بين الابيض و الأسود ( روايات ليبية )

حلقة 14🔥

#بين_الأبيض_والأسود 😢 حلقة 14 ☺
فتحت عيوني حسيت بحاجة غمتني بسرعة
لما شميت عطره💚 قلبي دق 3 دقات😂
والله قريب اغمى عليا بين يديه
اني مغمضة عيوني : استااااااااحشتك موت
مالك حاضني قريب يطلع عيوني وعيونه مدمعات
اني : اخخخخ وخلاص شوفتك هزتني من داخل رجعت الأمل فيا ... وبعدها حطيت يديا ع راسه : ياروحي انت كويس .. وعيونه مصادفات عيوني
مالك ضحك ونزل راسه يمسح ف دموعه : اطمنتي توا
وشاف ليدي لقاني لابسة الذبلة جبدها من يدي بااعصاب ولوحها من السور
اني : وعدتك اني والله ماحيزفوني لغيرك لآخر يوم حانحاول
مالك : يومين ثلاثة وحاننهي كل شيء وعد
اني : واني واثقة فيك حبيبي
مالك شد يديا وباسهم : نحبك يانبض وتوا لازم نطلع .. وراجعلك وغمزلي😉
مالك طلع واني رديت الباب وخشيت طايرة م الفرح
قعمزت ع التلفزيون لين نسمع ف رياض ينادي
رياض : اسسسسيل
اني جمدت م الخوف وع طول بديت نبكي لأن أكيد شاف مالك وهو طالع مافيش شك😭💔

رياض : ياحقيرة ياكلبة وين امك

اني هربت ع الدار وكيف بنسكرها شدها برجله
خليته وخشيت انحذفت ع السرير ودرت دراما🌚 ومزلت نبكي بالشهقة والعبرة باش نسخفه ومايكلمنيش
رياض : بطلي بكاء الزفت شن ضربتك توا !
اني راقدة ع وجهي : باهي شن تبي
رياض قرب مني : شوفيلي اهني
اني درتله وعيوني حمممر : شن فيه تاني
رياض : مالك شن يدير اهني
اني (straight) : اااه
رياض : تكلمي😡 ماتنكريش عمي شافكم غير ماوضحليش شن شاف  ودارلي العار واحتمال حتى يفسخو منك بكل ياتافهة هكي مربيينك احني ... طبعا عمي حوشهم جنبنا وع دورين ف أكيد شافنا من فوق السطح
اني 😍 : قول وحق ربي
رياض : اسمعي ماتقعديليش تتبكي فهميني بالشوية وكل شيء واكسبيني خير ماتشوفي شن ندير فيك
اني : حاضر💔
رياض : لدرجة هادي ادخليه للحوش هكي علمتك يااسيل
اني قعمزت وهديت روحي : بس اني مادخلتاش هو جاي يبيك أنت مالقاكش مشي طول ... انجبرت نكذب😭 ربي يسامحني
رياض : تحبيه ؟
اني انصدمت من سؤاله قعدت ساكتة وقلبي يدق
رياض : ادوي ماتخافيش
اني بكل قوة واندفاع : اي حبيته زي ماانت حبيت وهالشيء مش بيدي لأن عارفاته راجل وعمره مارضى فيا حاجة وجاني م الباب طول وانت كنت نستنى امتا نحكيلك بس جيت ضدي وكلكم جيتوا ضدي وركبتولي حالة نفسية 😭 ... نحكي ونبكي
رياض : باهي اهدي خلاص
قوليلي إلي درتيه غلط ولالا
اني هزيت راسي 😢بمعنى اي: بس القلب مش بيدي ولا بيد حد حبيته ونبيه مش متخيلة اني نتزوج هداك الحيوان
رياض : سراج اعتبري موضوعه انتهى
اني : مش بهالسهولة يسيبني تو يدير حاجة ف مالك
رياض وقف : مش شورك المواضيع هادي 
وطلع طول
.
.
وروحو امي وبوي ف الليل وقعدو يتناقشو ع الموضوع واني ف داري ساجدة وندعي قريب ختمت المصحف كله ف ليلة وحدة
لين خشتلي أمي
سلمت : قعمزي كملت
امي ردت الباب وخشت : تعالي نبيك ف موضوع عارفة المصايب جاتك ف مرة وحدة الله غالب عليك يابنيتي
اني 😨 : شن فيه تاني
امي : ولد عمك فسخ منك وقال معاش فيه نصيب وعمك هو إلي كلم بوك والسبب مجهول
اني عيطت وحضنتها : تي اي مصيييبة هادي فرحة تسوى الدنيا ومافيها
امي : ياهبلة عاجبك يقولوا ولد عمها فسخ منها اشبح شن مدايرة من عملة 😒
اني : يقولو شن بيقولو اهم شيء فكني ربي منه ... حمل وانزاح ع قلبي وحضنتها من الفرحة

اليومين هادو رجعنالهم كل شيء جابوه وصارت حساسية بين العيلتين وهذا إلي نبيه اصلا وسراج اختفى معاش سمعت عليه شيء ولا كيف كانت ردة فعله ... طبعا مرت عمي فضحت بيا إلي يسألها علاش فسختوا تحكيله قصة مالك وأني نجيب فيه للحوش لما يفضى وف الليل وبهارات مانحكيلكمش بس مااهميتش ولا اهلي اهتموا للموضوع لأن عارفين مرت عمي وحدة فتانة وطبيعي حاتتكلم بيا
.
ورجعت الضحكة ف عيوني وجوي الحلو وكأن كنت محبوسة وطلعت💚💝
مالك عطاته علم ميار وقعد يضرب بالسلاح م الفرحة وعماد مصوره وبعتهولنا 😂 اني كلمته يوم الأربعاء بالزبط بتلفون ميار هدرزنا مدة لكن ماقتلاش اني حانجي غذوة لحفلة طارق نبيها مفاجأة لو حصلت كيف نشوفه
يوم لخميس❤❤🙈
نكلم ف ميار بتلفون امي
اني : كيف كملت شعري وانتي
ميار : درته من الصبح .. باه شن بتلبسي
اني : قفطان مخطط قصير
ميار : نعرفه اني ؟
اني ضحكت : لالا قعدة مالبستاش جديد
ميار : اممم ربي يصبر مالك مالا
اني : شن تحسابيني هبلة بنطلعله
ميار : مرات تصادفيه اهني ولا اهني😂
هدرزت معاها شوية وسكرت
مع المغرب لبست القفطان ودرت شعري فلو وميك أب وطول الوقت نفكر ف مالك ونبتسم
رياض دق ع الباب : نخش
اني تحشمت منه ولبست وشاح ع كتفي : تفضل
رياض : بتمشو توا
اني منزلة راسي : مش انت إلي بترفعنا
رياض : قيمي رأسك فوق
رفعت راسي
رياض : بوي بيرفعكم ومانوصيكش عاد ردي بالك من الغلط يااسيل انتي عاقلة وتفهمي شن نقصد
اني : معاش إلي ينزل روسكم
رياض : الولد كانه من نصيبك تو يجيك اني مانبيش نغلط معاك زي المرة الأولى لأن مافيش حد معصوم من الخطأ اهم شيء انك تصلحي
امي : اسييل هيا وينك
رياض طلع وخلاني
واني لبست عبايتي والكعب وقعدت نفكر ف كلامه لين ركبت ف السيارة ومشينا
لما درسنا قدام الحوش نشوف ف مالك وعماد والولاد إلي معاهم يحوسوا قدام الحوش وينظموا
واني نازلة حسيته يشوفلي لكن اني ماقدرتش كان همي اني نوصل بخير وسلامة😂 قلبي يدددددق
وخطواتي تتسارع
خشينا وجت حتى ميار وشدينا طاولة
ميار : نوضي بنعدل مكياجي ع لمرايا
كانت عندهم مرايا كبيييرة قدام الكوجينة
اني : جيبي الشنطة وهيا
وقفت ع المرايا : هاتي الروج
اني : وين حاطتيه
ميار : ف الجيب الصغير
اني نفتش : تي مهناش
ميار : غير هاتي الشنطة جاي ياهمي
اني ضربتها ع كتفها وشفت للنساوين ف الكوجينة كيف يوتوا تلمحت مالك😳 جت عيني ف عينه واني واقفة نرجف ........يتبع>