انتماء

ماذا قالت عيناك لقلبي ليحبك بهذا القدر

كامت ريم سوت الجاي فتحت الثلاجه طلعت جبن وخبز وشغلت اغاني فيروز اغنيه (نسم علينا الهوا ) وصبت الجاي وكعدت تاكل وتسمع لفيروز محمد كاعد بالصاله يشرب كهوته ويكلب بالتلفون خلصت ريم ريوكها وبدت تنظف المكان الاكلت بي والمواعين الاكلت بيها وندمجت ويه فيروز كامت تغني وياها فجأة سكتت واتجمدت بمكانها واندارت لكت محمد واكف وراها جايب فنجان كهوته خلاه على الطاوله باوع عليها نظره ومشى ريم فشلت وخجلت وكالت هسه شيكول عليه من اول يوم هيج انطلق جان لزمت روحي الا يعني اغني اوووف منج ريم بهالاثناء اندك جرص الباب طلع محمد للباب دخلت ام ريم جايبه الريوك وباركت للعرسان وكعدت وياهم شويه بعدين اخذت ريم على صفحه وكالت : ها يمه بشري صار ؟ ردت ريم : شصار يعني ؟
ردت ام ريم : يعني رجال ومره واول يوم زواجهم افتهمتي ؟
ضحكت ريم وضلت تلتفت وعيونها محتارات تحاول تلكى مخرج من هاي السالفه لحد ما فات فجأة محمد عليهم وشمر على ريم جيس بداخله قطعة قماش شمره وطلع بدون اي كلام فتحت ريم بأرتباك وخوف الجيس وطلعت القطعة جانت قطعة العرس الخاصة بشرف العروس وعليها علامة عذريتها ضلت ريم مصدومه ماعرفت شنو تحجي جرت الوصله ام ريم و هلهلت وبوست ريم وكالت : احنه اهلج صح وشوكت ماتضيك بيج بيت امج واخوج مفتوح الج انتي الغاليه ريومتنا بس بعد هذاك البيت طلعتني منه هذا بيتج ومحمد اهلج صار ديري بالج على بيتج واهل بيتج ولا ادخلين الناس بأمورج شغلاتج حليها ويه رجلج انتي وياه واحد غطى وستر للثاني بوستها وسلمت وكالت : يلا اني حروح هم تعبانه اريد ارتاح وعندي كم شغله ردت ريم :هاي وين يمه ماشبعت منج
ضحكت ام ريم وكالت : لا عيني لا خل اروح بعدكم عرسان انتي البعدج مشابعه من محمد مو من عندي ضحكت ودعتها وصلت يم الباب اجى محمد ودعها واتشكر منها باوعت ام ريم على محمد وكالت : دير بالك على بنيتي تره ماعندي غيرها وريومه تحبك كلش تحبك دير بالك على حبها ولاتخليها تذبل محمد ابتسم وكال : ان شاء الله عمه ان شاء الله ..
طلعت ام ريم وريم وصلت امها للباب ورجعت لكت محمد ماكو بالصاله ولا بالمطبخ صعدت فوك ووكفت كدام باب غرفته رادت ادك الباب وترددت كلما تتقدم خطوه ترجع لحد ما فتح محمد الباب وشاف ريم كدامه رفع حاجبه وفتح عيونه وكال : ها ريم خير ؟
ردت ريم بأنفعال وحيره وتساؤل : انت ليش هيج سويت فاجأتني ماجنت متوقعه ابد جنت اريد اكوللها وسكتت رد محمد عليها : شدكولين مثلا ؟ ماصارت لو مادبرتها ؟ ردت ريم : لا مو هذا قصدي بس ماجان هيج المفروض تسوي قاطع كلامها ونظر نظره حاده وبصوت حاد : لاتتصورين السويته علمودج لا ابد انتي غلطانه اني السويته علمود صورتي بين اهلي والناس وبس افتهمتي لو لا .
ريم سكتت لعبت بشعرها وكالت : الي اتشوفه
عافته وفاتت لغرفتها .. فتحت باب الكنتور ضلت تكلب بالملابس وتكول كلهن حلوات هسه شلبس اني والله حيره اوووف بعدين راح نظرها على خانة الملابس ال
اخليه وجرت سيت نوم وصلت تتملمس بي ضحكت ضحكه يأس وكالت هسه هذا بله شكو اشتريته هفففف سدت الكنتور وطبت للحمام سبحت وسشورت شعرها وخلت مكياج خفيف وضلت كاعده بالغرفة تسمع صوت محمد يمشي بالبيت ويحجي بالتلفون بأمور الشغل مارادت تطلع وهو محذرها .... صار الليل تقريبا الساعه ٨ محمد بدل وطلع ريم شافته من الشباك رجعت نزلت جوه تفتر وتتفخص المكان اكثر وتكول شنو هالحبسه بله الا من يطلع يلا اطلع طكت روحي شلون رح اخلص هالاسبوع وهو كاعد ويايه من الصبح لليل طبعا محمد اخذ اجازه اسبوع بس لان ميكدر ياخذ اكثر التزامات عنده و ريم اخذت شهر صارت الساعه ١٢ وربع باليل انفتحت الباب وفات محمد للبيت لكى ريم كاعده عالدرج صعد عالدرج ومر من يمها ولاكأن موجوده كامت ريم وصاحت بصوت وين جنت اندار محمد عليها وكال : شنوو؟ شعليج !! ردت ريم :اني اقصد يعني لو جاي احد علينه يلكيك عريس ومن اول ايوم طالع .
رد محمد : هو لان عريس ولان اول يوم محد يجينا عوفيني هسه اريد انام .
ردت ريم : اتعشيت ؟
اندار محمد عليها وباوع بنطره جامده مابيها اي معنى ودار وجه وصعد لغرفته بلا اي جواب ..
ريم ضاجت كلش وصارت عصبيه وكالت : يعني شنو هذا من بشر مريض اي اكيد مريض ولازم يتعالج حتى ماكلف نفسه وجابلي عشى وياه واني اول يوم ولاحتى سألني هسه اوك احنه متفقين على هذا الزواج بس بنفس الوقت ليش ديتصرف بعداء اتجاهي اوووف خلي اكوم اشوف شي اكله لان طكيت جوع .

...

مرت ٤ ايام والحال نفسه كل واحد كاعد بغرفته ماكو اي تواصل ريم كاعده متمدده عالجربايه دك محمد باب غرفتها كامت فتحت الباب وكالت : ها خما سويت شي زعجتك بي مو اني هنا صايره سبب ازعاجات البشريه كطع محمد كلامها وكال : منا لساعه اتحضري امي عازمتنه عالغده .
عافها وفات للغرفته .
مرت ساعه ريم بعدها دتحضر نفسها وسمعت صوت محمد يصيح : يلا ريم شدسوين كل هالوكت ردت ريم يصوت عالي حتى يسمعها : يلا يلا دقايق واجي محمد واكف يم باب غرفته ويباوع كل دقيقه عالساعه ويرجع يصيح يلا ريم صدك تحجين صارلج ساعه ونص شدا تسوين فضيها .
فتحت ريم الباب جانت لابسه جنز وقميص لون وردي وحزام عالخصر اسود وحذاء كعب عالي اسود وجنطه صغيره نازكه بلون الاسود باوع محمد عليها وكال شداسوين صارلج ساعه ونص عبالي رح تصنعين وجه جديد بالهوكت الله يالله عافها ونزل نزلت وراه وصعدو بالسياره .
وصلو بيت اهل محمد واستقبلتهم ام محمد استقبال حار وكل اهل محمد موجودين حسين ومرته جهاله وحيدر ومرته وسرى وخطيبها وام محمد ومحمد وريم كعد محمد يم الولد يسولفون وريم كامت بالمطبخ ويه البنات يشتغلون ويسولفون بسرعه اندمجت ويه الجو ضحك وتحشيش ويه البنات مرت حسين حجت نكته للبنات وريم ضحكت ضحكه قويه كلش بحيث محمد من بين مامندمج بالسوالف انتبه وعينه صارت على المطبخ ووكفه ريم رجع عينه ورجع يكمل سوالفه صبو الغدا وانجمعو الكل كل وحده كعدت يم رجلها صاحت ام محمد ريم وكالت : يلا بنتي تعالي اكعدي يم رجلج باوعت ريم على محمد واتقدمت وكعدت بصفة ام محمد تفلس وتخلي كدام ريم وتوكل بيها مرت حسين بالشقه كالت كافي عمه شنو هالدلال تره كمنه نغار احنه هااا وضحكن هيه ومرت حيدر وكالت مرت حيدر اي عمه انريد احنه هم نفس دلال ريم ضحكت ام محمد وكالت كلجن نفس الحب بكلبي صح ريم اجتي اخر وحده بس هاي تبقى مرت الحبير وضحكت وكالت الله يسعدهم واشوف ان شاء الله خلفتهم هنا ريم غصت بالكمه اتريد تبلعها متكدر ناوشتها ام محمد المي وكالت اسم الله يمه ..
خلصو اكل وسوالف وطلعو محمد وريم متجهين للبيت .

انتهى الجزء السابع
انتظرونا بالثامن
زينب النعيمي