#بين_الأبيض_والأسود 😢 حلقة 7 ☺
الكاتبة « هبوش »
مالك خدي نفس : قدها ؟
اني : وقدود
مالك : اني حاندير عمليه بس نسبه نجاحها قليله جدا والمشكله مانبيش نخاطر بحياتي ونخلي بوي وامي بروحهم
اني : اي بس شن سببها العمليه قصدي شن فيك انت ... وعيوني معبيات دموع
مالك : اوو شن قلنا احني
اني : به هاه خلاص احكي
بدي هو يحكيلي والي فهمته أنه نفس اليوم إلي توفى فيه صاحبه طاحت قذيفه جنبهم والشظايه جت ف راس مالك .. كان هو يحكيلي واني ركبت فيا حرارة ودموعي ينزلوا ع خدي
مالك يضحك عليا يبي يغير الجو ع أساس : اني عارفك يابكايه هذا إلي بديريه
اني : مالك من يعرف غيري !
مالك : ما حد يعرف وأني واثق فيك مش حاتقولي
اني : حتى عماد💔
مالك : حتى عماد😂
اني : اسفه أمي أكيد تستنى تو نكلمك بعدين ع التلفون ماتطلعش اليوم أنت خليك اهني تو تصيرلك شيء حاجه
مالك سقدني للباب ويضحك وجوه مليح لأن من طبعه كتووومي ومايحبش من يشوفله بعيون الشفقة
طلعت من حوش عمي منصور نزلت للمحل جبت منه طماطم باش أمي ماتشكش ف تعطيلي
الطريق كلها واني نفكر كيف نقنع مالك يديرها العمليه لأن لو عطل شوي حايموت ونفس الوقت لو دارها احتمال يموت 💔 خذيتها وركبت طول
.
امي : خيرك عطلتي اااه ؟
اني : عمتي فوزية مهناش نزلت جبتلك من الدكان
امي : هذا كله ع حكه طماطم
اني تنرفزت : اي به ماتصدقينيش كنت واقفه ع صاحبي ف الريفودجي ... وطلعت وخليتهم خالتي تضحك وامي تدعي عليا
مؤيد : ربي يشفيك
اني : اجمعيييين
وخشيت صليت الظهر وقعدت ندعيله ف كل سجدة قصدي شيء جاني فجاءة انصدمت كيف هكي حايضيع من بين يدينا ف اي لحظه وبالذات انه ما يبي حد يعرف ف قعدت حمل ع قلبي مش عارفة كيف حانتصرف بروحي
.
مع ساعه 10 بعتله رساله وقعدت نستنى فيه
بوي وراجل خالتي مهناش وميار ومؤيد يتفرجوا فالصاله ع مسلسل تونسي
وأني كنت نتفرج مع الروشن « مكاني المفضل »
لين ضوى التلفون رديت
مالك : الوو
اني : نسمع فيك
مالك : ها تشاينه شنجك
اني : تمام
مالك : قداش حصلتي ضربه من أمك
اني : هههه لالا سلكت اموري
مالك : عارفك ماتنقدريش
سكتنا شوية نسمع ع ف صوت انفاسه💚 كل مانتخيل أنه ممكن يموت قلبي يوجعني
مالك : ايواا
الو تشاينه
اني نطيت فيه : اسمعني للاخير مانبيكش تقاطعني اسمعني بس
مالك ضحك
اني : يا مالك هادي حياتك مش لعب من لاخير ومن غير رسميات انت لو تزيد شوية حاتموت ولو درتها احتمال تموت يعني مش اكيد ديرها وراس أغلى حاجه عندك مانبوكش اضيع من بين يدينا
مالك : به لو متت 😎
اني : لا بعيد السوء
مالك : مثلا قلنا
اني : نموت وراك .. 😨 قصدي
لأني كنت السبب ف اقناعك
ميار فتحت الباب وخشت : قالب قالب وين وين غايب عليا يومين .. لا تغييييب أكثر حبيبي خاف اموت م الحنين
مالك : هههههههههههه
اني حطيت يدي ع المايك : مالك يسمع فيك ويضحك😁
أنت تقرأ
بين الابيض و الأسود ( روايات ليبية )
Romanceعندما تكون حياتك عبارة عن لونين ( ابيض ) و ( اسود ) يوم فرح و يوم حزن . رواية تدور احداتها حول قصتان يجمعهم حب كبير و لكن حياتهم لونين ؟ فما مصيرهم ؟ . رواية غرامية 😍 و من واقع المجتمع الليبي ؟ للكاتبة : هبوش
