أنت قدري (كاملة❤)

الحلقة الثامنة ❤

صقر : اسف ع اللي صار أمس
نسليهان لفتت وجها : اصلا ما يهمنيش شن تدير انت و خطيبتك عقاب الليل
صقر : انتي فهمتي غلط
نسليهان علت صوتها: تي شنوو بنفهم غلط شفتك بعيووني .. و شدت راسها بايدها بألم : اااخخخخ
صقر : ولع السيارة و قدم
نسليهان مقعمزة وراه تخبط فيه ع كتفه : هي هي انت وين رافعني ؟ اووقف
صقر : بنوقف ع محل قريب
صقر نزل للمحل و جاب معاه زوز ايس كريم
و فتح باب السيارة من جهة نسليهان و مدلها طرف
نسليهان ضحكت : شنو تحساب روحك تبي ترضيني بطرف جيلاطي؟
صقر جبده : به خلاص مش لازمك و قعمز ع المرشبيدي مقابلتها فتح الايس كريم و ياكل فيه
نسليهان تشبحله و بتموت من كمية البرود اللي عنده قربت منه و خدت الايس كريم من الكيسة و فتحاته و قعدت تاكل فيه بنفس الطريقة اللي هوا ياكل فيها
صقر يشوفلها و شاد ضحكته
نسليهان تاكل و تتكلم : شنو خيرك
صقر ابتسم و قرب منها و مركز ع فمها و نسليهان مستغربة و متوترة
نسليهان : باه حول معاش نبيه هاكه
صقر قرب و مسح طرف فمها بصبعه : تعرفي انك تاكلي زي البيبي 😁
نسليهان : مبردك هيا اكيد البنات طلعوا
كملوا الايس كريم و وقفوا قدام العيادة و بسرعة ما طلعوا البنات و خطموا صفاء ع الجامعة روحو الحوش
سرور : وااو مش مصدقة حصلت شغل اهني و العيادة تجنن تعرفي و فخمة
نسليهان : اي الف مبرووك حبيبتي
سرور : سامر قال إنه بيحولك للجامعة اهني مع صفاء
نسليهان : مش عارفة حاسة ان القصة بتطول امتى بنروحو؟
سرور : علمي علمك قالو وراقي الورثة مزال يبو وقت
نسليهان : تعالي نطيبو فطور ع السريع اكيد الاولاد جاعو
سرور : انتي طيبي الفطور و انا خليني نلف ع الحوش
و ما بين نسليهان توتي فالفطور و منشغلة حست ب حد قعمز ع الطاولة تلفتت و لقاته 😍
لابس بدلته متع الشرطة و شعيراته مساويات و هديكا الريحة معبية المطبخ
نسليهان قعدت فترة مسبوهة فيه و تتأمل في جماله و رجولته❤(يا بنات اني بروحي حبيته يا سعد نسليهان🤤😂💔)
صقر و عيونه ف التليفون : هيا الفطور واتي ؟
نسليهان فاقت و قعدت توتي ف الطاولة قدامه
صقر : وين القهوة مانحبش الشاهي ع الصبح
نسليهان قلبت عيونها😏: و انا نحبها تبي قهوة ديرها بروحك ساد اني درتلك هذا
صقر قام عيونه و شبحلها : والله ؟
نسليهان : اي والله 🙂
صقر ناض بكل برود لبس كاداره و ربطه خدي مفتاحه و طلع
نسليهان: مبرررده مبرررررررده
زياد : خيرك في من تكلمي؟
نسليهان : اففف اسكت من عليا حتى انت
....
في العشية روح صقر بكري لانه ما فيش شغل الوقت هذا و بيرجع فالليل
تغدا و قعد يدور في نسليهان لقاها تكنس في الجنان
صقر : الجو نو خشي
نسليهان : لا عادي
صقر : قتلك خشي
نسليهان طبست بتقيم حاجة ع الارض و كانت حادة جرحتها : اااااه صبعي
صقر شد صبعها و قعد ينفخ عليه علي خشت مودة اللي ولعت طول
مودة : ااه و انا نقول ليش ما تعدلش عليا طلعت هدي الحرباء حاطت بيك حولي حولي يا سراقة الرجال
نسليهان شبحتلها بسخرية
صقر غمض عيونه بقلة صبر : اول شيء الناس تطق قبل ما تدخل بيوت الناس تاني شيء نعاود و نكرر انتي ما ليكش علاقة بحياتي نهائيا فهمتي
مودة حطت ايدها ف خصرها : والله انت خطيبي نسيييت
صقر طلق ايد نسليهان : تمام تمام تمام تفضلي
مودة شبحت لنسليهان شبحة تخوف وكملت: بكرا عيد ميلادي و عازماتك انت و البنات و تلفتت لنسليهان بضحكة مستفزة و حتى انتي تعالي
نسليهان هزت راسها بلا نية
و خشت للحوش تنادي في صفاء بلا احم ولا دستور
تاني يوم مع المغرب البنات واتيات
صفاء لبست فستان ناعم للركبة سماوي عاكس ع عيونها مع كعب ابيض و شعرها لفاته كعكة و مكياج سيمبل بس طالعة كيوووت 😍
و سرور لبست جيمب سوت موف فيه حزام اسود نازك مع كعب اسود و شعرها خلاته ع اكتافها و مكياجها حلو و ناعم❤
نسليهان كانت التوب فيهم طالعة تقتل لبست فستان احمر طويل مخصر ع جسمها مع كعب فضي و دارت شعرها فلو مع بروش فضي و مكياجها ناااري 🤤🤤🔥
لبسو عباياتهم و رفعهم صقر لحوش مودة
من اول ما نزلوا كانت صوت المنظومة واصلة للشارع
خشو البنات للحوش و كان الدنيا مقلوبة فوقي لوطي البنات كلهم يرقصوا و كان عددهم كبير و مودة تلقتهم من الباب و زي ما تخيلتوا انتم شكلها قفطان قصير لااااصق دهبي لماع ظهره كله عريان و لابسة كعب عشرة ميترو و شعر طويل واضح انه مستعارر و المكياج اووووفرررررر روج احمر فاقع و كحل داكن و عدسات و الحكاية خاشة بعضها مش حلوة بكل
حولو البنات عباياتهم و قعمزو و الجو ما مشاش معاهم رقيص فاضح و هدرزة متاع تشقليع و لبس نفس موديل مودة
مودة : نسليهان نسليهااان
نسليهان جتها : نعم ؟
مودة : بالله حبيبتي حطيلي تليفوني فالشحن فوق غير ماقدرتش نخلي البنات ونركب وانتي ثقة
نسليهان استغربت : به حاضر🙄
مودة : فوق اول غرفة ع اليمين
نسليهان ركبت للدرج و خشت الغرفة تدور ف الشحن لقاته و طبست تحط ف التليفون فجأة الباب يتسكر من وراها
نسليهان تلفتت و لقت شاب ضخم طويل و عضلات و منظره ما يطمنش : اااه اااه ب بنطلع لو سس سمحت
كمال ضحك و يقربلها : و لو ما سمحتش ؟
نسليهان : بعد من عليااااا بعد منووو انت ؟
كمال : محلاك اول مرة نشوف ملاك ع الارض🔥
نسليهان : والله نعيط نجيب الدنيا كلها
كمال : هههههههههههه مش ح يسمعك ولا واحد لذا اسمعي كلامي و كوني عاقلة احسن لك😉
نسليهان خافت و قعدت ترعش : شش شن تبي مني باهي ؟
كمال : نبيك انتي
نسليهان : ك كك كيف ؟
كمال يقرب : نتزوجو 😉
نسليهان شافت مزهرية قريبة منها و خلاته يقرب و ضرباته ع راسه بقوة لين طاح يتألم و مشت بتهرب تفتح ف الباب جبدها من رجلها و هيا تقاوم و تضرب فيه لين فلتت منه و نزلت لقت اختها سرور حضنتها و قعدت تبكي
سرور : خيركك شن في ؟؟علاش تبكي
نسليهان ما بتش تقوللها : ااه ااه تفكرت ماما وبابا
سرور طبطبت عليها : خلاص حبيبتي مش وقته ربي يرحمهم
و نسليهان منهارة تبكي بحرقة لين تمت الحفلة جي صقر روح بيهم طول خشت دارها بدلت ملابسها غسلت وجهها و رقدت
ثاني يوم كان عادي
صقر مشي للشغل و سامر و سمير كذلك لانهم يخدمو في شركة نفسها و فيها فروع ف انتقلوا للفرع اللي فالمدينة هدي
و زياد و منير ديما في للشارع مع الاولاد
صفاء في جامعتها و نسليهان ناضت متأخر لان نومها كان ملخبط و كوابيس هلبا و سرور تدير ف الغدي كسكسي و مبطن
مع العشية روحو كلهم ما عدا صقر طبعا
قعمزوا ع الشاهي و حلويات
سرور لاحظت نظرات بين سامر و صفاء و خنست من الموضوع 😂❤
صفاء طلعت و لحقتها
سرور : هااا شنو اعترفي
صفاء مش فاهمة و تضحك : شنووو😂
سرور : شن بينك و بين خوي سامر هاا؟
صفاء : ههههه والله ما في حاجة لكن تبي الحق مشالله عليه🙈
سرور : هههههه يوخيتي سلمها مرت خووي
صفاء : ههه مسرع هوا ما نندريش عليه شن مشاعره اتجاهي 🙈
سرور : لالا ملاحظة نظراته حتى هوا باين عليه يحبك
صفاء فرحت و ضحكت : انشالله🙊❤
نسليهان خدت الحوايج و طلعت تنشر فيهم برا ع الحبل
فجأة حد يشدها و يغملها فمها و ماعاش حست بشيء الا و هيا ف مكان غريب مظلم و سطل امية يصب فوقها
نسليهان تكح و ترجف من الصقع و مش قادرة تتكلم فمها مسكر و ايديها و رجليها مربطات و من بين الظلام طلع هوا و كان....... يتبع
.
.
.

لو كان وصلت/ي لنهاية الحلقة فضلاً و ليس أمراً أترك/ي تعليق ليا 💕 سواء كان اعجاب بالرواية أو إنتقاد نتقبل أي شيء المهم نعرف رأيكم ( مع العلم هدي أول رواية نكتبها ) و شكراً ☹💕