تلاحت على الساشي لي كانت في يدها و دخلت باش تعطيه الدوا و خلات سمرا جايا من وراها
مايا : سمرااا
هزتها في حضنها وباستها
مايا : وحشتك
سمرا: انا تاني ... هذا وين قدرت نلحق جيت بسرعة كبيرة انشالله برك حرارتو تنزل
دخلت سمر لغرفة لؤي تجري حطاتو في بلاصتو و رجعت جبدت الدوا من ساشي طاحت عينيها على سريفات جنيتيك
سمر: سمرا هذا علاه هنا مانتذكرش اني طلبت منك حتى لو بخطأ تجيبلي معاك سريفات
سمرا: هذو ليا انا و بخطأ حطيتهم مع الدوا
سمر: سمحلي انتي مريضة و تعبتك معايا
سمرا: لا لا شريتهم احتياط برك راح نفطر مايا و نجي نقعد مع لؤي هذا هو الوقت لي تروحي فيه تخدمي
سمر: ايه راني مش رايحة نخدم راح نلحقك كي يسكت لؤي و تنزل حرارتو
خرجت سمرا من عندها و دخلت للمطبخ توجد الفطور ل مايا حطتها على الكرسي و حطت الحليب يسخن وقفت تخمم واش راح تعمل مع خالها وين راح تروح اذا صح باع دار هي ماتتفاهمش مع مرت خالها اذا عاشت عندها و ماعندهاش المال حتي باش تكري دار و تعيش فيها تاع الصح سيدي مليح و زاد الهو و الريح
مايا: اااااااا سمرا ثوفي حليب ساح
سمرا : زح افف بقالي غير انت ضروك
حطت مايا يديها على فمها متفاجئة كي سمعت واش قالت سمارة
مايا: سمرا قلتي العيب راح يديك ربي للنار من و ماما راح تضربك جري تخباي تحت سرير قبل ماتجي
حطت سمرا يديها على فمها و عملت روحها متفاجئة وهي كانت تخبي في ضحكتها على مايا و براءتها كيفاش تخطط و تدبر عليها تتخبا
سمرا : يااااا راح يعذبني ربي واش راح ندير ضروك انا؟ وإنتي كون تعاوديها راح تقتلنا ماماك مع بعض
مايا: لا لا انا نخاف من ماما كي ترجع شريرة و تضربني نقولش عيب انا
سمارة: نعرفك شاطرة يا خنفوستي هيا شربي حليب قبل ماتجي ماما
حطتلها حليبها و فطورها و قعدت تشوف فيها تأكل بعدها بمدة دخلت سمر لي خلات لؤي رقد و نزلت حرارتو شوية وجدت قهوة ليها و لسمرا و قعدت جنب مايا مقابلتها
سمر : مايا كملتي فطورك شطورة تاعي ؟
حطت مايا يدها على كرشها تحك فيها
مايا: شوفي كشي كي خرجت خلاص بعت رجعت كيما كشك نهار كليتي لؤي
سمر: هههه شاطرة بنتي هياا روحي تلعبي في غرفتك
عوجت مايا شفافيها مشي عاجبها الحال و راحت لغرفتها تضرب في رجليها على الأرض سمرا كانت تشرب في قهوتها وتضحك على مايا لي تاع صح تنسيها في كلشي
سمر: قوليلي واش بيك من وقت جيتي و انتي ماشي عاجبتني حتى صوتك وقت هدرت معاك في تيليفون ماعجبنيش ؟
سمرا: لا مكان حتى شي مرقدتش مليح برك
سمرا: شوفي فيا سمرا راني في عام ولا اكثر نعرفك ، حالتك اليوم و الدمعة لي في عينيك ماشي تاع وحدة مارقدتش مليح ديريني كيف ختك و حكيلي واش عندك بلاك نقدر نساعدك اصلا الايام هذو كل مكش مليحة
حطت سمرا يديها في زوج على وجها و بدات تبكي حتى رجعت تشهق
سمر: سمرااا ؟
ناضت تجري ليها
سمر : وش صرا ماتقلقينيش عليك واش صاري
سمرا: خالي جا عندي اليوم صباح وقالي راح يبيع الدار و انا ماعنديش وين نروح
سمر: علاه هذي ماشي دارك لي راكي ساكنة فيها
سمرا: لا لا هذي دار العايلة بصح امي خلات حقها في الورث وحكمت دار برك
حكاتلها كلش وقصة الدار و كيفاش خالها رجع تقلب عليها وراح يبيع الدار فوق راسها
سمر: هدي روحك شوية و انا راني هنا نوقف معاك واذا تحتاجي محامي ولا اي مساعدة نهدر مع سراج يساعدك و يهدر مع خالك
سمرا: لا لا مدام خالي ونعرفو مليح راح نعاود نهدر معاه و نشوف بلاك يخليني فالدار
سمر: ان شاءالله مايكون غي الخير و اذا ماشي قادرة اليوم تخدمي روحي ريحي روحك راني هنا مع الاولاد
سمرا: مذابيك مدام راح نروح ونريح مخي شويا و نهار اليوم مادخليهش فالخلاص
سمر: روحي برك الخلاص راح يقعد كيما راه
سمرا : الله يعطيك الهنا مدام
خرجت سمرا من عندها وقفت فالطريق تخمم وين تروح دار خلاتها خاربة و كون ترجع ضروك راح تزيد تكسر لي بقى فيها ... وقفت طاكسي و ركبت طلبت منو يديها وين البحر تريح المكان الوحيد لي تريح فيه وقف الطاكسي فالسركيلاسيون حطت راسها على زجاج تشوف مع جيهة الطريق طلعت راسها متفاجئة و هي تشوف في امين خارج من محل حاط يدو على خصر وحدة لابسة ربع روبة يتمشو رايحين يركبو فالطونوبيل
