فالبكرونة ومخيط بدهبي هيا غير كتشوف معارفة باش تبلات بحال شي وحدة مبنجة ومسيرينها...واقفين عيالات الشيخ على راسها ومراتو لولة هازة فيديها طاس ديال النحاس كبير فيه ما دالورد حطات فيه يديها وبدات ترش على راس هينة وشعرها حتى عمرات ليها وجها بقطرات ديال الما طمعو لهينة شعرها ضفروه ولواوه...جات الغالية وفيدها بحال طاس لي كان فيه الما ولكن فيه الحنة كلسات حدا هينة ودورات ليه دوارة صغيرة دالحنا فوسط يدها ولولات عليه خيط فالخضر وخميسة ديال ذهب...بداو العيالات كيزغرتو...قربات هينة من الغالية وبالهمس كالت ليها :
- عفاك بغيت نشوف الغالي
الغالية(ضحكات) :
- فعادتنا المرا مكتشوف راجلها حتى كيركبو لبعضياتهم الخواتم
هينة : ولكن انت عارفة الحك وغطاه
الغالية : انا عارفة ولكن الشيخ ولوخرين معارفين والو معندك مديري مدامك عمتي فهاد البحيرة خاصك تكملي عومان حتى توصلي لبر لامان...ناضت من حداها وكلامها خلاها تزيد تغرق سلمات أمرها لله وتيقنات بلي يوسف ايفكها حتى هاد المرة...
ريحة الطياب كتعطي فدار كولشي مزين ومزرزر دهوبات الضحك ونشاط كولشي فرحان بحال الى وحدة من أهل لقبيلة لي غادي تزوج...غربات الشمس حيدو لهينة الحنة من يديها لي نظرات دخلوهت لواحد البيت لبسوها شربيل ديال الصم بالبيض مع قفطان فالبيج وشيبي حتى هو بصم العقيق ديال الجوهر فعنقها دارو ليها زيف على راسها فالحمر والخضر وعقدوه ليها بخيط ريح فيه لويزة ديال الذهب دوزو ليها مرود ديال الكحل فعينيه وشوية ديال سواك فمها عطاها لون كيفتن العيان جات غزالة كتحمق...شدو فيديها وخرجوها بصلاة وسلام من البيت غاديين بيها حتى لمراح فين كاينة حفلة العرس مع دخلات وعلات الراس جات عينها فعين يوسف العين الفتانة لي دايرة بحال عينين صقر غير شافتها عيونو بقات عليها نظرة ماعرفاتش كيفاش تفسرها مكانش باين عليه الخوف فقفطانو البيض وسلهامو والخنجر لي محزم بيه تبسم تبسيمة خفيفة خلاتها ماتفهم والو وتشوف فيه حتى هيا بشوفة فشكل ماعرفاتش هادشي باش حسات بكيفاش تفسرو...تنفضات وحركات راسها منين زيداتها الغالية لقدام عريسها وكلساتها على الكرسي جنبها لجنبو...مع كلسات ستغلات الفرصة هينة وهمسات ليه
هينة : لقيتي شي حيلة باش تفكنا من هاد الوحلة؟
يوسف(برودة) :
- أشمن حيلة واشمن وحلة بحالي بحالك غير مكدم معندي منقدم ولا نوخر
هينة(تحت سنانها) :
- كيفاش زعمة اتخلينا بحال هكا معلقين من يدينا
يوسف : كيف كتشوفي محكومين والى مشينا حتى درنا شيحاجة انجيبوها غير فراسنا وزايدون ماتنساي بلي هاد زواج غير فهاد القبيلة اما فبلاصة خرى لا كل بلاد وتقاليدها وأعرافها...شافت فيه هينة بنص عين وسكتات فوضات أمرها لله وكملات...جا الشيخ كيضحك وهاز فيديه صندوق صغير منقوش فتحو وجبد منو الخاتم لول من النحاس مدو لهينة باش تلبيو ليوسف
الشيخ : يلاه الالات البنات لبسيه لغالي تاج راسك وقرة عينك وحجابك...شداتو هينة فيديها كتشوف فيه وتشوف فيه كتبلع ريقها بصعوبة
الشيخ : يلاه شنو كتسناي
الغالية : أبشوية عليها امولاي شيخ غير الفرحة وكترت الناس خلاتها توتر وتنزل عليها الحشمة والحيا...مدات الغالية يديها وحركات بيها يد هينة لي وعات وركبات الخاتم ليوسف...تسمعو زغاريت وصلاة على النبي الحبيب صلو عليه كاملين عليه الصلاة والسلام...هز الشيخ الخاتم الثاني كان فيه 3 دالحجرات مدو ليوسف وأشر ليه براسو يركبو لهينة ولكن يوسف غيرها هيا شد يديها بين يديه وركب ليها الخاتم دغية دغية..

تعلات الزغاريت والصلاة على النبي تفرق أتاي والحلوة وكاع ناس فرحانين حتى لهينة لي غير كتشوف بعينيها وتبرق تحط العشا تعشاو الناس ولي عندو شي دار قصدها جات الغالية لعند العرسان بتبسيمتها المعهودة..
الغالية : وجدنا ليكم بيت الضيافة تبعوني
هينة : كيفاش بيت الضيافة؟ياك كاين البيت فين كنا؟
الغالية : ولا دابا راكم قدام ناس مزوجين خاصكم بيت واحد
هينة(كتبيض بيضة هنا وبيضة فالعش) :
- لعب دراري صغار هذا تسحر مع العيال تصبح فاطر
الغالية : غير ديري عين مشافت حطيتي راسك فهاد البير كملي فيه حتى تخرجي على خير وبيخير يلاه تبعوني راح الليل او وقت الركاد دابا...شافت عينة فيوسف مخنزرة ضربات فيه وتبعات الغالية اما هو تبعهم بشوية عليه داير يديه ورا ظهرو وكيضحك...دخلاتهم الغالبة لواحد البيت واسع بسيط وفراشو هادئ دخلات هينة لولة وراها تبعها يوسف
الغالية : مسيتكم بالمسك والريحان وخليت ليكم الراحة بين يدين الحنان والمنان...حدرات راسها ورجعات بلور سدات الباب وراها...مع تسد الباب دارت هينة عند يوسف كتخنزر فيه...يوسف لي مبرد أعصابو ومداهاش فيها
هينة(معصبة) :
- أمولاي سلطان الي كيلقى الحل لكل إنسان الي حاكم قبيلة وكتجيه قليلة زعمة مبانت ليك حتى حيلة فحريرتنا شفتك داير أعصابك فالواد مبردهم ماقدمتي ماوخرتي
يوسف(جمع غوباشتو وبرودة) :
- ياك انت هيا مولات الشطارة مولات الحيلة والحكمة انت لي كيتضرب بيك المثال ويديك تعقدو خلي انا لي عقلي على قدي وفهامتي ماتجي لفهامتك حتى شوية
هينة : بلاما تبوهل عليا ودير فيها هبيل وغشيم حكمك يتضرب بيه المثال ومخاب لي جا وستاشرك وعمرك رضيتي شي واحد مكسور لجناح ولا محني الراس جبتي حتى لينا حنا وحطيتي سلاح لالا هادشي زاد على حدو
يوسف : ياك هاد الزواج معروفة بيه غير هاد القبيلة معندك مناش تخافي غير نوصلو لبلاد خرى اتلقاي عادات مشكلين وتلقايهم كاعما معتارفين بهاد الزواج نعسي ورتاحي على جنب الراحة غدا انشدو رحالنا انا بعدا عينيا تقالو تصبحي على خير...حط بلغتو وطلع فوق من الناموسية سرح يد ويد دارها على راسو مغطي عينيه
هينة : تبارك الله كل خاجة كتلقى ليها حل وكيفاش دابا انا نعس فالأرض وانت على لمضربة..؟؟
يوسف(على نفس الوضعية) :
- المضربة واسعة وعريضة وانا كنعس على واحد الجنب منتحرك مانتململ مانشخر
هينة : والله لاكانت نعس جنبي لجنبك زوينة هادي...هزات شي زرابي وشي هيادر فرشاتهم ونطرات مخدة من حداه وتكات مغطية بيزار..حيد يديه على راسو وشاف فيه..شوية ناض وقف ليها على راسها
يوسف : نوضي على المضربة وخليني انا تم
هينة : لا مكاين لاش ظهري مولف بهاد النعسة اما انت موالف بريش النعام نخاف تنعس هنا يعواج ظهرك ونزيد همك فوق همي
يوسف(بنهيض) :
- براكة من لملاغية زايدة ونوضي راه بغيت نرتاح منزيدش معاك الهضرة...حيدات ليزار عليها شافت فيه وشوفتو لي خوفاتها خلاتها تنوض لنموسية حيد ليها ليزار من يديها وتكا فبلاصتها ودار لجيهة الحيط
يوسف : متنسايش طفي معاك دوك الشمعات...بقات هينة واقفة كتشوف فيه حدرات راسها ومشات جيهت لامبات المشعولين طفات جوج وخلات وحدة ضوها خفيف رجعات لبلاصتها تغطات بليزار وسدات يدها وعينيها على السلطان حتى ماحياتش براسها إيمتى غفات...
#يتبع