#بين_الأبيض_والأسود😢 حلقة 10 ☺
نسيت نلبس🐸 طلعتله طول فتحت الباب البراني
مالك خش ورد الباب : اني شن مقايلك ع اللبس
اني : غير خش توا
وخشينا للمخزن
اني : هكي مش حل حتى ف حق خوتي وبوي😢
مالك : عندك الحق بس عطيني وقت قصير ونحل كل شيء
اني ننفخ ف يديا
مالك سلب جيبوطيه ولبسهولي
اني : وكيف أنت تقعد هكي
مالك : مانيش صقعان توا ادفي انتي غير ماتمرضيلي ونحصل فيك
اني ضحكت : ع أساس يعني😂
مالك يدور ف جيبه
اني : شن ادور
مالك : اهو ... وطلع من جيبه صندوق اكحل صغير : اقربي ودوري
اني قمت وشاحي شوية كيف يقدر يلبسني وكنت فرحانة هلللبة بس خايفة من بوي ورياض يروحو ع فجاءة .. لبسهالي وكانت سنسلة فضة ع فيها قلبين وسهم تجنننن❤ : محلاهاا حبيبي جعلني مانفقدك
مالك باسني ع جبهتي : ولا نفقدك ... وبعدها وقفني قدامه : اسف ع الموقف عارفه غلط بس كنت مجبور نشوفك مستاحشك للنم ... وهالغلط نصلحه بيدي
اني ابتسمت : ولا يهمك
وسقدته لا عند الباب وخشيت بسرعه والحمد لله فات الموقف ع خير خشيت ع المرايا قعدت نتفرج ع السنسلة وعاهدت نفسي اني مش حانسلبها طول مااني عايشة 🙈💘
وصل مالك للحوش وكلمني طول : شني روحوا بوك ورياض
اني : لا مزال
مالك يكح : باهي بكل
اني : اني عارفاته هذا إلي بيصير علاش درت فروحك وفيا هكي
مالك بااستغراب : علي شن تحكي حبي
اني : مرضت
مالك يضحك : من امس نكح ياتشاينه ماتنقيش
اني : تو طلعت انق اني خايفة عليك
مالك : عارفك
اني متكية ع السرير ونقاوم : به نعست حبيبي
مالك : ارقدي بيبي تصبحي ع خير
اني : حتى انت ارقد هيا
مالك يجرب فيا : لا مزال الليل ف اوله عندي مااندير😉
اني نضت غسلت وجهي باش ماننعسش : حتى اني طار النوم☺
وكملنا نهدرزوا صوت بعدين رسائل
.
يومها طلعت للصاله لقيت امي تهدرز هيا وعمتي فوزية بالتلفون
امي : مبروك عليه إن شاء الله بنت مني خطبتوله
قعمزت جنبها وحاولت نسمع بس مافيش فايدة
امي نزلت التلفون : بري ضمي الماعين خيرلك
اني : غير باهي دقيقتين
امي فنصت فيا : نوضي بلا تقصقيص
نضت من حداها قعدت نضم ونستنى فيها امتا تسكر لين سكرت
اني : امي مش هادي عمتي فوزية
امي : اي هيا وقالت خطبنا لطارق وبنحددو العرس قريب
اني : والله ؟ مبروك عليه
.
.
.
فات أسبوع وايامات واني نحكي مع مالك يوميا مانذكرش ف يوم فات هكي
مرة كنا نحكو ونتعاركوا كالعادة😂
اني : ساد ضم فمك
مالك عصب : اني نضم فمي ؟
اني : معاش تعزر قصدي زودتها😂
مالك : امتا ناوية تحترمي نفسك انتي ؟ سكتلك هلبة ره
اني بصدمة : حبيبي خيرك بسم الله😳
مالك : لا حبيبك لا نمي
اني : مااالك تحكي جديات انت شن جاك اللطف
مالك بااعصاب : اقلبي الزفت .... وسكر الخط ف وجهي
اني شفت للتلفون مصدومة تي خير امه هذا مش ديما نبصرو شن جاه اليوم .. قلت مرات مقلب خلي نستناه تو يتصل ويقول نبصر😒
اذن العصر ، والمغرب ، والعشاء😨 لا اتصل ولا عبرني لوحت التلفون
وطحت فيها بكاء لين عيوني تنفخو😂💔
رياض وامي كانو يهدرزوا ف الصاله بعدين خش بوي وجوه مليح وقعدو يهدرزوا
وأني ماكنتش معاهم ركزت بالحظ جت ف وذني كلمة اسيل مااسيل وامي تزغرت
رياض : بالشوية راهو ليل
طلعت بنسمع ناداني بوي
مسحت عيوني وزبطت روحي وطلعتلهم وقفت قدامهم
رياض : هي تبكي انتي ولا شني
اني درت روحي مزكومة : لا زكمة
بوي : قعمزي نبيك ف موضوع
اني قعمزت جنب رياض : إن شاء الله خير ... وقلبي يدددددق
بوي : عمك منصور طالب يدك لولده بكري كلمني شني موافقة ...........يتبع>
أنت تقرأ
بين الابيض و الأسود ( روايات ليبية )
Romanceعندما تكون حياتك عبارة عن لونين ( ابيض ) و ( اسود ) يوم فرح و يوم حزن . رواية تدور احداتها حول قصتان يجمعهم حب كبير و لكن حياتهم لونين ؟ فما مصيرهم ؟ . رواية غرامية 😍 و من واقع المجتمع الليبي ؟ للكاتبة : هبوش
