انتماء

انت الوطن وانا شعبك المخلص

ريم رأسا حجت : جنت لازم اروح عالحمام و عبدالله اصر يوصلني لان تعرف اني ما اندل والمكان جبير وانت مشغول
رد محمد بأسلوب المامهتم : اوك يلا نرجع
كملو السهره ورجعو للبيت اول مافاتو ريم نزعت حذائها العالم لان دمرها واتنهدت براحه محمد صعد عالدرج فجأة توقف واندار على ريم وكال : شنو عجبج عبد الله ؟
ريم بأستغراب : شنو هالسؤال هذا بربك
محمد : شفتج مهتمه كلش بي واندمجتي وياه
يحجي وياها ويفك برباطه وفتح دكمه الياخه
ردت ريم : يعجبني او لا حاليا اني متزوجه ولازم احافظ على شكلنا
محمد بتركيز : اي زين
صعد بايه درج ووكف يعني عاجبج بس زواجنا الي موكفج ؟
ريم : ما اعتقد هذا الموضوع يهمك بمنو انعجب اني ركز بحياتك احسن
صعدت عالدرج بسرعه فاتت من يمه فتحت باب غرفتها وكاالت : تصبح ع خير .
.....................
محمد ماكدر ينام ضل يتكلب يمين ويسار على سريره ويفكر : اني ليش هيج صاير ليش صايره هالبنت انزعج من تصرفاتها مع العلم تصرفاتها طبيعيه يرجع يندار على الصفحه الثانيه ويكول : لا شنو طبيعيه هيه لازم تبقى ما تحجي ولا تضحك ولا تنعجب بأحد يعني يعني على الاقل حاليا يرجع يندار للصفحه الثانيه ويكول : ونوره شرح اسوي بموضوعها مادري بس احس مشاعري تغيرت اتجاهه يرجع ينكلب ويكول : لعد ليش بعده يدك من يشوفها اووووووف رح اتخبل ريم ليش هسه دا اكول ريم وافكر بيها غطى راسه كوه واجبر نفسه على النوم .
..........................
الساعه ٨ ونص ريم على مكتبها فاتت ايه بسرعه وفرحانه وحضنت ريم
ايه : باركيلي صلاح البارحه طلبني من اهلي
ريم : الف الف الف مبروك حبيبتي والله هذا من احلى الاخبار الي سمعتها هالسنه
ايه : تسلمين حبيبتي الله يسعدج وان شاء الله قريبا نشوفلج بيبي على ايدج يشبهج منريده يشبه ابوه المطنكر وضحكت
ريم : اييي شوكت حفلة العرس
ايه : تعرفين صلاح ضابط حيلتحق باجر للدوام واول مينزل رح يكون العرس ان شاء الله .
ريم : لعد يرادنله حفله خاصه مال بنات
ايه : اي والله خلص هالاسبوع نرتب يوم اني وياج وايمان ونودع العزوبيه
ريم : هاهيه متفقين وبوست ايه وحضنتها
............................
محمد فات على ريم لمكتبها وكف يمها وهمس بأذنها : احنه واكعين بمشكله ؟
ريم : خير شنو
محمد : تعالي لمكتبي
عافها ومشى لغرفته ريم لحكته فاتت وسدت الباب
ريم : خير شغلت بالي
محمد : امي
ريم : شبيها
محمد : اتريد تجينه زياره
ريم : هلا بيها شكو بيها وين المشكله
محمد : مو هيه مو زياره عاديه تريد تبقى يمنه ٥ ايام
واني حاولت اتحجج بس ماكدرت ماريد اكسر بخاطرها واخاف تكول يطردني
ريم : لا لا زين سويت
محمد : بس عدنه مشكله احنه بس غرفتين نوم مسوين وامي لازم نفرغلها غرفه وحده منهن
ريم : اييييي ؟
محمد : رح انطيها غرفتي واني ادبر حالي
بس لازم نرجع من وكت اشيل كل غراضي وملابسي واخليهن بغرفتج يعني حتى امي لاتشك بالموضوع
ريم : تمام
.....................
رجعو للبيت كامو يشتغلون على السريع بترتيب الغرفه وتحويل غراض محمد للغرفه ريم راحت للمطبخ تسوي تحضيرات لاستقبال عمتها ومحمد بقى يرتب غراضه بالكتنور وكع نظره على خانه ملابس ريم اكو ثوب ستن مصفط لونه لونه بيج لمسه بأيده ملمسه كلش ناعم جره بفضول راد يشوف فصاله ضل يكلب بي طبعا الثوب هو سيت نوم طويل بفتحات على طول الرجلين مابي ظهر وصدره كله كيبور ابتسم ورجعه لمكانه وكمل ترتيب الغراض .
.........................
للعصر وصلت ام محمد للبيت استقبلوها استقبال حار كعدو وريم قدمت اشياء الاستقبال الي سوتها وحالو محمد وريم يبينون انهم سعيدين ويحبون بعض كدام امهم ريم فاتت دا اتحضر العشى و منغمسه بالشغل اجى محمد وحضنها من وره وهمس بأذنها : لاتنطين اي رد فعل امي دتباوع علينه اسف سويت هيج حتى تعرف اني مرتاح وترتاح هيه اندارت ريم عليه وصارت بوجهه وعكدت حاجبها رفعت نفسها وخلت اديها على رقبته وباسته من خده وتقربت على اذانه وكالت : حتى تعرف انت مرتاح .
محمد خجل ماعرف شيسوي ردت ريم بصوت عالي : حبيبي هاك هاي المواد سويلنا سلطه محمد فتح عيونه عليها هزت ريم راسها وخلت الغراض عالطاوله وكعدته كملت ريم شغلها ومحمد كعد يسوي سلطه وام محمد اتقدمت واجت كعدت يمهم تباوع عليهم وتبتسم وتكول : ما شفت زوجين احلى منكم الله يديمكم ويسعدكم ويارب اشيل جهالكم
محمد غلس وعود ملتهي يكمل السطله اما ريم صاحت بصوت : امييين ماما امييييين
تعشو وكملو وضلو كاعدين شويه بعدين كل واحد صعد لغرفته ينام
ريم : اظاهر رح انام سوه اني وياك
محمد : عندج غير حل
ريم : لا بس شلون رح انام
محمد : اني حنام عالسرير وانتي فرشي بالكاع ونامي
ريم : نعممممم نعمممممم
ضحك محمد وكال : اني حنام بالكاع لاتفضحينا
ريم : اوك
فرش محمد بصف سرير ريم ومدد وريم تمددت عالسرير من جهة محمد وطفو الاضويه محمد ضل يتكلب ماكدر ينام كعد
ريم فتحت الضوه وكالت : شبيك
محمد : مابيه شي
ريم : لعد ليش ما تنام
محمد : مدا اكدر انام ماعرف انام بالكاع
ريم : تعال اصعد نام عالسرير
محمد : لا شلون تنامين عالكاع بارده
ريم : ومنو كالك حنام بالكاع حبقى انام بالسرير
محمد فتح عيونه بتعجب : مستحيل شلون انام يمج لا لا
ريم : الجربايه واسعه كل واحد ينام على طرف عموما حبيت اساعدك يلا تصبح على خير
محمد ضل صافن دقايق بعدين كال : ريم
ريم : هممممم
محمد : عادي اصعد انام فوك
ريم اشرب بأديها اصعد
شال المخده وراح نام عالطرف الثاني وريم فتحت الغطى اله بمعنى اتغطى ويايه تمدد واتغطى طفو الضوه ريم اجاها النعاس وغفت بسابع نومه محمد اندار وضل صافن على ريم ويحجي لنفسه : اول مره هالكد اتقرب منها معانيها حلوه وشكلها ملائكي وطفولي مثل الملاك بهالاثناء انكلبت ريم بنومها واجتى دفره لمحمد رجع كال لنفسه : ملاك هههه اني غلطان واندار وناام .
....................
رن المنبه الاثنين صحو على صوته بنفس الوكت ريم كعدت رفعت اديها وتثاوبت وباوعت على محمد لكته يضحك
ريم : يله صباخ الخير عليش تضحك من الصبح
محمد : كفشتج هههههههه
ريم حاولت تنزل شعرها وتعدله وكامت عالسريع فاتت للحمام محمد كعد ينتظر ريم حتى يفوت وراها ريم تأخرت بالسبح ومحمد ضروري يفوت للحمام
محمد : يلا ريم خلصي
ريم : يعني حتى هنا هم لاحكني
محمد : خلصي وبعدين نتفاهم ارجوج
ريم : ليش مستعجل اوكف
محمد : اريد افوت ضروري
ريم : تاليها وياك عاااا
فتحت ريم الباب جانت لابسه برنص ابيض وشعرها مبلل وباوعت عليه وكالت : يلا فوت
بدلت ريم ملابسها عالسريع ونشفت شعرها ونزلت تسوي الريوك لكت ام محمد توها كاعده صبحت عليها وباست راسها ونزلو سويه للمطبخ ريم سوت الكهوه لمحمد وسوت جاي وحضرت الريوك لامه نزل محمد صبح على امه وباس اديها شرب الكهوه وطلعو هو وريم للدوام .
..............................
الساعه ١١ الصبح ريم جانت بغرفة محمد دتشتغل وياه على اضباره فجأة دخلت ايمان
ايمان : العفو قاطعتكم بس ريم اكو شخص اجى عليج
ريم : شخص عليه ؟ منو
ايمان : يكول اسمه عبد الله
فتح عيونه محمد على ريم واشر لها يعني روحي شوفي
طلعت ريم شافت عبد الله واكف باب الغرفه سلمت عليه ودخلو كعدو على مكتبها محمد جان دايراقب تحركاتهم وشلون كعدو من الكامرات جان عنده فضول قاتل يعرف شدا يحجون
عبد الله : اسف اخاف سببتج احراج بس ما انطيتيني طريقه اتواصل وياج
ريم : خير عبد الله
عبد الله : اني عندي شركه مواد تجميل وجايب ماركه جديده حصريه اليه واريد اعرض عليج تكونين الوجه الاعلاني اله .
ريم : مامفكره بالموضوع بصراحه فاجأتني
عبد الله : انتي شكلج وجمالج ممزوج بالجمال الشرقي والاوربي اعتقد حتكونين الشخص المناسب لهذا المكان
ريم : ماكدر انطيك جواب اشاور زوجي وارجعلك خبر
عبد الله : تمام هذا الكارت مالتي اتصلي عليه من تاخذين القرار  واتمنى مطولين .
ريم : خير ان شاء الله
عبد الله : اترخص مع السلامه
ريم : مع السلامه
.......

انتهى الجزء الحادي عشر
انتظرو الجديد
شنو تتوقعون محمد راح يعارض لو ريم رح تتصرف من راسها ترفض لو تقبل ؟

زينب النعيمي