نسليهان قرت ورقة التحليل و كانت صدمتها
كان التحليل يأكد انهم من نفس العيلة و نفس الجينات و ان صبحية امها
نسليهان طاحت منهارة ع ركابها ياااارب يااارررب ، ياارررب حقا انا امي عايشة ياارربي حقا انا بنحضن امي يااررب حقا انااا توا بنقول اني مش يتيمة الأم ياارررب انا توا بنووض ع ريحة امي يارب انا توا بنرقد مرتاحة من غير كوابيس يارب انا توا بيبدأ عندي ايد تطبطب عليها توا بنقدر ننادي ماما و هيا ترد علياا يااارررب احمدك حمدا كثيرا مباركا فيه يارررب كانت تبكي و تبكي دموووع مخلطة فرح و حمد و امل و رضاء بقدر الله و شكر ليه دموع سعادة تلقطوا عليها الممرضات و اعطوها امية
ناضت تمشي زي السكرانة و مرة تبتسم و مرة تضحك و دموعها ما وقفوش و تردد في كلمة يالله نحمدك
مشت طول لحجرة العناية وقفت قدام الزجاج و حطت ايدها عليه تتأمل في صقر و تبكي
حبيبي نووض مش تكمل سعادي يا عمري انا لقيت ماما اي يا عمري انا مش يتيمة انا عندي ام حية يا صقوري تعافى يا عافيتي
صفاء بصوت خافت حطت ايدها ع كتف نسليهان: تعالي حبيبتي كولي ما كليتي شيء من امس
نسليهان : انا عندي ام يا صفاء😭
صفاء ما فهمتهاش : كيف ؟
نسليهان : اي اي انا عندي ام ماما هيا صبحية والله انا درت تحاليل و طلعت ماما 😭
صفاء : شن تقولي ؟
نسليهان فهمتها و هيا منهارة و ورتها التحليل و حضنتها و هما الزوز يبكوا و مصدومين فالقدر
مشت نسليهان ل سرور و حضنتها : احني مش يتيمات يا سرور احني الام اللي جابتنا مزال حية يا وخيتي 😭
سرور مصدومة و تمس ف حرارة نسليهان : خيرك نسليهان مزال مريضة ؟ تعالي كولي
نسليهان تهز براسها : لالالا يا حبيبتي شوووفي التحليل يتبت اني و صبحية من نفس الجينات و هيا ماما والله ماما انا حسيييت والله الحمدلله يا ربي ما خابش ظني 😭
سرور انهارت تبكي و مصدومة من كلام نسليهان كيبف الشيء هذا يصير ليهم سنين وحيدين ليهم سنين ضايعين لا حد يواسيهم ولا حد يحن عليهم باهههي علاااش علاش ما جتهمش علاش ما دورتهمش علاش ما شافتش صغارها كبدها معقولة هانوا عليها علاش خلتهم كل هالسنين لا قلبها حن ولا فكرت مرة تشوفهم ؟
نسليهان ناضت وقفت و مش عارفة كيف توصل فيها ثاني و تكلمها لانها ما خدتش رقمها
جو الاولاد للمستشفى و عرفوا بالخبر لكن ما خشش الموضوع دماغهم بكل و قعدوا فترة مسبوهين يفكروا ف اسباب للي صار لكن ما فهموش
مر اليوم عليهم يفكروا بمستقبلهم و حياتهم زعما امهم تعترف بيهم ؟ باهي اهي تزوجت و كملت حياتها و قالت ان عندها ولد واحد بس ؟ كيف هذا الشيء ؟
روحو للحوش و كان النوم صاعب بسبب حالتهم و عقولهم الشاردة نسليهان خبر امها فرحها هلبا بس كل ما تتدكر صقر و انها مرات تفقدت قلبها ينقبض و تخش لحالة الحزن ثاني
______
ثاني يوم صقر تحسنت حالته و طلع من العناية
مشوا البنات رفعهم سامر
خشو لصقر و كان معاه واحد ما يعرفوشي من اول ما شافهم استأدن و طلع
سرور شافتله و حست بشيء غريب اتجاهه بس خلت روحها عادية
سامر اتطمن ع صقر و طلع قعد يهدرز مع الشاب و تعرفوا
نسليهان مقعمزة جنبه و دموعها ينزلو صفاء تبكي و تترجى فيه يفتح عيونه و سرور مقعمزة بعيد و تسمع ف حديث سامر و الشاب
صفاء طلعت قالت تبي الحمام استأدن سامر و مشي لحقها من غير ما يلفت النظر
سرور طلعت و قعمزت قبالة الشاب و شدت تليفونها
نسليهان قعدت مع صقر بروحهم صدره عريان و الاجهزة مركبة و جرحه مضمد قعمزت ع السرير بحداه و شدت ايده تتحس فيها و تدعيله بصوت مسموع
" ياارب ما تحرمني منه يارب ما تعيشنيش يوم بدونه يارب خودني قبل ما نحظر يوم فراقه يارب تكون ساعتي هيا ساعته و خودنا مع بعض يارب "
صقر ضغط ع ايدها و نسليهان قربت و شدت لحيته : حبيبي حبيبي تسمع فياااا انا نسليهان جنبك حبيبي افتح عيونك شوفلي خليني نشوف عيونك اللي ديما معذبيني خليني نذوب فيك زي قبل حبيبي هيا انت قوي انت بطلي اللي ديما نحلم بيه و فارس احلامي لقيتك بعد وقت و ما نبيكش تخليني يا عمري هيا صقري هيا نوض و رفرف بيا لعالم فيه انا وياك بس انا وياك نحبو بعض فيه و ما فيشي حد ثاني يحسدنا ولا يخرب فرحتنا
صقر فتح عيونه بشويا و نسليهان تمرر في ايديها ع خدوده و تضحك و تبكي يا عمري انت نحبك والله اي نحبك انت الشخص اللي غيرلي دنيتي احلى و غيرني حتى انا ، انا البنت اللي كانت ما تعدل ع شيء و فاقدة الامل بعد ما شفتك بديت نهتم بروحي و نرتب ف كلامي مية مرة قبل ما نشوفك نحبك صقري
صقر يشوفلها و يفتح ف عيونه بالسيف و ضاغط ع ايدها عيونه فيهم هلبا كلام فمه مش قادر يقوله
صقر بصوت ثقيل : ااانااا ..... نسليهان حطت ايدها ع فمه : اسسسسس انت حبيبي وبس
قربت منه باست عيونه : امووواه لهالعيون اللي نحبهم انشالله ما نفقد نظرتك
جت الممرضة و نسليهان بعدت قعدت تكشف ع الجرح و تغير ف الفاشة و نسليهان غمضت عيونها و كأنها تحس بألمه
______
عند صفاء خشت الحمام تبكي و تغسل في وجهها شافت للمراية لقت سامر وراها
تلفتتله و قعدت تبكي
سامر قرب منها و قعد يهدي فيها و هيا منهارة فجأة معاد تندري على روحها الا و هيا ف حضنه تبكي و هوا لاف ايديه عليها كأنه يقوللها ابكي ف حضني و ارمي همك عليا انا نتحمله و انتي تريحي
بعدت راسها و رجعت لوعيها و حست بالخجل و خدودها البيض ولو حمررر و خشمها احمر من البكي و عيونها الزرق منفخات مسحلها دموعها و ضحك : باهي و التيشيرت بليتيه بدموعك توا كيف نديرله😅
صفاء تحشمت : اني اسفة والله ماقصدي
سامر ضحك : نبصر عليك يا فرخة
______
عند سرور كانت مقعمزة و مدايرة روحها لاهية بالتليفون لكن مرة مرة تخطف نظرات
ناض قعمز جنبها : كيف حالك ؟
سرور قامت راسها: تمام وانت
الشاب : انا اسمعي حسام صاحب صقر 😊
سرور : اااه تشرفت بيك و انا سرور 🙈
و قعدوا يتعرفوا و خدوا ايميلات بعض و ناض حسام استأدن طلع من المشفى خشت سرور لنسليهان لقتها شادة ايد صقر
سرور : مرات سامر يجي
نسليهان فاقت من شرودها : اي صح و طلقت ايده
شويا و جت صفاء و لحقها سامر قعدوا شويا و طلعوا بيروحو
نسليهان طلعت من المشفى لمحت نفس الراجل اللي كان واقف المرة لفاتت مع محمد
نسليهان: سامر هذا الراجل يعرف محمد الي حكيتلك عليه انا متاكدة
سامر مشي حكي معاه و طلع حق يعرفه و اعطاه رقمه
قعمزوا ف السيارة و سامر اتصل بيه و قاله ضروري تجي انت و بوك و امك اليوم العشية
روحو و قعدوا البنات يرتبوا ف الحوش و شروا حاجات حلوة و دارو عشي و فرحانين هلبا كيف ح يكون لقاءهم بأمهم و كيف ح تعاملهم بعد ما تعرف انها امهم
مع العصر جو العيلة الطاهر و محمد فالمربوعة مع الاولاد و صبحية مع البنات ف الصالون يهدرزو و جي وقت يقولولها الخبر
نسليهان : ماما صبحية 😊
صبحية فرحت بالكلمة : نعم بنتي
نسليهان : مش قتلك ديري تحليل و هوا تحليل جينات DNA و انتي طلعتي ماما و دموعها ينهمرو
صبحية مش فاهمة بكل
فهمتها و ورتها التحاليل كانت صدمتها كبيرة لكن مش هلبا لانها كانت تحس ان في جزء مفقود في حياتها
خلي نحكيلكم القصة من زمن طوويل لما صارت الحادثة ف المحل مات بو نسليهان و امها ما ماتتش هيا انحرقت و تشوهت بشكل كبير بس لكن في مراة تانية ماتت محروقة ولان الطب كان قبل مش اوي يحسابوها هيا نفسها امها ماتت اللي هيا سهيلة اسمها الحقيقي مش صبحية قعدت ف المستشفى قداش ف غيبوبة و فقدت داكرتها بالكامل و بعدها قعدت تتعالج و اثار الحروق عميقة ما تبيش عملية ولا اتنين و بعدها تعرفت ع الطاهر و كان مطلق حبها و تزوجها و دار كل شيء ع خاطرها و هلبا عمليات خضعتلها لين شكلها ولا طبيعي عاشت مع طاهر سنين و كان هوا حاضرها و ماضيها طول حياتها تحس ان في جزء مفقود ف حياتها ما عندهاش دكريات ولا عندها ماضي ولا طفولة لين صار اللي صار و عرفت كل شيء
نسليهان حكتلها كل شيء هداكا اليوم بالتفصيل الممل و كانت زي الطيف تمر ف داكرة صبحية
نسليهان راقدة ف حضن صبحية: يعني محمد خونا ؟
صبحية : ........يتبع
.
.
.
لو كان وصلت/ي لنهاية الحلقة فضلاً و ليس أمراً أترك/ي تعليق ليا 💕 سواء كان اعجاب بالرواية أو إنتقاد نتقبل أي شيء المهم نعرف رأيكم ( مع العلم هدي أول رواية نكتبها ) و شكراً ☹💕
أنت تقرأ
أنت قدري (كاملة❤)
Romansaروواااية ليبية رومااانسيةة ، تفقد نسليهان عائلتها في حادث مروع و تعيش تعيسة الى ان تجمعها الصدفة به و لكن لازلت هناك عواقب لا تجعل سعادتها تكتمل .. " انت قدري" ❤❤
