انتماء

يا اجمل عطايا السماء ياحلى قدر ...

طلعت ريم ووكفت كدام السياره جانت سياره محمد نوع لاند كروز مزينه بالورد البنفسجي ومحمد واكف ولابس قاط لون اسود وقميص اوف وايت ورباط لونه رصاصي غامق كلش حلو وانيق طالع وكفت ريم وابتسمت ابتسامه خجل وكلبها كام يدك كلما يتقدم خطوه محمد عليها تسرع دكات كلبها ام ريم وياها و بنات خالها واجتي وياها صديقتها الجديده ايمان كلهم جانو يساعدوها و يرتبون نفسهم هم فتح محمد باب السياره وساعد ريم تصعد لزم ايدها وحاول يسندها حتى تصعد وجان هذا اول لمسه بين محمد وريم ريم كلش ارتبكت وحست برحفه ممزوحه بمشاعر مخربطه كعدو بالسياره واتجهو لمكان التصوير نزلو ياخذون الصور اجى المصور وكال : ليش هيج جامدين بوكفتكم اتقربو على بعض اكثر شنو مستحين ... محمد انعقج وجهه وكال لا هيج احسن خلصنه ورانه حلفه وهوسه رد النصور كاله : ميصير عريسنه هذا يوم العمر حتضل تتذكره وتحجي لاحفادك ان شاء الله لازم كلشي يطلع مثالي وبيرفكت ..
هز محمد راسه يعني اوكي واتقرب على ريم
صاح المصور بعد بعد اتقدم بعد وهو يتأفف اتقدم عليهم وقربهم بأيده ودار وجه محمد على وجه ريم وخله ايد محمد على خصرها وكال : هسه اريد عينكم بعين بعض حناخذ لقطات
رفعت ريم راسها وخلت عينها بعيون محمد
ريم بأفكارها : هاي شنو اشو عبالك اول مره اشوفه لو يمكن اول مره اشوفه بهالقرب عيونه حلوه وبيها هوايه قصص ضلت صافنه بعيونه لحد ماقاطعهم المصور يلا نحول عاللقطة الثانيه ...
عريسنه لازم تحضن عروستك من وره واريد تنزل راسك على ركبتها ببوسه خفيفه ...
محمد هنا شويه ويفقد اعصابه وكال : بطلت ماريد اصور شعالصور وشهالمواقف مشى خطوات ولحكته ريم وكالت : اتصرف طبيعي هسه منو الي يوصي منو ؟ كلها دقايق وكلشي ينتهي لاعبالك سهل عليه اني هم بس لازم نمشي على اتفاقنه ....
رجع محمد ووكف وره ريم وحضنها ونزل راسه على ركبتها هنا شعور ريم كأنما اجتها نتله كهربائيه بس جانت نتله حلوه لزمت ايده وكملو اللقطات ...
............
وهنا اتجهو للقاعه دخلو القاعه بمراسيم دخول العروسه وكعدو بالكوشه القاعه جانت جبيره كلش مزينه سكفها بورد الابيض كلشي بالقاعه جان ابيض وكلاسيكي بي بصمة تطور حضر للحلفه كل معارفهم واقاربهم
وبين المعازيم صعد صلاح صديق محمد وبارك لريم وبوس محمد وباركله وشاوره وكله : ها فضول عليها مو طلعت ينخاف منك ابو جاسم ضحك محمد بدون اي كلام ورجع كعد بمكانه وراها طلبو من العروسين ينزلون يركصون رقصة السلو وجانت على اغنيه يارا مابعرف كيف بنظره بتعمل هيك تاخذني ليك وبموت عليك ونزلو على انغامها يركصون والاضويه بس عليهم والبخار ريم نست نفسها ونست انو هذا كله اتفاق جانت تركص بفرح وبمشاعرها وبدون ماتحس خلت راسها على جتف محمد وحضنه من ضهره محمد استغرب وضاج من الوضع كح و سوه حركات تنبه ريم شالت راسها ريم وكالت : لاتخاف كله مدروس ومن ضمن الاتفاق حتى نكون طبيعيين ..
..........
خلص العرس وزفو العريس والعروس لبيتهم وصلو للباب ودعوهم وام ريم بوست بنتها ودعتها ودخلو للبيت محمد سد الباب بثقه ومشى فتح باقي الاضويه
ريم صلت متبسمره بمكانها وتباوع ع البيت البيت جان واسع و عالي من الطابق الثاني للاول على علو الدرج الملفوف معلكه ثريا ضخمه كلش انطت جمال دلاسيكي للبيت هو اصلا كلشي بالبيت فخم وكلاسيكي ومتناسق الالوان اول ما تفوت تلكى الاستقبال جبير بي تخم ملكي بلون الاسود والابيض معلكه على حيطانه لوحات مناظر طبيعيه ولوحه فرس اسود جبيره الاستقبال بي شباك جبير يطل عالحديقه تمشي بعد يلاكيكم الدرج وبصف الدرج غرفه المطبخ والطعام وحده مفتوحه على الثانيه المطبخ مصمم عالطراز الايطالي لونه فضي اما ميز الطعام حان لونه اسود جبير ضلت تتفحص ريم المكان لحد ما صاح عليها محمد يلا صعدي غيري ملابس وتعالي اريدج بموضوع ..
هزت ريم راسها يعني اوك وصعدت عالدرج جان اكو ٣ غرف اثنين وحده بصف الخ والثالثه مقابيهم
محمد جان واكف بباب الغرفه واشار بأيده عالغرفه الي بصفه وكال : هاي غرفتج وهاي غرفتي وهذيج الغرفه مخزن مسويها فوتي غيري ملابسج وانتظرج بالهول .
طبت ريم لغرفتها جانت الغرفه فخمه بلون الاسود والابيض الاثاث بالون الاسود والفراش والبرادي لونهن ابيض حجت بينها وبين نفسها : ذوقه غريب بس انيق وحلو حبيت الغرفه ابد ماجنت احلم اعيش بوحده مثلها واكثر شي حبيته بالغرفه انو سويت كامل بيها حمام واو واخيرا حعيش حياة رفاهيه طبت ريم بدلت وسبحت ولبست ملابس بيت بجامه لونها حبري مطعمه بلون ازرق سمائي وشعرها فالته مبلل نزلت على محمد وهيه تنزل اجت عين محمد عليها وتابع خطواتها لحد ما وصلت يمه وكعدت كباله كعدت خجل خلت ايدها بين رجليها وسدت رجليها ونزلت راسها بس عيونها صارت على محمد تتنظر منه يحجي العنده محمد عدل عكعدته ونظراته راحت عالشباك وبده يحجي : شوفي ريم خلصنه العرس وخلصت الحفله وهسه اريد اكلج شغلات تحطيها ابالج وابد مانسيها ...
اول شي اني ماجبرتج على شي و لا على هذا الوضع اني عرضت عليج شي وانتي وافقتي بقناعتج ..
قاطعته ريم وكالت : ادري بقناعتي ماكو داعي تذكرني كلساع قاطعها بنبره عصبيه وكال : ماخلصت كلامي حتى تبدين انتي هاي اول وثانيا خلي ابالج اي كلام من اي نوع مايربطني بيج بالبيت ولا بأي موضوع تردبن شي دزي برساله وتلاكي عندج بالدوام وكدام اهلي انتي زوجتي ونتصرف طبيعي اما هنا اي علاقه اي كلام ماكو بينه ممنوع تدخلين غرفتي لاي سبب مننوع ناكل سوه ممنوع نكعد سوه ممنوع تدخلين وين اروح وويامن افتهمتي اندار عليها وكال : ياريت متخليني احس بوجودج اصلا هنا يمج اكل بالثلاجه وكلشي تحتاجي تلكي بالمطبخ . عافها ومشى وصعد لغرفته وريم بعدها على نفس دعدتها وراسها المدنك مندهشه من قساوة كلامه اله والمعامله هاي عود متفقين تره مو ماخذني فصليه تأفأفت وكالت يلا كلها ايام وتعدي واخلص .. فاتت ريم لغرفتها طان السرير كلش عاجبها واسع وفخم والغرفه تسوي واهس للواحد ينام دهر مو بس ليله وهيه دايخه من الحفله فستسلمت للنوم وغفت بسابع نومه .
........
دخل الضوه الشمس يعاكس عيون ريم وريم تقاوم هالضوه وتحاول تتجاهله لكن بلا جدوى لازم تكوم طبت غسلت ولمت شعرها وضلت كاعده وتكول هسه انزل لو اخاف يصير عصبي عليه من يشوفني اوف يعمي شلون جوعانه وراسي يوجعني اريد اكل واشرب جاي خلي انزل وشيصير خلي يصير ..
.......
نزلت بخطوات حذر لاتسوي ضجيح واتجهت للمطبخ لكت محمد واكف عالطباخ ديحضر لنفسه كهوه كالت صباح الخير اندار عليها محمد ورجع اندار عالطباخ اتجاهل سلامها واتجاهلها ريم فاتت كعدت عالكرسي وتباوع اندار محمد عليها وكال : شنو تنتظرين كومي سوي ريوكج لو حضرتج تردين اني اخدم عليج ؟ ريم ردت لا لا بس كلت تخلص واني ابدي ماريد ازعجك رد محمد بصوت راضي : يكون احسن .

انتهى الجزء السابع
انتظرو الجزء الثامن
زينب النعيمي