كيان

٧

كنتا بعاين ل كيان و م عارفه اقول شنو!..

  طلعنا من المستشفى و قلتا ليهو عايزه اتمشى براى بعدين برجع البيت قال لى تمام ..

   مشيت و كنت بفكر ف كلامو و لقيت انو فعلا صح ..

  لأول مره يجى ف بالى أنى أتجاوز و أنى مفروض أنسى ..

  كنت ماشه طبيعى لمن م لقيت خيال زول ماشي وراى .. ف البدايه م اشتغلتا بالموضوع بعديين حسيت انو الزول قرب و فعلا اول م اتلفتا عشان اشوف لقيتو راجل كبير شال التلفون من يدى و الشنطه و جرا ..

انا بقيت بصرخ و كان ف ولدين واقفين قصادنا بقو جارين وراهو و انا طبعا بقيت بجرى معاهم ..

  الراجل كبير م قدر يتم الجرى و وقف و بقا بياخذ نفسو بصعوبه ..

  الاولاد م عرفو يدقو و لا يعملو شنو نسبه لانو عمرو كبير بقو بتكلمو معاهو و انو كيف يتصرف تصرف زى ده ..

  الراجل بقا ببكى و انا لمن شفتو ببكى كده قلبى حسيتو ف يدى ..

_اعمل شنو؟!..ف زول نفسو يبقا حرامى؟!..و لا ف زول نفسو يدخل مال حرام بطنو .. دى البلد المرض دى .. مرتى عيانه و اطفالى بنومو جعانين و شغل ماف !.. 

  دى المدنيه القلتو عايزنها ؟!..

استفدنا شنو منها؟!..

  كل شى بقا غالى و رحمه ف قلب زول ماف😭(خته يدو ف راسو و قعد ف الارض ببكى ..)اعفى لى ي بتى دى اول مره اعمل كده و ي رب تكون الاخيره .. استغفر الله

نرمين:...(لقيت الشباب برفعو من الارض و كل زول طلع مبلغ من القروش ..)

  الراجل عاين ليهم و ضحك ..

_السرقه جات ف لحظه وسوسه الشيطان .. خلو قروشكم معاكم بس ادعو لى ..(و مشا ..)

  م عرفتا اقول ايه للراجل بس كسرت النفس الفيهو كانت كفيله توضح لينا قدر شنو بلدنا رجع لوره ..

  انا م بشوف انو السرقه صح حتى بعد المبررات دى كلها لانو ف النهايه الغلط غلط ..

  بس نفس الأنسان ضعيفه قدام الغلط .. ضعيفه لمن نشوف البنحبهم جعانين ٫ عيانين ٫ زعلانين و م قادرين نعمل شى ..

  شلتا حاجاتى و مشيت لحجه فاطمه سلمتا عليها و قعدتا معاها ...