أنت قدري (كاملة❤)

الحلقة التاسعة ❤

#انت_قدري ❤🔥

و فجأة طلع من بين الظلام و كان شخص شايفاته من قبل
قعدت نعصر في ذاكرتي اللي رغم اجهادها ما خانتنيش و تفكرته و انا نرعش و نبي نحكي بس قطعة الشريط اللي ع فمي منعتني نبي نبكي و نبي نعيط و نبي نستنجد و نبي نقوله علاش هكي درت فيا لكن ما قدرتش ندير شيء الا دموعي بس قدرو يهربو و خدو طريقهم ينهمرو ع خدودي بغزارة
كمال : ههههه شفتي مش قتلك راح تندمي لو ما سمعتيش كلامي؟قرب منها و هوا يلمس في خصلات شعرها : شوفي انا غيرت الخطة و مش ح نديرلك شيء لمدة 24ساعة لين خوتك و حبيبك صقور يجيبولي 2مليون و بعدها نطلقك و لوووو فاتت المدة و ما وصلني شيء بخخخخ اعتبري روحك بديتي عبدة ليا و تحت امري و انسي ان عندك عيلة و باسها و هيا تنتفض و تحاول تفك روحها لكن محاولاتها كلها فاشلة كملت ليلتها دموع ف الظلام و كمال ما رحمهاش ولا حتى فكر انها مبلولة و صقعانة و بتموت من الخوف ، فاقت الصبح مجهدة و عيونها منفخات من كثر البكاء و راسها دايخ لانها ما كلت شيء من اليوم اللي قبله و كان في ضيء يتخلل جدران المكان و النافدة الصغيرة العالية قعدت تتأمل في المخزن اللي قاعدة فيه ادوات و خردة هلبا لين شافت منشار يقطعوا بيه فالاشجار ع مسافة مش بعيدة و كان واقف قعدت تزحف و هيا مقعمزة بالشوية بالشوية لين وصلت و مدت رجليها تحاول تمزق الشريط و فعلا نجحت و هيا مش مصدقة و فرحانة و قعدت تلف في نفسها لين قعدوا ايديها المكتفات مقابلة المنشار و هيا تحاول تمزق الشريط جرحت ايدها بس كملت لين تمزق و نحت الشريط اللي ع فمها و وقفت بتعب تدور ع الباب و مشت تجري فتحت الباب بسهولة لانه كمال ما كانش مداير حساب انها تقدر تفك روحها طلعت و كانت الدنيا خالية عبارة عن مكان كله اشجار و خلاص و ما فيش صوت اي سيارة ولا اي انسان قعدت تجرري تجرري تجرري و كان همها بس انها تبعد و ما يقدرش يوصل فيها كمال ساعة و هيا مرة تجري و مرة تقعمز تستريح لين شبحت زي الكوخ قدامها قربت تشوف لو في حد و ...
-------------
عند صقر كان بيهبل بسبب اختفاء نسليهان و زي المهبول يدور في الشوارع و يطق ع الحياش ما رقدش و هوا يدور و ما خلا مكان ف منطقهم ما شافاش و خوتها نفس الشيء و سرور خشت حالة نفسية و تبكي طول الوقت و صفاء حتى هيا مش عارفة شن تدير ، روح صقر و هوا مهموم و مش عارف شن يدير خلا الشرطة اللي معاه كلهم يدورو ف كل مكان و كلم معارفه كلهم و قعمز و صفاء تدوي تدور في حلول و عقله مش معاها بكل لين تليفونه رن برقم غريب قامه و رد
صقر : الو؟
كمال : عندك 24ساعة تجيبلي مبلغ 2مليون و تحطه ف منطقة ... شارع .... و إلا احلم مزال تشوف حبيبتك
صقر وقف : منووو انت و كيف عرفت الرقم تصكر الخط في وجهه
طلع من الحوش ركب سيارته و مشي للبحث الجنائي و كلم معارفه يشوفوله الرقم لي منو دقايق و قالوله اسم شخص لكن ما يعرفاش منو ؟ و اول مرة يمر عليه ، طلع للمقر و تجمع مع شرطة و ضباط محترفين و قعدو يخططو كيف يشدو الشخص هذا قعدوا يتصلوا بالرقم بس يعطي الرقم غير مستعمل و عرفوا انه استخدم شفرة و اسم مزيف و كسر الشفرة روح صقر و لقي خوت نسليهان مقعمزين و كل واحد همه اكبر مالثاني و مش عارف شن يدير
صقر : كلمني الشخص اللي خطفها
سامر وقف : والله و شن قالك
صقر : قال يبي 2مليون مش يطلقها
سمير بصدمة : و احنا منين بنجيبوهم ال2مليون ؟؟
صقر : خلو الموضوع عليا اتفقت انا و افراد الشرطة نديروله كمين ع المهم قلتلكم مش يهدأ بالكم شويا انا طالع بنتم بقية الامور
سامر : خلي نمشي معاك
صقر شافله : به تمام هي
طلعوا و مشو للمقر و كانت الخطة إنهم يستدرجوه يحطو حقيبة فلوس فالمكان اللي قال عليه و يتخبوا و لما يطلع يمسكوه
مشو كلهم للمكان و كان حي قديم ما فيشي سكان هلبا حط صقر الحقيبة و خلى باقي الفريق متخفبيين و دار روحه مشي قعدوا يراقبوا لين طلع شاب صغير فالعمر مسك الشنطة و هوا يتلفت حواليه مسكوه الشرطة و معاهم صقر و سامر
صقر شده و ضربه : منوو انت و شن تبي منا؟
الشاب : والله والله ما ليا دخل والله
صقر : كيف من تكون انت
الشاب : ما نعرف شيء واحد اعطاني فلوس مش نجيب الشنطة و هددني لو قلت عليه يقتل عيلتي
صقر : من هوا الشخص و كيف شكله
الشاب يبكي : والله ما نقدر راح يقتل عيلتي
صقر : قول و نوعدك نبعت واحدين من الشرطة لحوشكم يحموكم
الشاب : واحد ضخم و طويل و اسمر شويا و والله ما نعرف عليه شيء تاني
صقر : وين قالك تسلمها الشنطة ؟
الشاب أشر : غادي في الحوش هداكا
صقر طلقه و خلى زوز من الشرطة يمشو معاه لحوشه
و مشي هوا و سامر وباقي الفريق للحوش بس دورو و كان في حد
و وصلاته رسالة فتحها ( الوقت يمر يا صقورة )
صقر خبط التليفون بكل قوته و يعيط : تيييي منووو هذااااا منوووو بنقتله انننييي ضروري نعرفه و نووووصل فيه ضررووري فهمتووو
شرطي : استاذ صقر يبدو ان الشخص يتلاعب بينا
صقر : برا انت و باقي الفريق انتشروا في الحي كله فتشوه حوش حوش
مشو الشرطة و قعمز ع المرشبيدي حط ايديه ع راسه
سامر واقف زي المسبوه مش فاهم ولا عارف شن يدير
الشرطي جاي و يكر في شخص : استاذ صقرر
صقر وقف : شنو ؟
الشرطي : ....
____________________
نسليهان قربت ع الكوخ و قعدت تشوف لو فيه حد و كان فاضي
خشت و كان فيه غرفة فيها سرير و تلفزيون و مطبخ صغير و حمام
كانت تاعبة و جعانة فتحت الثلاجة و قعدت تاكل بشراهة و تشرب ف المية
خشت الحمام دوشت و ردت ملابسها و سكرت باب الكوخ كويس و رقدت و هيا مهمومة و تايهة و مش عارفة كيف تروح و كيف تكلم حد يروح بيها
ناضت الصبح و انخلعت بعيون تشبحلها قعمزت و كانوا مراة كبيرة فالسن و شيباني
نسليهان : انا انا كنت تايهة و لق لقيت الكوخ قعدت فيه
المراة قربت و قعمزت جنبها : ما تخافيش بنيتي و احكيلي بالشويا
نسليهان خافت تقوللهم انها مخطوفة : ااه ااه كنت جاية مع العيلة و ندهور فالمكان تهت و معاش عرفت نرجعلهم
المراة ابتسمت: باهي تو نعطوك تكلمي حد من خوتك ما تخافيش
الشيباني ضحك : اهو ولت عندنا بنية
المراة ضحكت بقهر : هيا تعالي نفطرو بنتي اكيد جعانة
نسليهان ابتسمت باطمئنان ليهم : اي هلبا 🙈
الشيباني : انتي بنت منو ؟
نسليهان : عيلة ال....
المراة حست و كأنها تعرف اللقب لكن ماتعرفش من وين
نسليهان : و انتم ؟
الشيباني : انا من عيلة ... و لطيفة من عيلة .....
نسليهان انصدمت : ..... يتبع
.
.
.
لو كان وصلت/ي لنهاية الحلقة فضلاً و ليس أمراً أترك/ي تعليق ليا 💕 سواء كان اعجاب بالرواية أو إنتقاد نتقبل أي شيء المهم نعرف رأيكم ( مع العلم هدي أول رواية نكتبها ) و شكراً ☹💕