أحبته رغم الضروف ( روايات ليبية )

حلقة 19🔥

#أحبته_رغم_الظروف
#الحلقة_التاسعة_عشر

فـــي صبح يوم الاثنين
يقين :توتو حبيبي يا كسول انت فيق💝
اني : ما نبيش خليني راقد
يقين : امممممممم به على راحتكـ ههههههههـ 😍 بس هذا تليفون منو
اني : هاااتي جاااي
يقين : جاتكـ رسالة ترا نشـــوووووف و فتحتها و قعدت تقرا بـــصوت عالي و لما كملت قعدت تشوفلي و عيونها راحو حمر
اني : شن قــلتي:/  ؟؟
يقين : زي ما سمعت قالتلكـ انــي ادالين كانكـ مش مخزن رقمي و راهو جاية بعد صلاة الظهر
أني : تــي هاتي جاي شن الدوه هاذي 😠 و اتــصلت بيها على نفس الرقم الى باعته بيه الرسالة
أدالين : الـــو
أني : شن تبي انتي من الاخير هاتي
ادالين : ههههههـ مع الوقت تعرف ولا نقولكـ توا نقولكـ شن نبي بعدين و اصلا عندي ليكـ خبر خيااااالي يهببببببببببببل
أني : ما تجيش تــوا نجيكـ اني وين انتي
و مــا حسيت غير بـ دفت يقين هي هي قوللها تجي
أني : شن تجي
يقين : قوللها تجي هــني
ادالين : هي خلاص شكلها حتى هيا تبيني توا نبي نسكر سلاام بممم
يقين : شن تقوللها ما تجيش مــن توا كل تصرف حـ يصدر منكـ معاها حـ يكون قدامي تبي تشوفكـ قدامي فاااهم و توا نوض افطر اصلا قريب الظهر و ناضت
قعمزت قعدت نفكر زعــما شن هوا الخبر وعلاش جاية ولا غير تبي تنكــد علينا يا ربي 😔 فــكنا منــها
فطــرت و مشي الوقت و يقين حــتى الكلام ما تبيش تتكلم معاي كله تتفرج على التلفزيون
ادن الظهر مشيت صليــت و لما روحت فتحت الباب :ها شن جت ؟
يقين : لا و انت علاش قاتل روحكـ عليها من بكري تسحن جت ولا مزال 😡
أني : باش نفتكـ مــنها بعدين تكلمي كويس خير ما نحدفكـ توا شن المريضة هاذي مش ناقص اني
يقين : شن قلت 😠
اني : يـقين اعصابي مش متحملة فكيني منـكـ
يقين : هه انــت خيركـ
أني : يقـــــــــــــــــين 😡
قعدت تشوفلي و عيونها تــعبو دمــوع شــويا طــق الباب مسحت دموعها و خشت لـي الدار تجري فتحت الباب
أدالين : هلا 😘
أني : خشي
قعمزت على الكنبة و بــصوت عالي وين يقين
يقين : اهيا يقين و جت و قعمزت
أني : كيف حالكـ يا ادالين
ادالين : بــخير و الحمد الله أصلا كيف يبي يكون حالي بعد ما سالت عليا 😍
أني : هه أي قلتي انكـ تبي تقولي حاجة شن فـي ؟
ادالين : اللطف خيركـ مستعجل بعدين قعمز خيركـ واقف
يقين : خليكـ واقف 😒 و انتي فهميني شن تبي منـه
ادالين : اعصابكـ حبيبتي بــعدين اصلا الموضوع الى جاية نبي نقوله يبي نااس رايقة و جوها حلو مش متنرفزة
اني: شن فــي ؟
هــني وقفت و قعدت تشوفلي و تبتسم و عيونها قلوب قلوب و قالتلي بــصوت واطي : عــن قريب حـ تولي بابا
يا ساااتر ياا ربااااااااه لحظة لحظة شن قلتي
يقين : شن 😨
أني : اصبري هههههـ غير شن تقولي بابا شن
ادالين : واضحة يعني بعد 9 شهور حـ تولـــي بابا 😍 حـ يجيكـ ولــد صــغير كنوش يلعب معاكـ
أني : ادالين اوخيتي اكيد غالطة فـي النعته قــصدي مستحيل
يقين : شن هوا الى مستحيل يا وقح يا حيوان و جاي تقولي نتزوجو و تقولي انكـ سيبتها و ان ما في بينكم شي
ادالين : لا يا حلوة املا اهو طلع الحق تسخفي
يقين : انــت يا طــه 😭 مش مصدقة يا ربي هاذي شن تقول و مشت تجري لـي الدار
لحقتها : يقين يا بلوة تعالي
يقين : حـــــــول مــن عليا و خليني مــعاش تحط يدكـ عليا
أني : غير اسمعيني
يقين : ما نبيش نسمع شــي يكفي الى سمعته كــان تزيدني كــلمة تانية أحتمال ننتحر خليني :'(
و هــني شديتها و ضربتها كــف سخــون و دفيتها على الحيط و بديت نكلم فيها : يقين مــا تصدقيهاش اني طــه تعرفيني
يقين : تصدق أنت الوحيد الى ما نعرفكش :'( كل يوم طالع بـ مصيبة
أدالين : طــه المهم اني ماشية و فتحت الباب و طلعت
لحقتها و كــلي غل شديتها فـ الدروج و جبدتها لـي الشقة مــن جديد
ادالين : حــول شن تبي
اني : انتي شن تبي ؟ شن الكذبة هاذي
ادالين : هذا  هوا حامل و انت بوه
اني :  يلا بلا كذب لا حامل لا شي  و فكينا من الكذب
ادالين : طلعت شاطر صح اني مش حامل :)
و ما نــشوف غير حاجة تجري شدت فـي شعر ادالين و نزلت فيها تخبيش
أني : غـــــير حولي يقين 😡و قمتها و دفيتها فـي الدار و سكرتها
ادالين : شن ها المسترجلة 😠 وجهي حقيرة
يقين : و الله يا ادالين كان ما وريتكـ ما نتسمى يقين يا حقيرة ياااا $%^^ و قعدت تبكي
ادالين : شــوف اني عـــندي طلب
أني : شن هوا أسمعي فلوس معااش عندي ياسر 3 الاف متع هاذيكا المرة مش عارف حتى شن درتي بيهم
ادالين : لا المرة هاذي ما نبيش فلوس
اني : املا شن تبي
ادالين : الشقة ☺
اني : شــن
ادالين : زي ما سمعت نبي الشقة هيا ما تقوليش وين نبي نعيش اصلا حسب ما عرفت انكم حـ تقعدو شويا هــني بعدين حـ تسكن مــع امكـ و حـ تبدا فـي غنى على الشقة
أني : كيف نعطيكـ الشقة يعني شن تحسابي انتي
ادالين : تكتبها بـ اسمي واضحة يعني
اني : خيركـ انتي شن تحسي بالزبط 😨 هههههههههههـ هاذي شقتي
ادالين : يا نجيب ولد مــن دار الايتام و نقول لـي امكـ انه ولدكـ و اقعد حاصل بعدين شن يبي يحلها
اني : شن تحسابي انتي
ادالين : تخاف مــن امكـ و أنكـ تخسرها ولا اطيح مـن عينها  عارفة ما تكذبش
اني : هههـ و شن حـ تصدقكـ ان ولدي
ادالين : حـ ندير كل شي باش نخليها تصدق ان ولدكـ و انت تعرفني المهم انت عندكـ حرية الاخيار و على فكرة عندكـ شهر تفكر فيه ارتاااااح ورد بالكـ اتاعب نفسكـ و طلعت

قعدت واقف مصدوم شن ها الوقحة هاذي 😲 قالت الشقة مصح وجهــا و خلاص فعلا ان لم تستحي فـ افعل ما شـئت
فتحت الباب لـ يقين و طــبعا بدت هيا فـ المحاضرة و تبكي و تعيط و تدعي و حاله البنت حطيت راسي على المخدة و قعدت نشوفلها كــيف تعيط و تنقز
يقين : مــصح وجها  نحسابها حتى روحت طلعتلي زي الجن اعوذ بالله منها
أني : يقين
يقين : خليني و الله اعلم شن قالتلكـ لما سكرت عليا الدار
اني : يــقين
يقين : خليني قتلكـ ولا شن تبي
اني : حـ نطلعــو مــن الحوش
يقين : اه علاش
اني : خلاص يقين حـ نطلعو  و طلعت
قعدت نلـــود معاش عرفت وين نمشي حاولت نقعد برا الحوش و خلاص
خـطمت على الولاد فـي القهوة حاولت ما نبين شــي و نبتسم
سراج : شن خليت المراة بروحها ولا جبتها عــند أمكـ
اني : ههههههههـ لا خليتها بروحها
مصطفى : و الله يا طــه سعدودكـ
و هـــني شرين تليفون ســراج شافه وجها انقلب : الو .... تعالى .. باهي تعالى تــوا .. اي في القهوة و سكر
مصطفى : خيركـ شن في
سراج : لا واحد فـي بيني و بينه موضوع
مصطفى : خدمة ولا كيف
سراج : بعدين قول سسراج هوا القصقاص 😠
أني : ههههههههههـ
مــشي الوقت شــوي جــي شاب باين عليه صغير شوي مــتع 23 22 ما يفوتش هكــي
سراج : هــي نستاذن شباب ما تبو شي شويا و جاي هني بس
مصطفى : لالا اقلب وجهكـ
سراج : شن طــه ؟
اني : لالا سلامتكـ
و مــشي سراج مع الولد و احني قعدنا واقفين نهدرزو غـــاب نص ساعة و جــي وجهي احمر و واضح عليه كان معصب
مصطفى : خيركـ
سراج : خليني
مصطفى :شن فــي
سراج : خلاص يا مصطفى ما خيرني شي
اني : ســراج
سراج : شي شي خلاص خلوني
مصطفى : هــي اميه ترا خونا
شرب شوية أميه و مــشي مــن غير ما يحكي شي قــعدت اني و مصطفى مكسدين

لــين جــي اليل جـــتني رسالة مــن يقين ( لــو مضايق مني  نسكر على روحي الدار غير روح و الله خايفة بروحي)
مصطفى : هههههههههههـ خيركـ
أني : لا غير كسدت بروحــها
مصطفى: ههههههههـ روح هي
ركبت الــسيارة و طــول الطريق نفـكر كيف نبي نفهمها الموضوع و اول ما وصلت
فتحت الباب
يقين :لــو ما بعتت الرسالة راهو قاعد ناسي
اني : اششششش تعالي شوي
يقين : دقيقة خلي نحطلكـ شن تاكل
اني : لا ما نبيش بس نبيكـ في موضوع مهم
يقين : باهي بالشويا و طلعنا قعمزنا فـي البلاكونا
اني : شوفي حني توا شبه فـي الشارع ولا
يقين : اي
اني : يعني ما نبيش صياح ولا عياط فااهمة
يقين : معناها فـي مصيبة شــن
اني : احني لازم نطلعو مــن الشقة و حكيتلها القصة
يقين : نبي نفهم علاش خليتها تحس ان امكـ هيا نقطة الضعف عندكـ
اني : مش عارف
يقين : باهي انت فكــر شوي راهو لو تعطيها الشقة حـ تولي ليها ره
اني : خلاص يقين الله غالب المهم باش نفتكـ منها توا تاخد حتى العمارة كلها
يقين : فكر اكيد فــي حل تاني
اني : يقين فكينا مــن القتل
يقين : الحق عليا عادي ندفنوها في مكان بعيد
اني : ههههههههههـ مهبولة و قعدت نـــفكر لــين قمت راسي و قلتلها عندي حل
يقين : نذبحوها 😍 ؟
اني : ههههههههههههههههـ الله يهديكـ لا مش حـ نذبحوها
يقين : املا شن ؟ نخطفوها  ؟
اني : لا
يقين : املا شــن ؟ 😔
انـي : .............................................
يقين : حــل فضييييع و الله 😨 ..........................

#يتبع